Ahadith

سالم اپنے والد رضی اللہ عنہ سے روایت کرتے ہیں کہ نبی ﷺ نے فرمایا پانچ جانور ایسے ہیں جن کو حرم میں یا احرام کی حالت میں کوئی مار دے تو اس پر کوئی گناہ نہیں چوہیا، بچھو، کوا، چیل، اور کاٹنے والا کتا۔ ایک اور روایت میں (فِی الحَرَمِ وَالْاِحْرَامِ کی بجائے) فِی الْحُرُمِ وَالْاِحْرَامِ کے الفاظ ہیں۔

حضرت عبد اللہ بن عمر رضی اللہ عنہما کہتے ہیں کہ نبی ﷺ کی زوجہ مطہرہ حضرت حفصہؓ نے بیان کیا کہ رسول اللہ ﷺ نے فرمایا پانچ جانور ہیں جن میں ہر ایک ضرر رساں ہے جو انہیں مار دے اس پر کوئی ہرج نہیں ہے۔ بچھو اور کوا اور چیل اور چوہیا اور کاٹنے والا کتا۔

زید بن جبیر سے روایت ہے کہ ایک شخص نے حضرت عبد اللہ بن عمرؓ سے پوچھا مُحرِم شخص جانوروں میں سے کسے مار سکتا ہے؟ انہوں نے کہا مجھے رسول اللہﷺ کی ازواج مطہرات میں سے ایک نے بتایا تھا کہ آپؐ نے حکم دیا تھا یا آپؐ کو حکم دیا گیا تھا کہ آپؐ چوہیا، بچھو، چیل، کاٹنے والا کتا اور کوا مار دیں۔

زید بن جبیر سے روایت ہے کہ ایک شخص نے حضرت (عبد اللہ) بن عمرؓ سے پوچھا ایک مُحرِم جانوروں میں سے کسے مار سکتا ہے؟ انہوں نے کہا مجھے نبی ﷺ کی ازواج مطہرات میں سے ایک نے بتایا تھا کہ کاٹنے والا کتا، چوہیا، بچھو، چیل اور سانپ کے مارنے کا آپؐ حکم دیا کرتے تھے۔ انہوں (حضرت ابن عمرؓ) نے کہا اور نماز کے دوران میں بھی۔

حضرت ابن عمر رضی اللہ عنہما سے روایت ہے کہ رسول اللہ ﷺ نے فرمایا کہ جانوروں میں سے پانچ جانور مارنے پر محرم کو کوئی گناہ نہیں کوا اور چیل اور بچھو اور چوہیا اور کاٹنے والا کتا۔

ابن جریج کہتے ہیں میں نے نافع سے پوچھا آپ نے حضرت ابن عمرؓ سے اس بارہ میں کیا سنا ہے کہ مُحرِم کے لئے کونسے جانوروں کو مارنا جائز ہے۔ نافع نے مجھے کہا کہ حضرت عبد اللہؓ نے بتایا میں نے نبی ﷺ کو فرماتے ہوئے سنا ہے کہ جانوروں میں سے پانچ کو جو کوئی بھی مارے تو ان کے مارنے پر کوئی گناہ نہیں کوّا اور چیل اور بچھو اور چوہیا اور کاٹنے والا کتا۔ ایک اور روایت میں (خَمْسٌ مِنَ الدَّوابِ لَا جُنَاحَ عَلَی مَنْ قَتَلَہُنَّ فِی قَتْلِھِنَّ کی بجائے) خَمْسٌ لَا جُنَاحَ فِی قَتْلِ مَا قُتِلَ مِنْہُنَّ فِی الْحَرَمِ کے الفاظ ہیں۔

حضرت عبد اللہ بن عمر رضی اللہ عنہ کہتے ہیں کہ رسول اللہ ﷺ نے فرمایا پانچ جانور ایسے ہیں جس نے انہیں مُحْرِم ہونے کی حالت میں مار دیا اس پر ان کی وجہ سے کوئی گناہ نہیں، بچھو اور چوہیا اور کاٹنے والا کتا، کوا اور چیل۔

حضرت کعب بن عجرہ رضی اللہ عنہ سے روایت ہے کہ رسول اللہ ﷺ حدیبیہ کے موقعہ پر میرے پاس تشریف لائے اور میں اپنی ہنڈیا کے نیچے آگ جلا رہا تھا __راوی قواریری نے ہنڈیا کیلئے قِدر کا لفظ استعمال کیا ہے اور راوی ابو الربیع نے بُرمۃ کا لفظ استعمال کیا ہے__ اور جوئیں میرے چہرے پر گر رہی تھیں۔ آپؐ نے فرمایا کیا تمہارے سر کی جوئیں تمہیں تکلیف دیتی ہیں؟ وہ کہتے ہیں میں نے عرض کی جی ہاں۔ آپؐ نے فرمایا تو سر منڈوا لو اور تین روزے رکھو یا چھ مسکینوں کو کھانا کھلاؤ یا ایک (جانور کی) قربانی کرو۔ راوی ایوب کہتے ہیں مجھے معلوم نہیں کہ (ان تینوں میں سے) ابتداء کس سے کی تھی۔

حضرت کعب بن عجرہ رضی اللہ عنہ سے روایت ہے وہ کہتے ہیں یہ آیت میرے بارہ میں اتری فَمَنْ کَانَ مِنْکُمْ مَرِیْضًا۔۔۔ ترجمہ: پس اگر تم میں سے کوئی بیمار ہو یا اس کے سر میں کوئی تکلیف ہو تو کچھ روزوں کی صورت میں یا صدقہ دے کر یا قربانی پیش کر کے فدیہ دینا ہوگا۔ (البقرۃ: 197) وہ کہتے ہیں میں آپؐ کے پاس آیا۔ آپؐ نے فرمایا قریب ہو تو میں قریب ہوا۔ آپؐ نے فرمایا قریب ہو۔ میں اور قریب ہوا۔ رسول اللہﷺ نے فرمایا کیا تمہیں تمہاری جوئیں تکلیف دیتی ہیں؟ (راوی) ابن عون کہتے ہیں میرا خیال ہے انہوں (کعبؓ) نے کہا جی ہاں۔ تو انہوں (کعبؓ) نے کہا آپؐ نے مجھے روزوں یا صدقہ یا قربانی میں سے جو بھی میسر ہو فدیہ دینے کا ارشاد فرمایا۔