Ahadith

عبیدبن اسماعیل نے ہم سے بیان کیا کہ ابواسامہ نے ہمیں بتایا۔ انہوں نے ہشام سے، ہشام نے اپنے باپ سے، ان کے باپ نے حضرت عائشہ رضی اللہ عنہا سے روایت کی۔ انہوں نے کہا کہ بعاث کی جنگ بھی ایسی جنگ تھی کہ جسے اللہ نے اپنے رسول صلی اللہ علیہ وسلم کی خاطر بطور پیش خیمہ بنایا۔ چنانچہ رسول اللہ صلی اللہ علیہ وسلم ایسی حالت میں (مدینہ) آئے جب انصار کی جمیعت بکھر چکی تھی اور ان کے سردار کچھ تو مارے گئے تھے اور کچھ زخمی ہوگئے تھے۔ سو اللہ نے اس جنگ کو اپنے رسول صلی اللہ علیہ وسلم کے لئے بطور پیش خیمہ کے کیا تاکہ وہ اسلام میں داخل ہوجائیں۔

ابوالولید نے ہم سے بیان کیا کہ شعبہ نے ہمیں بتایا کہ ابوالتیاح سے روایت ہے۔ انہوں نے کہا: میں نے حضرت انس رضی اللہ عنہ سے سنا۔ کہتے تھے: فتح مکہ کے دن انصار کہنے لگے: قریش کو مال دے دیا ہے یہ تو بخدا بڑے تعجب کی بات ہوئی تلواریں ہماری قریش کے خونوں سے ٹپک رہی ہوں اور غنیمت کے مال بھی ہمارے انہی کو واپس دے دئیے جائیں۔ یہ خبر نبی صلی اللہ علیہ وسلم کو پہنچی تو آپؐ نے انصار کو بلایا اور فرمایا: مجھے تمہارے متعلق یہ کیا خبر پہنچی ہے؟ اور وہ جھوٹ نہیں بولتے تھے۔ انہوں نے کہا: وہی بات (درست ہے) جو آپؐ کو پہنچی ہے۔ آپؐ نے فرمایا: کیا تم اس سے خوش نہیں کہ لوگ تو اپنے گھروں میں غنیمتوں کو لے کر لوٹیں اور تم اپنے گھروں کو رسول اللہ صلی اللہ علیہ وسلم کو لے کر لوٹو ۔ اگر انصار کسی وادی یا کہا گھاٹی میں چلیں تو میں بھی انہی کی وادی یا گھاٹی میں چلوں گا۔

محمد بن بشار نے مجھے بتایا کہ غندر نے ہم سے بیان کیا کہ شعبہ نے ہمیں بتایا۔ انہوں نے محمد بن زیاد سے، محمد بن زیاد نے حضرت ابوہریرہ رضی اللہ عنہ سے، حضرت ابوہریرہؓ نے نبی صلی اللہ علیہ وسلم سے روایت کی یا (کہا:) ابوالقاسم صلی اللہ علیہ وسلم نے فرمایا: اگر انصار کسی وادی یا کہا گھاٹی میں چلیں تو میں بھی انصار کی ہی وادی میں چلوں گا اور اگر ہجرت نہ کی ہوتی تو میں بھی انصار میں سے ہی ایک آدمی ہوتا۔ حضرت ابوہریرہؓ نے کہا: میرے ماں باپ آپؐ کے قربان آپؐ نے بے جا نہیں فرمایا۔ انہوں نے آپؐ کو پناہ دی اور آپؐ کی مدد کی یا ایسا ہی اور لفظ کہا۔

اسماعیل بن عبداللہ نے ہم سے بیان کیا۔ انہوں نے کہا: ابراہیم بن سعد نے مجھے بتایا۔ انہوں نے اپنے باپ سے، ان کے باپ نے ان کے دادا (ابراہیم بن عبدالرحمٰن بن عوف) سے روایت کی۔ انہوں نے کہا: جب وہ مدینہ آئے تو رسول اللہ ﷺ نے حضرت عبدالرحمٰنؓ (بن عوف) اور حضرت سعد بن ربیع ؓ کو آپس میں بھائی بنایا۔ حضرت سعدؓ نے حضرت عبدالرحمٰنؓ سے کہا: میں انصار میں سب سے زیادہ مالدار ہوں۔ میں اپنے مال کو آدھوں آدھ تقسیم کئے دیتا ہوں اور میری دو بیویاں ہیں تم دیکھ لو جونسی ان میں سے تم کو پسند ہو وہ مجھے بتا دو، میں اسے طلاق دے دوں گا اور جب اس کی عدت پوری ہوجائے تو تم اس سے شادی کرلینا۔ حضرت عبدالرحمٰنؓ نے کہا: اللہ تمہیں تمہاری بیویوں میں اور تمہارے مال میں برکت دے۔ تمہاری منڈی کہاں ہے؟ چنانچہ انہوں نے ان کو بنی قینقاع کی منڈی کا پتہ دیا۔ وہ تبھی لوٹے کہ ان کے پاس کھویا اور گھی بچ رہا۔ پھر وہ ہر صبح وہاں جاتے رہے۔ اس کے بعد وہ ایک دن آئے اور ان پر زردی کا نشان تھا۔ نبیﷺ نے فرمایا: یہ کیا؟ حضرت عبدالرحمٰنؓ نے کہا: میں نے شادی کی ہے۔ آپؐ نے فرمایا: بیوی کو کیا مہر دیا ہے؟ انہوں نے کہا: سونے کی گٹھلی یا کہا: گٹھلی برابر سونا۔ ابراہیم نے اس کے متعلق شک کیا(کہ کیا الفاظ کہے۔)

قتیبہ نے ہم سے بیان کیا۔ اسماعیل بن جعفر نے ہمیں بتایا کہ انہوں نے حُمَید سے، حُمَید نے حضرت انس رضی اللہ عنہ سے روایت کی کہ انہوں نے کہا: حضرت عبدالرحمٰن بن عوفؓ ہمارے پاس آئے اور نبی صلی اللہ علیہ وسلم نے انہیں اور حضرت سعد بن ربیعؓ کو آپس میں بھائی بنایا اور یہ بہت مالدار تھے۔ حضرت سعدؓ نے کہا: انصار خوب جانتے ہیں کہ میں ان لوگوں میں سے ہوں جو اُن میں بہت مالدار ہیں۔ میں اپنے مال کو اپنے اور تمہارے درمیان آدھوں آدھ تقسیم کروں گا اور میری دو بیویاں ہیں تم دیکھ لو جونسی ان میں سے تمہیں زیادہ پسند ہو، اسے میں طلاق دے دوں گا۔ جب وہ اپنی عدت سے آزاد ہو جائے تو اس سے شادی کرلو۔ حضرت عبدالرحمٰنؓ نے کہا: اللہ تمہیں تمہاری بیویوں میں برکت دے۔اس دن وہ تبھی لوٹے جب کچھ گھی اور کھویا بچا لائے۔ وہ (وہاں) تھوڑی ہی مدت رہے تھے کہ رسول اللہ صلی اللہ علیہ وسلم کے پاس آئے اور ان پر زردی کے نشان تھے۔ رسول اللہ صلی اللہ علیہ وسلم نے ان سے کہا: ہیں یہ کیا؟ انہوں نے کہا: میں نے ایک انصاری عورت سے شادی کی ہے۔ آپؐ نے پوچھا: تم نے اسے مہر کیا دیا؟ انہوں نے کہا: گٹھلی برابر سونا یا کہا: سونے کی ایک گٹھلی۔ آپؐ نے فرمایا: ولیمہ کرو خواہ ایک بکری سے ہی۔