Ahadith

حضرت ابو ذرؓ سے روایت ہے کہ نبیﷺ نے فرمایا کہ میرے سامنے میری اُمّت کے اچھے اور بُرے اعمال پیش کئے گئے تو میں نے اس کے خوبصورت اعمال میں سے تکلیف دہ چیز کا راستہ سے ہٹا دینا پایا اور اس کے بُرے کاموں میں وہ بلغم پائی جو مسجد میں ہو اور اسے دفن نہ کیا جائے۔

ابو مسلمہ سعید بن یزید کہتے ہیں کہ مَیں نے حضرت انس بن مالکؓ سے پوچھا کہ کیا رسول اللہﷺ جوتے پہنے ہوئے نماز پڑھ لیتے تھے؟ انہوں نے جواب دیا کہ ہاں۔

حضرت عائشہؓ سے روایت ہے کہ نبیﷺ نے ایک ایسی چادر میں نماز پڑھی جس پر نقش تھے۔ آپؐ نے فرمایاکہ اس کے نقوش نے میری توجہ بانٹ دی۔ اس لئے تم اسے ابو جہم کے پاس لے جاؤ اور اس کی انبجانی ٭(چادر) میرے پاس لے آؤ۔

حضرت عائشہؓ سے روایت ہے وہ بیان فرماتی ہیں کہ رسول اللہﷺ نما ز پڑھنے کے لئے منقش چادر میں کھڑے ہوئے توآپؐ کی نظر اس کے نقوش پر پڑی۔ جب آپؐ نے اپنی نماز پوری کر لی تو آپؐ نے فرمایا کہ یہ چادر ابوجہم بن حذیفہ کے پاس لے جاؤ اور مجھے اس کی انبجانی چادر لادو کیونکہ اِ س نے ابھی میری نماز سے توجہ بانٹ دی ہے۔

ابنِ شہاب سے روایت ہے کہ مجھے حضرت انس بن مالکؓ نے بتایا کہ رسول اللہﷺ نے فرمایا کہ جب رات کے کھانے (کا وقت) قریب ہو اور نماز کا وقت ہوجائے تو کھانے سے ابتداء کرو قبل اس کے کہ تم مغرب کی نماز پڑھو۔ اور اپنے رات کے کھانے (کو ختم کرنے میں ) جلد ی نہ کرو۔