Ahadith

حضرت جابرؓ بن عبد اللہ کہتے ہیں جب خندق کھودی گئی تو میں نے رسول اللہﷺ کو دیکھا آپؐ کو بھوک لگی ہے۔ میں اپنی بیوی کے پاس گیا اور اسے کہا کیا تیرے پاس کچھ ہے کیوں کہ میں نے رسول اللہﷺ کے متعلق محسوس کیا ہے کہ آپؐ کو شدید بھوک لگی ہوئی ہے۔ وہ میرے پاس ایک تھیلا جس میں ایک صاع جو تھے لائی اور ہمارے گھر میں ایک بکروٹہ تھا۔ وہ کہتے ہیں میں نے اسے ذبح کیا اور اس نے آٹا پیسا اور میرے فارغ ہونے کے ساتھ ہی وہ بھی فارغ ہوئی۔ اور میں نے اسے کاٹ کر ہنڈیا میں ڈالا۔ پھر میں رسول اللہﷺ کی طرف جانے کے لئے مڑا تو اس نے کہا مجھے رسول اللہﷺ اور آپؐ کے ساتھیوں کے سامنے شرمندہ نہ کرنا۔ وہ کہتے ہیں میں آپؐ کے پاس حاضر ہوا اور چپکے سے عرض کیا یا رسولؐ اللہ! ہم نے اپنا بکروٹہ ذبح کیا ہے اور ہمارے پاس ایک صاع جَو تھے جو اس نے پیسے۔ آپؐ اپنے چند ساتھیوں کے ساتھ تشریف لائیے تو رسول اللہﷺ نے بلند آواز سے فرمایا اے خندق والو! جابرؓ نے تمہاری دعوت کی ہے اس لئے آؤ چلو اور رسول اللہﷺ نے فرمایا ’’جب تک میں نہ آؤں اپنی ہانڈی نہ اتارنا، نہ اپنے آٹے کی روٹیاں پکانا‘‘ میں واپس آیا اور رسول اللہﷺ بھی لوگوں کے آگے آگے تشریف لائے۔ میں اپنی بیوی کے پاس آیا۔ اس نے مجھے بُرا بھلا کہا۔ میں نے کہا میں نے تو وہی کیا جو تم نے مجھے کہا تھا۔ پھر میں نے آپؐ کے سامنے اپنا آٹا پیش کیا۔ آپؐ نے اس میں اپنا لعاب دہن ڈالا اور برکت دی پھر ہماری ہانڈی کے پاس آئے اور اس میں بھی اپنا لعاب دہن ڈالا اور برکت دی پھر آپؐ نے فرمایا ایک اور روٹی پکانے والی کو بلاؤ جو تمہارے ساتھ روٹی پکائے اور ہنڈیا کو اتارے بغیر اس میں سے نکال کر ڈالتی جاؤ۔ اور وہ ایک ہزار تھے۔ میں اللہ کی قسم کھاتا ہوں انہوں نے کھایا اور بچ بھی گیا اور واپس چلے گئے اور ہماری ہنڈیا ویسے ہی اُبل رہی تھی جیسے وہ پہلے تھی اور ہمارا آٹا بھی (ویسے ہی تھا) یا جیسا کہ ضحاک کہتے ہیں اور ہمارا آٹا اسی طرح پک رہا تھا۔

