Ahadith

حضرت جابر بن عبد اللہؓ نے بیان کیا کہ رسول اللہ ﷺ نے فرمایا کہ اس امت کے مجوسی وہ لوگ ہیں جواللہ کی تقدیروں کو جھٹلاتے ہیں ۔ اگر وہ بیمار ہوجائیں تو ان کی عیادت نہ کرو ۔ اگر وہ مر جائیں تو ان کے جنازے میں حاضر نہ ہو ۔ اگر تمہاری ان سے ملاقات ہو تو ان کو سلام نہ کرو۔

حضرت عبد اللہ ؓ نے بیان کیا کہ رسول اللہ ﷺ نے فرمایا سنو! مَیں کسی بھی خلیل کی دوستی سے برا ء ت کا اظہار کرتاہوں۔ اگر میں کسی کو خلیل بناتا تو ابوبکر ؓ کو بناتا۔ یقینا تمہارا صاحب اللہ کا خلیل ہے ۔وکیع کہتے ہیں کہ آپؐ کی مُراد اپنے آپ سے تھی۔٭

حضرت علی ؓ نے بیان فرمایاکہ رسول اللہ ﷺ نے فرمایاابو بکرؓ اور عمرؓ دونوں انبیاء اور مرسلین کے علاوہ اوّلین وآخرین کے جنتیوں کے مضبوط جوانوں کے سردار ہیں ۔ اے علی ؓ! ان دونوں کو اس وقت تک نہ بتانا جب تک وہ دونوں زندہ ہیں ۔

حضرت ابو سعید خدری ؓ نے بیان کیا کہ رسول اللہ ﷺ نے فرمایاجنت میں بلند درجات والوں کو، وہ لوگ جو اُن سے نیچے ہوں گے، ان کو ایسی دیکھیں گے جیسے طلوع ہونے والا ستارہ آسمان کے آفاق میں سے ایک افق میں دکھائی دیتا ہے ۔ ابو بکرؓ اور عمرؓ انہی میں سے ہیں اور وہ دونوں افضل ہیں۔

حضرت حذیفہ بن یمانؓ نے بیان کیا کہ رسول اللہ ﷺنے فرمایامَیں نہیں جانتا کہ میرے لئے تم میں باقی رہنا کب تک ہے۔ پس تم پیروی کرو اُن کی جو میرے بعد ہیں اور آپؐ کا اشارہ ابو بکرؓ اور عمرؓ کی طرف تھا ۔

حضرت ابن عباس ؓ بیان کرتے ہیں کہ جب حضرت عمرؓ کو(وفات کے بعد) چارپائی پر رکھا گیا اور قبل اس کے کہ ان کا جنازہ اُٹھایا جائے لوگ ان کے گرد اکٹھے تھے اور دعا کر رہے تھے اور درود پڑھ رہے تھے یا کہا کہ( ان کی ) تعریف کر رہے تھے اور ان پر درود پڑھ رہے تھے اور مَیں (ابن عباسؓ) بھی ان لوگوں میں تھا ۔ اچانک ایک شخص نے مجھے چونکا دیا اور بھیڑ میں آکر مجھے آلگا میرے کندھے کو پکڑا اور جب میں نے مڑ کر دیکھا تو وہ حضرت علی بن ابی طالبؓ تھے انہوں نے حضرت عمرؓ پر رحمت کی دعا کی پھر کہا آپؓ نے کوئی ایسا شخص اپنے پیچھے نہیں چھوڑا٭ جس کے اعمال آپ کی نسبت ایسے ہوں کہ اسکے اعمال پر مجھے اللہ سے ملنا پسند ہو۔ بخدامجھے یقین تھا کہ اللہ تعالیٰ آپ کو آپ کے دونوں ساتھیوں کے ساتھ کردے گا اور یہ اس وجہ سے ہے کہ میں اکثر رسول اللہ ﷺ کو یہ فرماتے ہوئے سنا کرتا تھا کہ مَیں اورابو بکرؓ اور عمرؓ گئے ،مَیں اور ابو بکرؓ اور عمر ؓداخل ہوئے اور مَیں ابوبکرؓ اور عمرؓ نکلے ۔مجھے یقین تھا کہ اللہ تعالیٰ آپؐ کو آپؐ کے دونوں ساتھیوں کے ساتھ کردے گا ۔