Ahadith

مالک بن اسماعیل نے ہم سے بیان کیا کہ (سفیان) بن عیینہ نے ہمیں بتایا۔ انہوں نے زُہری سے سنا۔ وہ کہتے تھے: حسن بن محمد بن علی اور ان کے بھائی عبداللہ (بن محمد بن علی) نے مجھے خبر دی۔ ان دونوں نے اپنے باپ سے روایت کی کہ حضرت علی رضی اللہ عنہ نے حضرت ابن عباسؓ سے کہا کہ نبی صلی اللہ علیہ وسلم نے خیبر (کی جنگ) کے زمانہ میں متعہ سے اور پالتو گدھوں کے گوشت سے روک دیا۔

اور ابن ابی ذئب نے کہا: مجھے ایاس بن سلمہ بن اکوع نے اپنے باپ سے روایت کرتے ہوئے بتایا۔ ان کے باپ نے رسول اللہ صلی اللہ علیہ وسلم سے روایت کی کہ جو مرد اور عورت آپس میں متفق ہو جائیں تو وہ تین دن رات آپس میں مل کر رہیں۔ اگر وہ اس سے زیادہ رہنا چاہیں تو رہیں اور اگر ایک دوسرے سے الگ ہونا چاہیں تو الگ ہو جائیں۔ میں نہیں جانتا کہ یہ ایسی اجازت تھی کہ ہمارے لئے خاص تھی یا تمام لوگوں کے لئے عام ہے۔ ابوعبداللہ(امام بخاریؒ) نے کہا: اور حضرت علیؓ نے نبی صلی اللہ علیہ وسلم سے روایت کرتے ہوئے اس کو واضح کیا کہ اجازت منسوخ ہے۔

علی بن عبداللہ (مدینی) نے ہم سے بیان کیا کہ مرحوم (بن عبدالعزیز بصری) نے ہمیں بتایا۔ انہوں نے کہا: میں نے ثابت بنانی سے سنا۔ وہ کہتے تھے: میں حضرت انسؓ کے پاس تھا۔ اس وقت اُن کے پاس ان کی ایک بیٹی بھی بیٹھی تھی۔ حضرت انسؓ نے کہا: ایک عورت رسول اللہ صلی اللہ علیہ وسلم کے پاس آئی کہ اپنے تئیں آپؐ کو پیش کرے۔ کہنے لگی: یا رسول اللہ! کیا آپؐ کو میری ضرورت ہے؟ حضرت انسؓ کی بیٹی یہ سن کر بولی: کیا ہی بے حیا وہ تھی، کیا ہی عار کی بات کی ہے۔ (حضرت انسؓ نے) کہا: وہ تم سے بہتر تھی جس نے نبی صلی اللہ علیہ وسلم کو پسند کیا اور پھر اپنے تئیں آپؐ کو پیش کیا۔

سعید بن ابی مریم نے ہمیں بتایا کہ ابوغسان نے ہم سے بیان کیا۔ انہوں نے کہا: ابوحازم (سلمہ بن دینار) نے حضرت سہل بن سعدؓ سے روایت کرتے ہوئے مجھے بتایا کہ ایک عورت نے اپنے تئیں نبی صلی اللہ علیہ وسلم کے لئے پیش کیا تو ایک شخص نے آپؐ سے کہا: یا رسول اللہ! آپؐ اس سے میرا نکاح کردیں۔ آپؐ نے فرمایا: تمہارے پاس کیا ہے؟ اس نے کہا: میرے پاس کچھ نہیں۔ آپؐ نے فرمایا: جاؤ اور کچھ ڈھونڈو، اگر چہ لوہے کی انگوٹھی ہی ہو۔ چنانچہ وہ گیا اور کچھ دیر بعد لوٹ آیا اور کہنے لگا: کچھ نہیں، اللہ کی قسم کچھ نہیں ملا۔ لوہے کی انگوٹھی بھی نہیں ملی۔ البتہ یہ میرا تہ بند ہے۔ اس کا آدھا اسے دئیے دیتا ہوں۔ حضرت سہلؓ کہتے تھے: اس کے پاس اوپر کی چادر بھی نہ تھی۔ نبی صلی اللہ علیہ وسلم نے فرمایا: یہ تمہارے تہ بند سے کیا کرے گی۔ اگر تو نے پہنا تو اس کے پہننے کے لئے اس میں سے کچھ نہ رہے گا اور اگر اس نے پہنا تو تمہارے پہننے کے لئے کچھ نہ رہے گا۔ وہ شخص بیٹھ گیا اور آخر جب اسے بیٹھے ہوئے بہت دیر ہوگئی تو وہ اُٹھ کر چل پڑا۔ نبی ﷺ نے اس کو جاتے ہوئے دیکھا تو آپؐ نے اس کو بلایا یا (کہا:) اس کو بلا کر (آپؐ کے پاس) لائے۔ آپؐ نے اس سے پوچھا: تمہیں قرآن سے کیا کچھ یاد ہے۔ اس نے چند سورتوں کو گن کر کہا: مجھے فلاں فلاں سورة یاد ہے۔ نبی صلی اللہ علیہ وسلم نے فرمایا: ہم نے تمہیں یہ قبضے میں دے دی ان سورتوں کے بدلے میں جو تمہیں قرآن سے یاد ہیں۔