حضرت انس بن مالکؓ کہتے ہیں حضرت ابو طلحہؓ نے حضرت ام سلیمؓ سے کہا میں نے رسول اللہﷺ کی کمزور سی آواز سنی ہے اور میں اس میں بھوک محسوس کرتا ہوں۔ کیا تمہارے پاس کچھ ہے؟ انہوں نے کہا ہاں۔ انہوں نے جو کی روٹیاں نکالیں۔ پھر اپنی اوڑھنی لی اور اس کے ایک حصہ میں روٹیاں لپیٹ دیں پھر اُسے میرے کپڑے کے نیچے چھپا دیا اور اس کا ایک حصہ اوپر ڈال دیا اور مجھے رسول اللہﷺ کی طرف بھیجا۔ وہ کہتے ہیں میں وہ لے گیا۔ میں نے رسول اللہﷺ کو مسجد میں بیٹھے ہوئے پایا۔ آپؐ کے ساتھ اور لوگ بھی تھے میں ان کے پاس کھڑا ہو گیا۔ رسول اللہﷺ نے فرمایا تمہیں ابو طلحہؓ نے بھیجا ہے؟ وہ کہتے ہیں میں نے کہا جی ہاں آپؐ نے فرمایا کیا کھانے کے لئے؟ میں نے کہا جی ہاں اس پر رسول اللہﷺ نے اپنے ساتھیوں سے فرمایا اُٹھو۔ وہ کہتے ہیں آپؐ چلے، میں بھی ان کے آگے آگے چلنے لگا یہاں تک کہ حضرت ابو طلحہؓ کے پاس پہنچا۔ میں نے انہیں بتایا تو حضرت ابو طلحہؓ نے کہا اے اُمّ سلیم! رسول اللہﷺ لوگوں کے ساتھ تشریف لارہے ہیں اور ہمارے پاس نہیں ہے جو اُن کو کھلائیں۔ وہ کہنے لگیں اللہ اور اس کا رسولؐ بہتر جانتے ہیں۔ وہ کہتے ہیں پھر حضرت ابو طلحہؓ چلے یہاں تک کہ رسول اللہﷺ سے ملے۔ پھر رسول اللہﷺ ان کے ساتھ تشریف لے گئے یہاں تک کہ آپ دونوں اندر داخل ہوئے۔ رسول اللہﷺ نے فرمایا اے اُمّ سلیم! جو تمہارے پاس ہے وہ لے آؤ۔ (ام سلیمؓ) وہ روٹیاں لے آئیں۔ رسول اللہﷺ نے ان کے بارہ میں ارشاد فرمایا تو ان کے ٹکڑے کئے گئے اور حضرت اُمّ سلیمؓ نے ان پر ایک چھوٹے برتن سے چکنائی ڈال کر نرم کیا۔ پھر رسول اللہﷺ نے اس پر (دعائیہ) کلمات کہے۔ پھر فرمایا دس کو اجازت دو۔ انہوں نے انہیں اجازت دی اور انہوں نے کھایا یہانتک کہ وہ سیر ہو گئے۔ پھر وہ نکلے، آپؐ نے پھر فرمایا دس کو اجازت دو یہاں تک کہ سب لوگوں نے کھانا کھا لیا اور سیر ہو گئے اور یہ لوگ ستر یا اسی تھے۔

