Ahadith

حضرت ابن عمرؓ کہتے ہیں کہ رسول اللہﷺ نے اس بات سے منع فرمایا کہ کوئی شخص دو دو کھجوریں اکٹھی کھائے سوائے اس کے کہ اپنے ساتھیوں سے اجازت لے لے۔

حضرت عائشہؓ سے روایت ہے کہ نبی ﷺ نے فرمایا وہ گھر والے جن کے پاس کھجوریں ہوں بھوکے نہیں رہ سکتے۔

حضرت عائشہؓ سے روایت ہے آپؓ فرماتی ہیں رسول اللہﷺ نے فرمایا اے عائشہؓ ! جس گھر میں کھجور نہیں اس گھر والے بھوکے ہیں۔ اے عائشہؓ ! جس گھر میں کھجور نہیں اس گھر والے بھوکے ہیں یا فرمایا بھوکے رہے۔ آپؐ نے یہ دو یا تین مرتبہ فرمایا۔

عامر بن سعد بن ؓ ابی وقاص اپنے والد سے روایت کرتے ہیں کہ رسول اللہ ﷺ نے فرمایا جو شخص ان دو لاوا کے میدانوں کے درمیان صبح کو سات کھجوریں کھائے تو شام تک اسے کوئی زہر ضرر نہیں پہنچائے گا۔

حضرت عائشہؓ سے روایت ہے کہ رسول اللہﷺ نے فرمایا عالیہ کی عجوہ میں شفاء ہے یا فرمایا صبح صبح وہ تریاق ہے۔

حضرت سعیدؓ بن زید بن عمرو بن نفیل سے روایت ہے وہ کہتے ہیں میں نے نبی ﷺ کو فرماتے ہوئے سنا کہ کھمبی مَنّ میں سے ہے اور اس کا پانی آنکھ کے لئے شفا ہے۔

حضرت سعیدؓ بن زید بن عمرو بن نفیل سے روایت ہے وہ کہتے ہیں رسول اللہﷺ نے فرمایا کہ کھمبی اس مَنّ میں سے ہے جو اللہ تبارک تعالیٰ نے بنی اسرائیل پر اتارا تھا اور اس کا پانی آنکھ کے لئے شفا ہے۔

حضرت سعیدؓ بن زید سے روایت ہے کہ نبی ﷺ نے فرمایا کھمبی اس مَنّ میں سے ہے جو اللہ تعالیٰ نے موسیٰ علیہ السلام پر اتارا تھا اور اس کا پانی آنکھ کے لئے شفا ہے۔