Ahadith

موسیٰ بن اسماعیل نے ہم سے بیان کیا کہ جویریہ نے ہمیں بتایا۔انہوں نے نافع سے، نافع نے حضرت عبداللہ (بن عمرؓ) سے روایت کی۔ انہوں نے ان کو بتایا کہ نبی صلی اللہ علیہ وسلم نے سونے کی ایک انگوٹھی بنوائی اور جب آپؐ اس کو پہنتے تو نگینہ کو اپنی ہتھیلی کی طرف رکھتے تھے تو لوگوں نے بھی سونے کی انگوٹھیاں بنوائیں، آپؐ یہ دیکھ کر منبر پر چڑھے اور اللہ کی حمد و ثنا کی اور فرمایا: میں نے سونے کی انگوٹھی بنوائی تھی اب اسے نہیں پہنوں گا۔ یہ کہہ کر آپؐ نے اتار ڈالی اور لوگوں نے بھی اتار ڈالی۔ جویریہ کہتے تھے کہ میں سمجھتا ہوں کہ نافع نے یہ بھی کہا تھا کہ آپؐ نے اپنے داہنے ہاتھ میں پہنی تھی۔

ابو عبد اللہ (امام بخاریؒ) نے کہا اور احمد (بن حنبل) نے اپنی سند میں اتنا اور بیان کیا کہ (محمد بن عبداللہ) انصاری نے ہم سے بیان کیا انہوں نے کہا: مجھے میرے باپ نے بتایا۔انہوں نے ثمامہ سے، ثمامہ نے حضرت انسؓ سے روایت کی۔انہوں نے کہا: نبی صلی اللہ علیہ وسلم کی انگوٹھی آپؐ کے ہاتھ میں اورآپؐ کے بعد حضرت ابوبکرؓ کے ہاتھ میں اورحضرت ابوبکرؓ کے بعد حضرت عمر ؓ کے ہاتھ میں رہی۔ جب حضرت عثمانؓ خلیفہ ہوئے تو وہ أریس کے کنوئیں پر بیٹھے ۔ حضرت انسؓ کہتے تھے کہ انہوں نے وہ انگوٹھی نکالی اور اس کو یونہی ادھر ادھر کرنے لگے وہ گر گئی۔ حضرت انسؓ کہتے تھے: ہم حضرت عثمانؓ کے ساتھ تین دن وہاں جاتے رہے اور کنوئیں کا پانی سارے کا سارا نکالا مگروہ ہمیں نہ ملی۔

ابوعاصم (نبیل) نے ہم سے بیان کیا کہ ابن جریج نے ہمیں خبردی کہ حسن بن مسلم نے ہمیں بتایا۔ انہوں نے طاؤس سے، طاؤس نے حضرت ابن عباس رضی اللہ عنہما سے روایت کی کہ میں نبی صلی اللہ علیہ وسلم کے ساتھ عید میں شریک ہوا تو آپؐ نے خطبہ سے پہلے نماز پڑھائی۔ ابوعبداللہ (امام بخاریؒ) نے کہا: اور ابن وہب نے ابن جریج سے روایت کرتے ہوئے اتنا اور بڑھایا پھر آپؐ عورتوں کے پاس آئے اور ان کو صدقہ کا حکم دیا ۔ اور وہ حضرت بلالؓ کے کپڑے میں چھلے اور انگوٹھیاں ڈالنے لگیں۔

اسحاق بن ابراہیم نے ہمیں بتایا کہ عبدہ (بن سلیمان) نے ہم سے بیان کیا کہ ہشام بن عروہ نے ہمیں بتایا۔ ہشام نے اپنے باپ سے، ان کے باپ نے حضرت عائشہ رضی اللہ عنہا سے روایت کی۔ آپؐ فرماتی تھیں: اسماءؓ کا ایک ہار گم ہوگیا تو نبی صلی اللہ علیہ وسلم نے اس کی تلاش میں چند آدمیوں کو بھیجا اور نماز کا وقت ہوگیا جبکہ وہ باوضو نہ تھے اور نہ انہیں پانی مل سکا تو لوگوں نے بغیر وضو کے ہی نماز پڑھی۔ انہوں نے نبی صلی اللہ علیہ وسلم سے اس کا ذکر کیا اور اللہ نے تیمم کی آیت نازل کی۔ ابن نمیر نے ہشام سے، ہشام نے اپنے باپ سے، ان کے باپ نے حضرت عائشہؓ سے روایت کرتے ہوئے اتنا اور بڑھایا کہ جو انہوں نے اسماء ؓسے مستعار لیا تھا۔