حضرت انس بن مالکؓ کہتے ہیں مجھے حضرت ابو طلحہؓ نے رسول اللہﷺ کو دعوت دینے کے لئے بھیجا۔ انہوں نے کھانا بنایا۔ وہ کہتے ہیں میں آیا اور رسول اللہﷺ لوگوں کے ساتھ تھے۔ آپؐ نے میری طرف دیکھا اور میں نے شرم محسوس کی اور عرض کیا ابو طلحہؓ کی طرف سے دعوت قبول فرمائیے۔ آپؐ نے لوگوں سے فرمایا اٹھو۔ (وہاں پہنچنے پر) حضرت ابو طلحہؓ نے عرض کیا یا رسولؐ اللہ! میں نے تو صرف آپؐ کے لئے کچھ تیار کیا تھا۔ وہ کہتے ہیں رسول اللہﷺ نے اسے چھوا اور اس میں برکت کے لئے دعا کی، پھر آپؐ نے فرمایا میرے صحابہؓ میں سے دس کو اندر لاؤ اور فرمایا کھاؤ اور آپؐ نے ان کے لئے اپنی انگلیوں کے درمیان سے کچھ ڈالا۔ انہوں نے کھایا یہانتک کہ وہ سیر ہوگئے اور باہر چلے گئے۔ پھر آپؐ نے فرمایا دس کو اندر لے آؤ۔ انہوں نے بھی کھایا یہانتک کہ سیر ہو گئے۔ پھر وہ اسی طرح دس (دس) کو اندر لاتے اور سیر ہونے کے بعد باہر بھیجتے رہے یہاں تک کہ ان میں سے کوئی بھی باقی نہ رہا مگر وہ داخل ہوا اور اس نے کھایا یہانتک کہ وہ سیر ہوگیا، پھر آپؐ نے اس کھانے کو ایک جگہ جمع کیا تو وہ اتنا ہی تھا جتنا اس وقت جب انہوں نے کھانا شروع کیا تھا۔ ایک اور روایت کے آخر میں ہے کہ پھر آپﷺ نے جو بچ گیا تھا اسے جمع کیا اور اس میں برکت کی دعا کی۔ راوی کہتے ہیں کہ وہ اتنا ہو گیا جتنا پہلے تھا۔ آپﷺ نے فرمایا یہ تم لوگ لے لو۔ حضرت انسؓ سے ایک اور روایت میں ہے کہ حضرت ابو طلحہؓ نے حضرت ام سلیمؓ کو کہا صرف نبیﷺ کے لئے کھانا تیار کریں۔ پھر انہوں نے مجھے آپﷺ کی طرف بھیجا۔ باقی روایت سابقہ روایت کی طرح ہے مگر اس میں یہ بھی ہے کہ نبیﷺ نے اپنا ہاتھ رکھا اور اس پر بسم اللہ پڑھی پھر فرمایا۔ دس کو اندر بلاؤ۔ انہوں نے ان کو اندر بلایا وہ اندر آئے۔ آپﷺ نے فرمایا کھاؤ اور اللہ کا نام لو۔ انہوں نے کھایا یہاں تک کہ آپﷺ نے 80 آدمیوں کے ساتھ ایسا ہی کیا۔ پھر نبیﷺ نے اور گھر والوں نے اس کے بعد کھایا اور کچھ بچ بھی گیا۔ طعام کے بارہ میں حضرت انسؓ بن مالک روایت کرتے ہیں جس میں انہوں نے کہا حضرت ابو طلحہؓ دروازہ پر کھڑے ہو گئے اور رسول اللہﷺ تشریف لائے اور انہوں نے عرض کیا یا رسولؐ اللہ! یہ صرف تھوڑی سی چیز تھی۔ آپؐ نے فرمایا وہ لے آؤ، اللہ اس میں برکت ڈال دے گا۔ ایک اور روایت میں ہے کہ رسول اللہﷺ نے اور گھر والوں نے کھایا اور بچا لیا جو انہوں نے اپنے ہمسائیوں کو پہنچا دیا۔ ایک اور روایت حضرت انسؓ بن مالک سے مروی ہے کہ حضرت ابو طلحہؓ نے رسول اللہ

حضرت انس بن مالکؓ بیان کرتے ہیں کہ ایک درزی نے رسول اللہﷺ کو کھانے کی دعوت دی جو اس نے آپؐ کے لئے بنایا تھا حضرت انسؓ بن مالک کہتے ہیں میں رسول اللہﷺ کے ساتھ اس کھانے کے لئے گیا۔ اس نے جو کی روٹی اور شوربا جس میں کدو اور گوشت کے ٹکڑے تھے۔ رسول اللہﷺ کی خدمت میں پیش کئے۔ حضرت انسؓ کہتے ہیں میں نے رسول اللہﷺ کو دیکھا کہ آپؐ پلیٹ کے کناروں سے چن کر کدو کھا رہے ہیں۔ وہ کہتے ہیں اس دن سے میں بھی کدو پسند کرنے لگا۔

