Ahadith

حضرت ابن عمرؓ سے روایت ہے کہ رسول اللہﷺ نے فرمایا جب تم میں سے کوئی مر جاتا ہے تو صبح اور شام اس کا ٹھکانہ اسے دکھایا جاتا ہے۔ اگر وہ جنت والوں میں سے ہے تو اہل جنت کا (ٹھکانہ) اور اگر وہ دوزخ والوں میں سے ہے تو اہل دوزخ کا(ٹھکانہ) اور کہا جاتا ہے یہ تیرا ٹھکانہ ہے یہانتک کہ اللہ تعالیٰ تجھے قیامت کے دن اٹھا ئے۔ایک روایت میں (اِنْ کَانَ مِنْ اَھْلِ الْجَنَّۃِکی بجائے) فَالْجَنَّۃُ اور (اِنْ کَانَ مِنْ اَھْلِ الْنَّارِکی بجائے) فَالنَّارُ اور (حَتَّی یَبْعَثَکَکی بجائے) اَلَّذِیْ تُبْعَثُ اِلَیْہِ کے الفاظ ہیں۔

حضرت ابو سعیدؓ خدری حضرت زید بن ثابتؓ سے روایت کرتے ہوئے بیان کرتے ہیں کہ مَیں نبیﷺ کے پاس موجودنہیں تھا مگر حضرت زیدؓ بن ثابتؓ نے مجھ سے بیان کیا۔ انہوں نے کہا اس اثناء میں کہ نبیﷺ اپنی خچر پر سوار بنو نجار کے باغ میں تھے اور ہم آپؐ کے ساتھ تھے کہ وہ خچر بِدک گیا اور قریب تھا کہ آپؐ کو گرا دیتا تو وہاں چھ یا پانچ یا چار قبریں تھیں _ راوی کہتے ہیں جُریری اسی طرح کہا کرتے تھے _ توآپؐ نے فرمایا ان قبروں والوں کو کون جانتا ہے؟ ایک شخص نے کہا میں۔ آپؐ نے فرمایا یہ لوگ کب فوت ہوئے؟اس نے عرض کیا شرک کی حالت میں مرے ہیں۔ آپؐ نے فرمایا یقینا ان لوگوں کو ان قبروں میں عذاب دیاجا رہا ہے۔ پس اگر یہ (ڈر) نہ ہوتا کہ تم ایک دوسرے کودفن کرنا چھوڑ دو گے تو میں اللہ سے دعا کرتا کہ وہ تمہیں عذاب قبر میں سے وہ سنا دے جو میں سن رہا ہوں۔ پھر آپؐ ہماری طرف متوجہ ہوئے اور فرمایا آگ کے عذاب سے اللہ کی پناہ مانگو۔ انہوں نے کہا ہم آگ کے عذاب سے اللہ کی پناہ مانگتے ہیں۔ پھرآپؐ نے فرمایا قبر کے عذاب سے اللہ کی پناہ مانگو۔ انہوں نے کہا ہم قبرکے عذاب سے اللہ کی پناہ مانگتے ہیں۔ آپؐ نے فرمایا ان فتنوں سے اللہ کی پناہ مانگو جو ظاہر ہو چکے ہیں اور جو مخفی ہیں۔ انہوں نے کہا ہم ظاہری اور مخفی فتنوں سے اللہ کی پناہ مانگتے ہیں۔ آپؐ نے فرمایا تم دجال کے فتنہ سے اللہ کی پناہ مانگو۔ انہوں نے کہا ہم دجال کے فتنہ سے اللہ کی پناہ مانگتے ہیں۔

حضرت ابو ایوبؓ سے روایت ہے وہ کہتے ہیں کہ رسول اللہﷺ سورج غروب ہونے کے بعد تشریف لائے توآپؐ نے ایک آواز سنی۔ آپؐ نے فرمایا یہود اپنی قبروں میں عذاب دئیے جا رہے ہیں۔

حضرت انس بن مالکؓ کہتے ہیں اللہ کے نبیﷺ نے فرمایا جب ایک شخص اپنی قبر میں رکھا جاتا ہے اور اس کے ساتھی اسے چھوڑ کر واپس چلے جاتے ہیں تو وہ ان کی جوتیوں کی آواز سنتا ہے۔ آپؐ نے فرمایا اس کے پاس دو فرشتے آتے ہیں اور وہ اُسے بٹھاتے ہیں اور اس سے کہتے ہیں تو اس شخص (یعنی محمدﷺ ) کے بارہ میں کیا کہتا تھا؟ آپؐ نے فرمایا جومومن ہے وہ تو کہے گا میں گواہی دیتا ہوں کہ وہ اللہ کے بندے اور اس کے رسولؐ ہیں۔ آپؐ نے فرمایا اسے کہا جائے گا تو آگ میں اپناٹھکانہ دیکھ لے۔ اللہ تعالیٰ نے اس کے بدلہ تجھے جنت میں ٹھکانہ دیا ہے۔ اللہ کے نبیﷺ نے فرمایا وہ دونوں (ٹھکانوں ) کو ایک ساتھ دیکھے گا۔ (راوی) قتادہ کہتے ہیں اور ہمیں بتایا گیا ہے کہ اس کی قبر ستر ہاتھ وسیع کی جاتی ہے اور اس دن تک وہ سبزہ سے بھر دی جاتی ہے جب لوگ اٹھائے جائیں گے۔

