Ahadith

حضرت انس بن مالکؓ کہتے ہیں کہ رسول اللہﷺ نے فرمایا: قیامت کے دن سب انبیاء سے زیادہ میرے متّبعین ہوں گے اور میں پہلا شخص ہوں گا جو جنت کا دروازہ کھٹکھٹائے گا۔

حضرت انسؓ بن مالک کہتے ہیں کہ نبی ﷺ نے فرمایا میں جنت کے لئے سب سے پہلا شفیع ہوں۔ کسی نبی کی اتنی تصدیق نہیں کی گئی جتنی میری کی گئی ہے اور نبیوں میں سے ایک ایسا نبی بھی ہے اس کی امت میں سے سوائے ایک شخص کے کسی نے تصدیق نہیں کی۔

حضرت انس بن مالکؓ کہتے ہیں کہ رسول اللہﷺ نے فرمایا قیامت کے دن میں جنت کے دروازے کے پاس آؤں گا اور اس کو کھلوانا چاہوں گا تو داروغہ کہے گا آپ کون ہیں؟ مَیں کہوں گا محمدؐ۔ وہ کہے گا آپؐ ہی کے لئے مجھے حکم دیا گیا تھا کہ میں آپؐ سے پہلے کسی کے لئے نہ کھولوں۔

حضرت ابو ہریرہؓ کہتے ہیں کہ رسول اللہﷺ نے فرمایا ہر نبی کے لئے ایک خاص دعا ہوتی ہے جو دعا وہ کرتا ہے (اور وہ قبول ہوتی ہے)۔ میں ارادہ رکھتا ہوں کہ میں اپنی (یہ) دعا قیامت کے دن اپنی امت کی شفاعت کے لئے محفوظ رکھوں۔

حضرت ابو ہریرہؓ کہتے ہیں کہ رسول اللہ ﷺ نے فرمایا ہر نبی کی ایک (عظیم الشان) دعا ہوتی ہے اور میں نے یہ ارادہ کیا ہے کہ میں اپنی (یہ) دعا قیامت کے دن اپنی امت کی شفاعت کے لئے انشاء اللہ محفوظ رکھوں گا۔

حضرت ابو ہریرہؓ نے کعب الاحبار سے کہا کہ یقینا اللہ کے نبیﷺ نے فرمایا ہر نبی ایک خاص دعا کرتا ہے۔ اور میں ارادہ رکھتا ہوں کہ میں اپنی (یہ) دعا قیامت کے دن اپنی امت کی شفاعت کے لئے محفوظ رکھوں گا انشاء اللہ۔ کعب نے حضرت ابو ہریرہؓ سے کہا کہ آپؓ نے یہ (بات) رسول اللہﷺ سے خود سنی ہے؟ حضرت ابو ہریرہؓ نے کہا ہاں۔

حضرت ابو ہریرہؓ کہتے ہیں کہ رسول اللہﷺ نے فرمایا ہر نبی کی ایک (خاص) مقبول دعا ہوتی ہے۔ ہر نبی نے پہلے ہی وہ دعا مانگ لی مگر میں نے اپنی دعا قیامت کے دن اپنی امت کی شفاعت کے لئے محفوظ کر لی۔ پس یہ (دعا) ان شاء اللہ ہر اِس شخص کو پہنچے گی جو میری امت میں سے مرے اور اللہ کے ساتھ کسی کو شریک نہ بناتا ہو۔

حضرت ابو ہریرہؓ کہتے ہیں رسول اللہﷺ نے فرمایا ہر نبی کی ایک (خاص) مقبول دعا ہوتی ہے وہ یہ دعا کرتا ہے اور اسے قبولیت دی جاتی ہے اور اسے وہ عطاء کیا جاتا ہے اور میں نے اپنی وہ دعا قیامت کے دن اپنی امت کی شفاعت کے لئے محفوظ کر رکھی ہے۔

حضرت ابو ہریرہؓ سے روایت ہے وہ کہتے ہیں کہ رسول اللہ ﷺ نے فرمایا ہر نبی کی ایک (خاص) دعا ہے جو اس نے اپنی امت کے لئے کی اور اسے قبول کر لیا گیا۔ میں نے ارادہ کیا ہے کہ اگر اللہ چاہے میں اپنی اس دعا کو اپنی امت کے لئے بطور شفاعت قیامت کے دن تک مؤخر کر دوں۔