Ahadith

حضرت ابن عباسؓ حضرت علیؓ سے روایت کرتے ہیں انہوں نے کہا کہ مجھے میرے محبوبﷺ نے منع فرمایا کہ میں رکوع و سجدہ کی حالت میں قراءت کروں۔ حضرت ابن عباسؓ حضرت علیؓ سے روایت کرتے ہیں حضرت علیؓ نبیﷺ سے روایت کرتے ہیں کہ مجھے نبیﷺ نے منع فرمایا کہ میں قرآن کی قراءت کروں جبکہ میں رکوع میں ہوں۔ راویوں نے اپنی روایات میں سجدے میں اس کی ممانعت کاذکر نہیں کیا۔ عبد اللہ بن حنین نے ’’سجدہ میں‘‘ کے الفاظ کا ذکر نہیں کیا۔

حضرت ابو ہریرہؓ سے روایت ہے کہ رسول اللہﷺ نے فرمایا کہ بندہ اپنے رب سے سب سے زیادہ قریب سجدہ کی حالت میں ہوتا ہے پس (اس میں ) کثرت سے دعا کیا کرو۔

حضرت ابو ہریرہؓ سے روایت ہے کہ رسول اللہﷺ اپنے سجدے میں یہ دعا کیا کرتے تھے، اے اللہ! میرے سب گناہ معاف فرمادے، چھوٹے اور بڑے پہلے اور بعد کے ظاہر اور پوشیدہ۔

حضرت عائشہؓ سے روایت ہے آپ بیان کرتی ہیں کہ رسول اللہﷺ اپنے رکوع اور سجدے میں بکثرت یہ دعا کیا کرتے تھے پاک ہے تو اے اللہ ہمارے رب! اور اپنی حمد کے ساتھ اے اللہ مجھے بخش دے۔ آپؐ قرآن کریم کی تعمیل فرماتے تھے٭۔

حضرت عائشہؓ سے روایت ہے وہ بیان کرتی ہیں کہ رسول اللہﷺ اپنی وفات سے قبل بکثرت یہ دعا کیا کرتے تھے پاک ہے تو اور اپنی حمد کے ساتھ میں تجھ سے بخشش طلب کرتا ہوں اور تیرے حضور توبہ کرتا ہوں۔ وہ (حضرت عائشہؓ ) بیان کرتی ہیں کہ میں نے عرض کیا یا رسول اللہ! یہ کیسے کلمات ہیں جو میں دیکھتی ہوں، آپؐ نے نئے رنگ میں کہنے شروع کر دئیے ہیں۔ آپؐ نے فرمایامیرے لئے میری امت میں ایک علامت مقرر کی گئی تھی کہ جب میں اس کو دیکھوں تویہ کہوں۔ اِذَا جَآئَ نَصْرُ اللّٰہِ وَالْفَتْحُ۔ ۔ ۔ سورۃ کے آخر تک۔