Ahadith

ہشام کے والد بیان کرتے ہیں کہ حضرت عائشہؓ نے مجھ سے فرمایا اللہ کی قسم! تیرے باپ دادا ان لوگوں میں سے ہیں جنہوں نے باوجود زخم پہنچنے کے اللہ اور رسولؐ کو لبیک کہا۔ایک اور روایت میں یہ اضافہ ہے کہ ان کی مراد حضرت ابو بکر ؓ اور حضرت زبیرؓ سے تھی۔

حضرت انسؓ بیان کرتے ہیں کہ رسول اللہﷺ نے فرمایا یقینا ہر امت کا ایک امین ہے اور ہما را امین اے امت !ابو عبیدہؓ بن الجراح ہے۔

حضرت حذیفہؓ سے روایت ہے کہ اہل نجران رسول اللہﷺ کی خدمت میں حاضر ہوئے اور عرض کیا یا رسولؐ اللہ! ہمارے پاس کوئی امین آدمی بھیجئے اس پر آپؐ نے فرمایا میں ضرور تمہاری طرف ایسا امین آدمی بھیجوں گا جو حقیقی امین ہوگا، حقیقی امین۔ حضرت حذیفہؓ کہتے ہیں اس پر لوگ اس شرف کی تمنا کرنے لگے وہ کہتے ہیں پھر آپؐ نے حضرت ابو عبیدۃ بن الجراح ؓ کو بھیجا۔

حضرت ابو ہریرہؓ بیان کرتے ہیں کہ میں دن کے ایک حصہ میں رسول اللہﷺ کے ساتھ نکلا۔ نہ آپؐ مجھ سے کوئی بات کر رہے تھے اور نہ میں آپؐ سے کوئی بات کر رہا تھا یہانتک کہ آپؐ بنو قینقاع کے بازار میں تشریف لے گئے۔ پھر آپؐ واپس چل پڑے یہانتک کہ آپؐ حضرت فاطمہؓ کے گھر تشریف لائے اور فرمایا کیا یہاں ننھاہے؟ کیایہاں ننھا ہے؟ راوی کہتے ہیں آپؐ کی مراد حسنؓ سے تھی؟ (راوی کہتے ہیں ) ہم نے خیال کیا اس کی والدہ نے اسے روک رکھا ہے کہ اسے نہلائیں اور ہار پہنائیں اور تھوڑی ہی دیر میں وہ (حسنؓ ) دوڑتے ہوئے آئے اور دونوں ایک دوسرے کے گلے لگ گئے اور رسول اللہﷺ نے فرمایا اے اللہ! میں اس سے محبت کرتا ہوں، تو بھی اس سے محبت کراور جو اس سے محبت کرے اس سے بھی محبت کر۔

حضرت براءؓ بیان کرتے ہیں کہ میں نے رسول اللہﷺ کو دیکھا جبکہ آپؐ حضرت حسن بن علیؓ کو اپنے کندھے پر بٹھائے ہوئے تھے اور آپؐ کہہ رہے تھے اے اللہ! میں اس سے محبت کرتا ہوں تو بھی اس سے محبت کر۔