حضرت انسؓ بن مالک کہتے ہیں ایک شخص نے رسول اللہﷺ کی دعوت کی۔ میں بھی آپؐ کے ساتھ گیا۔ وہ شوربا لایا گیا جس میں کدو تھا رسول اللہﷺ کدو تناول فرمانے لگے اور آپؐ اسے پسند فرما رہے تھے۔ وہ کہتے ہیں جب میں نے یہ دیکھا تو اسے آپؐ کی طرف کرنے لگا اور میں نے اسے خود نہیں کھایا۔ حضرت انسؓ کہتے ہیں اس کے بعد سے مجھے کدو اچھا لگنے لگا۔ ایک اور روایت میں یہ اضافہ ہے کہ حضرت انسؓ روایت کرتے ہیں کہ ایک درزی نے رسول اللہﷺ کی دعوت کی۔ راوی ثابت نے کہا میں نے حضرت انسؓ کو کہتے ہوئے سنا اس کے بعد جب بھی میرے لئے کھانا تیار کیا گیا اگر مجھ سے ہو سکتا کہ اس میں کدو ڈالا جائے تو ڈالا جاتا۔

عبداللہ بن بسر سے روایت ہے وہ کہتے ہیں رسول اللہﷺ میرے باپ کے پاس بطور مہمان تشریف لائے ہم نے آپؐ کی خدمت میں کھانا اور وطبہ پیش کیا 1۔ آپؐ نے اس میں سے کھایا پھر آپؐ کے پاس کھجوریں لائی گئیں آپؐ انہیں کھاتے تھے اور گٹھلی کو دو انگلیوں سے (پکڑ کر) رکھتے۔ اور شہادت کی انگلی اور درمیانی کو ملا لیتے۔ شعبہ کہتے ہیں یہ میرا گمان ہے اور اس طرح انشاء اللہ کہ دو انگلیوں کے درمیان گٹھلی کو اس طرح ڈالنا ہے۔ پھر کوئی مشروب لایا گیا آپؐ نے اُسے پیا پھر آپؐ نے وہ اسے دیا جو آپؐ کے دائیں طرف تھا۔ وہ کہتے ہیں میرے والد نے کہا جبکہ انہوں نے آپﷺ کی سواری کی لگام پکڑی ہوئی تھی کہ اللہ سے ہمارے لئے دعا کیجئے۔ آپؐ نے دعا کی اے اللہ! جو کچھ تو نے انہیں عطا فرمایا ہے اس میں ان کے لئے برکت ڈال دے۔ اور انہیں بخش دے۔ اور ان پر رحم فرما۔

حضرت عبد اللہؓ بن جعفر سے روایت ہے وہ کہتے ہیں میں نے رسول اللہﷺ کو کھجور کے ساتھ ککڑی کھاتے ہوئے دیکھا۔

حضرت انس بن مالکؓ بیان کرتے ہیں کہ میں نے نبی ﷺ کو گوٹ مار کر بیٹھے ہوئے کھجوریں کھاتے دیکھا۔

حضرت انسؓ سے روایت ہے رسول اللہﷺ کے پاس کھجوریں لائی گئیں نبیﷺ دو زانو بیٹھے اسے تقسیم فرما رہے تھے اور قدرے تیزی سے اس میں سے کھا رہے تھے اور زھیر کی روایت میں اَکْلًا حَثِیْثاً کے الفاظ ہیں۔

شعبہ کہتے ہیں میں نے جبلہ بن سحیم کو کہتے ہوئے سنا کہ ابن زبیر ہمیں کھجوریں دیتے تھے۔ راوی کہتے ہیں ان دنوں لوگ بہت مشکل حالات سے دوچار تھے۔ ہم کھا رہے تھے تو حضرت ابن عمرؓ ہمارے پاس سے گذرے انہوں نے کہا دو دو کھجوریں ملا کر نہ لو کیونکہ رسول اللہ ﷺ نے دو دو اکٹھی کھجوریں لینے سے منع فرمایا ہے۔ سوائے اس کے کوئی شخص اپنے بھائی سے اجازت لے۔ شعبہ کہتے ہیں میرے خیال میں یہ بات حضرت ابن عمرؓ کی ہے یعنی اجازت لینے کی بات۔ ایک اور روایت میں وَقَدْ کَانَ أَصَابَ النَّاسَ یَومَئِذٍ جَہْدٌ کے الفاظ نہیں ہیں۔