Ahadith

حضرت ابو ہریرہؓ بیان کرتے ہیں کہ خدا کی قسم اگر اللہ کی کتاب میں دو آیتیں نہ ہوتیں تو میں آپؐ یعنی نبی ﷺ کی طرف سے کبھی کچھ روایت نہ کرتا۔ اگر اللہ کا یہ قول نہ ہوتا إِنَّ الَّذِیْنَ یَکْتُمُوْنَ مَا أَنْزَلَ اللّٰہُ مِنَ الْکِتَابِ ۔۔۔٭(ترجمہ) یقینا وہ لوگ جو اسے چھپاتے ہیں جو کتاب میں سے اللہ نے نازل کیا ہے اور اس کے بدلے معمولی قیمت لے لیتے ہیں، یہی وہ لوگ ہیں جو آگ کے سوا اپنے پیٹوں میں کچھ نہیں جَھونکتے۔ اور اللہ ان سے قیامت کے دن کلام نہیں کرے گا اور نہ ہی ان کو پاک کرے گا اور ان کے لئے دردناک عذاب (مقدر) ہے۔ یہی وہ لوگ ہیں جنہوں نے ہدایت کے بدلے گمراہی خرید لی اور مغفرت کے بدلے عذاب۔ پس آگ پر یہ کیا ہی صبر کرنے والے ہوں گے۔

حضرت ابو سعید خدریؓ نے بیان کیا کہ رسول اللہ ﷺ نے فرمایا جس نے چھپایا ایسے علم کو جس سے اللہ نفع دیتا ہے لوگوں کے معاملہ میں ، دین کے معاملہ میں، تو اللہ اُسے قیامت کے دن آگ کی لگام ڈالے گا ۔