حضرت انس بن مالکؓ بیان کرتے ہیں کہ رسول اللہﷺ نے فرمایاجب میت کو اس کی قبر میں رکھا جاتا ہے تو جب لوگ (اسے دفن کر کے) لوٹتے ہیں تووہ ان کی جوتیوں کی آواز سنتا ہے۔ ایک روایت میں (اِنَّ الْمَیِّتَ اِذَا وُضِعَ فِیْ قَبْرِہِ کی بجائے) اِنَّ الْعَبْدَ اِذَا وُضِعَ فِیْ قَبْرِہِ وَتَوَلَّی عَنْہُ اَصْحَابُہُ کے الفاظ ہیں۔

حضرت براء بن عازبؓ سے روایت ہے کہ نبیﷺ نے فرمایا یُثَبِّتُ اللَّہُ الَّذِیْنَ آمَنُوْا بِالْقَوْلِ الثَّابِتِ ترجمہ: اللہ ان لوگوں کو جو ایمان لائے مستحکم قول کے ساتھ استحکام بخشتا ہے٭۔ آپؐ نے فرمایایہ(آیت) عذابِ قبر کے بارہ میں نازل ہوئی ہے۔ اسے کہا جائے گا تیرا رب کون ہے؟ تو وہ کہے گا میرا رب اللہ ہے اور میرے نبی محمدﷺ ہیں۔ یہ اللہ عزّوجل کا قول ہے یُثَبِّتُ اللَّہُ الَّذِیْنَ آمَنُوْا بِالْقَوْلِ الثَّابِتِ فِی الْحَیَاۃِ الدُّنْیَا وَفِی الآخِرَۃ ترجمہ: اللہ ان لوگوں کو جو ایمان لا ئے مستحکم قول کے ساتھ دنیوی زندگی میں اور آخرت میں استحکام بخشتا ہے ۔

حضرت براء بن عازبؓ اس آیت یُثَبِّتُ اللَّہُ الَّذِیْنَ آمَنُوْا بِالْقَوْلِ الثَّابِتِ فِیْ الْحَیَاۃِ الدُّنْیَا وَفِیْ الآخِرَۃ ترجمہ: اللہ ان لوگوں کو جو ایمان لا ئے مستحکم قول کے ساتھ دنیوی زندگی میں اور آخرت میں استحکام بخشتا ہے٭ کے بارہ میں بیان کرتے ہیں کہ یہ عذابِ قبر کے بارہ میں نازل ہوئی۔

حضرت ابو ہریرہؓ بیان کرتے ہیں کہ جب ایک مومن کی روح نکلتی ہے تو اسے دو فرشتے ملتے ہیں جو اسے اوپر لے جاتے ہیں _راوی حماد کہتے ہیں پھر (راوی بدیل)نے اس(روح) کی عمدہ خوشبو اور مشک کا ذکر کیا_حضرت ابو ہریرہؓ کہتے ہیں آسمان والے کہیں گے زمین کی طرف سے ایک پاک روح آئی ہے۔ اللہ تجھ پر رحمت کرے اور اس جسم پر جس میں تو آباد تھی۔ پھر اسے اس کے رب عزّوجل کے پاس لے جایاجائے گاپھر وہ فرمائے گا اسے آخری مدت تک کے لئے لے جاؤ۔ انہوں نے بیان کیا کافر کی روح جب نکلتی ہے_ حماد کہتے ہیں (راوی بدیل) نے اس کی بدبو اور اس کے ملعون ہونے کا ذکر کیا _اور آسمان والے کہیں گے زمین کی طرف سے (ایک) خبیث روح آئی ہے۔ وہ (حضرت ابوہریرہؓ ) بیان کرتے ہیں کہا جائے گا اسے آخری مدت تک کے لئے لے جاؤ۔ حضرت ابو ہریرہؓ کہتے ہیں پھر رسول اللہﷺ نے اپنا کپڑا اپنی ناک پر اس طرح رکھ لیا۔