عبدالعزیز بن عبداللہ نے ہم سے بیان کیا کہ ابراہیم بن سعد نے ہمیں بتایا۔ انہوں نے صالح بن کیسان سے، صالح نے ابن شہاب سے روایت کی۔ انہوں نے کہا: مجھے سالم بن عبداللہ نے خبر دی کہ انہوں نے حضرت عبداللہ بن عمر رضی اللہ عنہما کو یہ بیان کرتے سنا کہ جب حضرت حفصہ بنت عمرؓ، خنیس بن حذافہ سہمیؓ کے فوت ہونے سے بیوہ ہوگئیں اور وہ رسول اللہ صلی اللہ علیہ وسلم کے صحابہ میں سے تھے اور مدینہ میں فوت ہوگئے تو حضرت عمر بن خطابؓ کہتے تھے کہ میں عثمان بن عفانؓ کے پاس آیا اور میں نے حفصہؓ (کا رشتہ) ان کے سامنے پیش کی۔ انہوں نے کہا: میں اپنے متعلق غور کروں گا۔ میں کئی رات انتظا ر کرتا رہا پھر اس کے بعد وہ مجھے ملے اور کہنے لگے: مجھے یہی مناسب معلوم ہوا ہے کہ میں فی الحال شادی نہ کروں۔ حضرت عمرؓ کہتے تھے: پھر میں ابوبکر صدیقؓ سے ملا اور میں نے کہا: اگر آپؓ چاہیں تو میں آپؓ سے حفصہ بنت عمرؓ کا نکاح کردیتا ہوں۔ ابوبکرؓ یہ سن کر خاموش رہے اور مجھے کچھ جواب نہ دیا، تو عثمانؓ کی نسبت میں ان سے زیادہ رنجیدہ خاطر ہوا۔ میں چند راتیں ٹھہرا رہا۔ پھر اس کے بعد رسول اللہ صلی اللہ علیہ وسلم نے (حفصہؓ کے متعلق) نکاح کا پیغام بھیجا اور میں نے حفصہؓ کا نکاح آپؐ سے کردیا۔ پھر مجھے ابوبکرؓملے اور کہنے لگے: شاید تم مجھ پر ناراض ہوئے ہو، تم نے جب میرے سامنے حفصہؓ کا رشتہ پیش کیا تھا اور میں نے جواب نہ دیا تھا۔ حضرت عمر ؓنے کہا: ہاں۔ حضرت ابوبکرؓ نے کہا: دیکھو جو بات تم نے میرے سامنے پیش کی تھی اس کے متعلق تمہیں جواب دینے سے مجھے صرف اسی بات نے روکا تھا کہ میں جانتا تھا کہ رسول اللہ صلی اللہ علیہ وسلم نے حفصہؓ کا ذکر کیا تھا او ر میں ایسا نہیں تھا کہ رسول اللہ صلی اللہ علیہ وسلم کا راز افشا کرتا اور اگر رسول اللہ صلی اللہ علیہ وسلم حفصہؓ سے نکاح کرنے کا ارادہ چھوڑ دیتے تو میں اس کو قبول کرلیتا۔