Ahadith

اسحاق بن ابراہیم حنظلی نے مجھ سے بیان کیا کہ یحيٰ بن آدم نے ہمیں خبردی کہ ورقاء بن عمر نے ہمیں بتایا۔ ورقاء نے عبیداللہ بن ابی یزید سے، عبیداللہ نے نافع بن جبیر سے، نافع نے حضرت ابوہریرہ رضی اللہ عنہ سے روایت کی۔ انہوں نے کہا: میں مدینہ کے بازاروں میں سے ایک بازار میں رسول اللہ صلی اللہ علیہ وسلم کے ساتھ تھا۔ آپؐ وہاں سے واپس لوٹے اور میں بھی لوٹا آپؐ نے تین بار پکارا:چھوٹا بچہ کہاں ہے؟ حسن بن علیؓ کو بلاؤ۔ حسن بن علیؓ اٹھ کر چلتے ہوئے آیا اور اس کے گلے میں لونگ وغیرہ کا ہار تھا۔نبی صلی اللہ علیہ وسلم نے ہاتھ اس طرح پھیلایا توحسنؓ نے بھی اپنا ہاتھ اس طرح پھیلایا اور آپؐ نے اس کو گلے لگایا اور فرمایا: اے اللہ ! میں اس سے محبت رکھتا ہوں تو بھی اس سے محبت رکھ اور جو اس سے محبت کرتا ہے اس سے بھی محبت کر۔ حضرت ابوہریرہؓ کہتے تھے: رسول اللہ صلی اللہ علیہ وسلم نے جو فرمایا اس کے بعد حسن بن علیؓ سے بڑھ کر مجھے کوئی پیارا نہ تھا۔

محمد بن بشار نے ہمیں بتایا کہ محمد بن جعفر (غندر) نے ہم سے بیان کیا کہ شعبہ نے ہمیں بتایا۔ شعبہ نے قتادہ سے، قتادہ نے عکرمہ سے، عکرمہ نے حضرت ابن عباس رضی اللہ عنہما سے روایت کی۔ انہوں نے کہا: رسول اللہ ﷺ نے ان مردوں پر لعنت کی جو عورتوں کی طرح بنیں اور ان عورتوں پر لعنت کی جو مردوں کی طرح بنیں۔ (غندر کی طرح) اس حدیث کو عمرو (بن مرزوق) نے بھی روایت کیا کہ ہمیں شعبہ نے بتایا۔

مالک بن اسماعیل نے ہم سے بیان کیا کہ زہیر (بن معاویہ) نے ہمیں بتایا کہ ہشام بن عروہ نے ہم سے بیان کیاکہ عروہ نے ان کو بتایا۔ حضرت زینب بنت اُم سلمہؓ نے اُن کو بتایا۔ حضرت اُم سلمہؓ نے ان کو خبر دی کہ نبی صلی اللہ علیہ وسلم ان کے گھر میں تھے اور گھر میں ایک مخنث بھی تھا تو وہ حضرت اُم سلمہؓ کے بھائی عبداللہؓ سے کہنے لگا: عبداللہؓ ! اگر اللہ نے تمہیں کل طائف کی فتح دی تو میں تمہیں غیلان کی بیٹی کا پتہ دوں گا۔کیونکہ وہ آتی ہے تو اس کے چار بل نظر آتے ہیں اور جب جاتی ہے تو آٹھ بل نظر آتے ہیں۔ نبی صلی اللہ علیہ وسلم نے یہ سن کر فرمایا: یہ (لوگ)تمہارے پاس ہرگزنہ آیا کریں۔ ابوعبداللہ (امام بخاریؒ)نے کہا:تُقْبِلُ بِأَرْبَعٍ کے یہ معنی ہیں کہ اس کے پیٹ پر چار بل پڑتے ہیں۔ گویا وہ ان کو لے کر آتی ہے اور اس کا یہ کہنا کہ تُدْبِرُ بِثَمَانٍ تو اس کی یہ مراد ہے کہ جب وہ پیٹھ پھیر کر جاتی ہے تو ان چار بلوں پر اور چار بل پڑتے ہیں کیونکہ وہ اس کے دونوں پہلوؤں پر ہوتے ہیں جو ان سے مل جاتے ہیں اورثَمَانِيَة نہیں کہا تو اس لئے کہ اس سے مراد اطراف کا مفرد یعنی طرف ہے جو کہ مذکر ہے کیونکہ وہ ثَمَانِيَةَ أَطْرَافٍ نہیں کہہ سکتا تھا۔