Ahadith

(امام بخاریؒ نے کہا:) مجھ سے علی بن عبداللہ مدینی نے کہا: ہم سے یحيٰ بن آدم نے بیان کیا کہ ابوزائدہ کے بیٹے نے ہمیں بتایا۔ انہوں نے محمد بن ابی قاسم سے، محمد نے عبدالملک بن سعید بن جبیر سے، عبدالملک نے اپنے باپ سے، انہوں نے حضرت ابن عباس رضی اللہ عنہما سے روایت کی کہ حضرت ابن عباسؓ نے کہا: بنی سہم کا ایک شخص تمیم داری اور عدی بن بداء کے ساتھ سفر کو نکلا تو وہ سہمی شخص ایسے ملک میں فوت ہوا جس میں کوئی مسلمان نہ تھا۔ جب وہ دونوں اس کا متروکہ مال لائے تو اس کے وارثوں نے ایک چاندی کا گلاس گم پایا۔ جس پر سونے کا کام ہواہوا تھا۔ رسول اللہ صلی اللہ علیہ وسلم نے ان دونوں کو قسم دی (انہوں نے قسم کھالی) پھر اس کے بعد وہی گلاس مکہ میں پایا گیا۔ جن کے پاس ملا انہوں نے کہا: ہم نے تمیم اور عدی سے اسے خریدا ہے تو اس میت کے وارثوں میں سے دو آدمی کھڑے ہوئے اور ان دونوں نے قسم کھائی کہ ہماری شہادت ان دونوں کی شہادت کے مقابل زیادہ لائق اعتبار ہے اور یہ پیالہ انہی کے آدمی کا ہے۔ حضرت ابن عباسؓ کہتے تھے: انہی کے بارے میں آیت یٰأَیُّھَا الَّذِیْنَ آمَنُوْا شَھَادَۃُ بَیْنَکُمْ … نازل ہوئی تھی۔

محمد بن سابق نے ہمیں بتایا؛یافضل بن یعقوب نے محمد بن سابق سے روایت کی کہ شیبان (بن عبدالرحمن) ابومعاویہ نے ہمیں بتایا۔ فراس (بن یحيٰ) سے روایت ہے کہ انہوں نے کہا: (عامر) شعبی کہتے تھے: حضرت جابر بن عبداللہ انصاری رضی اللہ عنہما نے مجھ سے بیان کیا کہ ان کے باپ احد کی جنگ میں شہید ہوئے اور انہوں نے چھ بیٹیاں پیچھے چھوڑیں۔ اسی طرح اپنے اوپر قرضہ بھی چھوڑا ۔ جب ان کے باغ کی کھجور کاٹنے کا وقت آپہنچا تو مَیں آنحضرت ﷺکی خدمت میں حاضر ہوا اورعرض کیا: یارسول اللہ! آپؐ کو علم ہی ہے کہ میرے والد اُحد کی جنگ میں شہید ہوگئے تھے اور انہوں نے بہت سا قرضہ اپنے ذمہ چھوڑا ہے اور میں چاہتا ہوں کہ آپؐ تشریف لائیں اور قرض خواہ آپؐ کو دیکھیں (تو شاید قرض میں کچھ تخفیف کردیں۔) آپؐ نے فرمایا: اچھا جائواور ہر قسم کی کھجور الگ الگ ڈھیر کردو۔ چنانچہ (میں واپس آیا اور) ایسا ہی کیا۔ پھر آنحضرت ﷺ کو بلانے گیا تو قرض خواہوں نے جب آنحضرت ﷺ کو دیکھا تو مجھ سے اور بھی سختی سے مطالبہ کرنے لگے۔ جب آنحضرت ﷺ نے ان کا یہ حال دیکھا تو آپؐ کھجوروں کے سب سے بڑے ڈھیر کے گرد تین بار گھومے پھر اس پر بیٹھ گئے اور فرمایا: اپنے قرض خواہوں کو بلائو۔ پھر آپؐ نے اس ڈھیر میں سے انہیں ماپ ماپ کر دینا شروع کیا ۔ یہاں تک کہ اللہ نے میرے والد کا کل قرضہ اداکردیا۔ اور بخدا میں تو اس بات پر راضی تھا کہ اللہ میرے باپ کا قرضہ ادا کردے چاہے میں اپنی بہنوں کے پاس ایک کھجور بھی لے کر نہ جائوں۔ لیکن جتنے ڈھیر وہاں تھے سب بچ رہے۔ خدا کی قسم! میں اس ڈھیر کو دیکھ رہا تھا جس پر آنحضرت ﷺ بیٹھے تھے۔ وہ ایسا ہی رہا جیسے ایک کھجور بھی اس میں سے کم نہیں ہوئی۔ ابو عبد اللہ (امام بخاریؒ) نے کہا: أُغْرُوْا بِي کے معانی ہیں مجھ پر بھڑک اُٹھے۔ ۔۔۔۔ پس ہم نے ان کے درمیان باہمی دشمنی اور بغض مقدر کردیے ہیں۔