Ahadith

ہدبہ بن خالد نے ہم سے بیان کیا کہ ہمام (بن یحيٰ) نے ہمیں بتایا۔ قتادہ نے ہم سے بیان کیا۔ قتادہ نے حضرت انس بن مالکؓ سے، حضرت انسؓ نے حضرت معاذ بن جبل رضی اللہ عنہ سے روایت کی۔ انہوں نے کہا: ایک بار میں نبی صلی اللہ علیہ وسلم کے پیچھے سواری پر بیٹھا ہوا تھا ۔ میرے اور آپؐ کے درمیان پالان کی لکڑی کے سوا اور کچھ نہ تھا۔ آپؐ نے فرمایا: معاذؓ ! میں نے کہا: حاضر ہوں یا رسول اللہ اور آپؐ کی خدمت میں ہوں۔ پھر آپؐ تھوڑی دیر تک چلے پھر فرمایا: معاذؓ!میں نے کہا: حاضر ہوں یا رسول اللہ ! اور آپؐ کی خدمت میں ہوں۔ پھر آپؐ تھوڑی دیر چلے پھر فرمایا:معاذؓ! میں نے کہا: حاضر ہوں یا رسول اللہ ! اور آپؐ کی خدمت میں ہوں۔ آپؐ نے فرمایا: تم جانتے ہو اللہ کا حق اپنے بندوں پہ کیا ہے؟ میں نے کہا: اللہ اور اس کا رسول بہتر جانتے ہیں۔ آپؐ نے فرمایا: اللہ کا حق اپنے بندوں پر یہ ہے کہ وہ اس کی عبادت کریں، اس کا کسی کو شریک نہ ٹھہرائیں۔ پھر آپؐ تھوڑی دیر چلتے رہے پھر فرمایا: معاذ بن جبلؓ ! میں نے کہا: حاضر ہوں یارسول اللہ اور آپؐ کی خدمت میں ہوں۔ آپؐ نے فرمایا: جانتے ہو بندوں کا کیا حق اللہ پر ہے جب وہ اس کا حق ادا کریں ؟ میں نے کہا: اللہ اور اس کا رسول بہتر جانتے ہیں۔ آپؐ نے فرمایا: بندوں کا حق اللہ پر یہ ہے کہ وہ اُن کو سزا نہ دے۔

حسن بن محمد بن صباح نے ہم سے بیان کیا کہ یحيٰ بن عبادنے ہمیں بتایا۔ شعبہ نے ہم سے بیان کیا کہ یحيٰ بن ابی اسحاق نے مجھے خبر دی۔ یحيٰ نے کہا: میں نے حضرت انس بن مالک ؓ سے سنا۔ آپؐ نے فرمایا: ہم رسول اللہ صلی اللہ علیہ وسلم کے ساتھ خیبر سے آئے اور میں حضرت ابوطلحہؓ کے پیچھے ایک سواری پر بیٹھا ہوا تھا اور وہ چلے جارہے تھے اور رسول اللہ صلی اللہ علیہ وسلم کی ازواج میں سے کوئی رسول اللہ صلی اللہ علیہ وسلم کے پیچھے سوار تھیں کہ اتنے میں اونٹنی نے ٹھوکر کھائی ۔ میں نے کہا: عورت (گر پڑی ۔) میں اترا تو رسول اللہ صلی اللہ علیہ وسلم نے فرمایا: یہ بھی تمہاری ماں ہے۔ میں نے پالان کو مضبوط باندھا ۔ رسول اللہ صلی اللہ علیہ وسلم سوار ہوئے۔ جب آپؐ مدینہ کے قریب پہنچے یا کہا مدینہ کو دیکھا۔ آپ نے فرمایا: ہم لوٹ کر آرہے ہیں اپنے ربّ کی طرف رجوع کرنے والے، اس کی عبادت کرنے والے، اسی کی حمد کرنے والے ہیں۔