Ahadith

ابی قزعۃ سے روایت ہے کہ عبدالملک بن مروان نے بیت اللہ کا طواف کرتے ہوئے جب کہا اللہ تعالیٰ ابن زبیرؓ کا بُرا کرے کہ وہ ام المؤمنینؓ سے غلط روایت کرتا تھا وہ کہتا تھا میں نے اُن کو کہتے سنا ہے رسول اللہﷺ نے فرمایا اے عائشہؓ ! اگر تیری قوم نئی نئی کفر سے نہ آئی ہوتی تو میں ضرور بیت اللہ کو منہدم کر دیتا اور اُسے حِجر تک بڑھا دیتا کیونکہ تمہاری قوم نے تعمیر کو چھوٹا کر دیا تھا۔ حارث بن عبداللہ بن ابی ربیعہ نے کہا اے امیر المؤمنین ! یہ نہ کہیں۔ میں نے ام المؤمنینؓ کو یہ حدیث بیان کرتے سنا ہے۔ (عبدالملک بن مروان) نے کہا اگر میں اسے گرانے سے پہلے یہ سن لیتا تو میں ضرور اسے ابن زبیرؓ کی تعمیر پر چھوڑ دیتا۔

حضرت عائشہؓ سے روایت ہے آپؓ فرماتی ہیں میں نے رسول اللہﷺ سے حطیم کے بارہ میں پوچھا کہ کیا وہ بیت اللہ کا حصہ ہے؟ آپؐ نے فرمایا ہاں۔ میں نے عرض کیا تو انہوں نے اسے بیت اللہ میں کیوں شامل نہیں کیا؟ آپؐ نے فرمایا تمہاری قوم کے پاس خرچ کم ہو گیا تھا۔ میں نے کہا اس کے دروازہ کے اونچا ہونے کی کیا وجہ ہے؟ آپؐ نے فرمایا تمہاری قوم نے یہ کیا ہے تاکہ وہ جسے چاہیں داخل کریں اور جسے چاہیں روک دیں۔ اگر تمہاری قوم جاہلیت سے نئی نئی نہ آئی ہوتی اور مجھے یہ ڈر نہ ہوتا کہ ان کے دل اوپرا جانیں گے تو میری رائے تھی کہ حطیم کو بیت اللہ میں داخل کر دوں اور اس کے دروازے کو زمین کے ساتھ لگا دوں۔ ایک اور روایت حضرت عائشہؓ سے مروی ہے اس میں جدر کے بجائے حجر کا لفظ ہے اور اسی طرح یہ بات بھی بیان ہے کہ میں نے پوچھا اس کا دروازہ کیوں بلند ہے اس پر سیڑھی کے بغیر چڑھا نہیں جا سکتا۔۔۔ اور اَخَافُ اَنْ تُنْکِرَ قُلُوْبُہُمْ کی بجائے مَخَافَۃَ اَنْ تَنْفِرَ قُلُوْبُہُمْ کے الفاظ ہیں۔

حضرت عبداللہ بن عباسؓ سے روایت ہے وہ کہتے ہیں فضل بن عباسؓ رسول اللہﷺ کے پیچھے سواری پر بیٹھے ہوئے تھے۔ خثعم قبیلہ کی ایک عورت آپ کے پاس آئی اور آپؓ سے پوچھنے لگی۔ فضلؓ اس کی طرف دیکھنے لگے اور وہ ان کی طرف دیکھتی تھی۔ رسول اللہﷺ فضل کا چہرہ دوسری جانب پھیرنے لگے۔ اس (خاتون) نے کہا یا رسولؐ اللہ! حج کے بارہ میں اللہ کا جو فریضہ اس کے بندوں پر ہے میرے باپ پر بڑھاپے کی عمر میں واجب ہوا ہے۔ وہ سواری پر جم کر بیٹھ نہیں سکتے۔ کیا میں اُن کی طرف سے حج کروں؟ آپؐ نے فرمایا ہاں اور یہ حجۃ الوداع کی بات ہے۔

حضرت ابن عباسؓ نے حضرت فضلؓ سے روایت کی ہے کہ خثعم قبیلہ کی ایک عورت نے کہا یا رسولؐ اللہ! میرا باپ بہت بوڑھا ہے اس پر حج کے بارہ میں اللہ کا فریضہ واجب ہوا ہے اور وہ اپنے اونٹ کی پشت پر جم کر بیٹھ نہیں سکتا۔ اس پر نبیﷺ نے فرمایا تم اس کی طرف سے حج کرلو۔

حضرت ابن عباسؓ سے روایت ہے کہ نبیﷺ روحاء مقام پر ایک قافلہ سے مِلے اور فرمایا کون لوگ ہو؟ انہوں نے کہا مسلمان۔ اور انہوں نے پوچھا آپؐ کون ہیں؟ آپؐ نے فرمایا اللہ کا رسولؐ تو ایک عورت نے بچہ کو آپؐ کی طرف اٹھا کر کہا کیا اس کا حج ہے؟ آپؐ نے فرمایا ہاں اور تمہارے لئے اجر ہے۔

حضرت ابن عباسؓ سے روایت ہے وہ کہتے ہیں ایک عورت نے اپنا بچہ اٹھایا اور کہا یا رسولؐ اللہ! کیا اس کا حج ہے؟ آپؐ نے فرمایا ہاں اور تمہیں اجر ہوگا۔

کُریب سے روایت ہے ایک عورت نے بچہ اٹھایا اور کہا یا رسولؐ اللہ! کیا اس کا حج ہے؟ آپؐ نے فرمایا ہاں اور تیرے لئے اجر ہے۔

حضرت ابو ہریرہؓ سے روایت ہے وہ کہتے ہیں رسول اللہﷺ نے ہم سے خطاب کیا اور فرمایا اے لوگو! اللہ نے تم پر حج فرض کیا ہے، پس حج کرو۔ ایک شخص نے کہا یا رسولؐ اللہ! کیا ہر سال؟ آپؐ خاموش رہے یہاں تک کہ اس نے تین مرتبہ یہ سوال کیا۔ رسول اللہﷺ نے فرمایا اگر میں ہاں کہہ دیتا تو یہ فرض ہو جاتا اور تم اس کی طاقت نہ رکھتے۔ پھر آپؐ نے فرمایا جب تک میں تمہیں چھوڑے رکھوں تم بھی مجھے کچھ نہ کہو یقینا تم سے پہلے لوگ اپنے سوالات کی کثرت کی وجہ سے اور اپنے انبیاء سے اختلاف کرنے کی وجہ سے ہلاک ہوئے۔ پس جب میں تمہیں کسی چیز کا حکم دوں تو جتنی تم میں طاقت ہے اسے بجا لاؤ اور جب میں تمہیں کسی چیز سے منع کروں تو اسے چھوڑ دو۔

حضرت ابن عمرؓ سے روایت ہے کہ رسول اللہﷺ نے فرمایا عورت تین دن کا سفر نہ کرے سوائے اس کے کہ اس کے ساتھ اس کا محرم ہو۔ ایک اور روایت میں ثَلَاثًا کی بجائے فَوْقَ ثَلَاثٍ (تین دن سے زائد) کے الفاظ ہیں اور ایک دوسری روایت میں ثَلَا ثًا کی بجائے ثَلَا ثَۃً کے الفاظ ہیں۔ اور ایک دوسری روایت میں ثَلَاثًا کی بجائے ثَلَاثَۃً کے الفاظ ہیں۔