Ahadith

ابو سلمہ بن عبدالرحمان بیان کرتے ہیں کہ حضرت ابو قتادہؓ نے بتایا کہ میں نے رسول اللہﷺ کو فرماتے ہوئے سنا ہے کہ اچھا خواب اللہ کی طرف سے ہے اور بُرا خواب شیطان کی طرف سے ہے اس لئے جب تم میں سے کوئی ایسی بات دیکھے جسے وہ ناپسند کرتا ہے تو اپنے بائیں طرف تین بار تھو تھو کرے اور اس کے شر سے اللہ کی پناہ طلب کرے تو یہ (خواب) اسے نقصان نہیں پہنچائے گا۔ وہ (ابو سلمہ) کہتے ہیں میں ایسا خواب دیکھتا تھا جو مجھ پر پہاڑ سے بھی زیادہ بوجھل ہوتا۔ جب سے میں نے یہ حدیث سنی ہے میں (اب ایسے خواب) کی پرواہ نہیں کرتا۔ ایک اور روایت میں ابو سلمہ کے اس قول کا ذکر نہیں ہے اور ایک روایت میں یہ مزید ہے کہ پھر وہ اپنے پہلو کو جس پر وہ تھا بدل دے۔

حضرت ابو قتادہؓ سے مروی ہے کہ رسول اللہﷺ نے فرمایا اچھا خواب اللہ کی طرف سے ہے اور بُرا خواب شیطان کی طرف سے۔ پس جو شخص خواب دیکھے جسے وہ ناپسند کرتا ہے تو وہ اپنے بائیں تھوتھو کرے اور شیطان کے (شر سے) اللہ تعالیٰ کی پناہ طلب کرے تو وہ (خواب) اُسے نقصان نہیں پہنچائے گا اور وہ یہ (خواب) کسی کو نہ بتائے۔ اور اگر وہ اچھا خواب دیکھے تو خوش ہو اور سوائے اس کے جس سے وہ محبت رکھتا ہو کسی کو نہ بتائے۔

ابو سلمہ سے روایت ہے وہ کہتے ہیں میں رؤیا دیکھا کرتا تھا جو مجھے بیمار کر دیتی تھی۔ وہ کہتے ہیں میں حضرت ابو قتادہؓ سے ملا تو انہوں نے کہا میں (بھی) ایسا خواب دیکھتا جس سے میں بیمار ہو جاتا یہا نتک کہ میں نے رسول اللہﷺ کو یہ فرماتے سنا اچھی رؤیا اللہ کی طرف سے ہے۔ اس لئے جب تم میں سے کوئی (ایسی رؤیا) دیکھے جسے وہ پسند کرتا ہے تو نہ بتائے مگر اس کو جس سے وہ محبت کرتا ہے اور اگر وہ کوئی ایسا (خواب) دیکھے جسے وہ ناپسند کرتا ہے تو وہ تین بار اپنے بائیں تھو تھو کرے اور شیطان کے شر سے اور اس (خواب) کے شر سے اللہ کی پناہ طلب کرے اور یہ (خواب) کسی کے پاس بیان نہ کرے تو وہ (خواب) اسے نقصان نہ دے گا۔

حضرت جابرؓ سے روایت ہے کہ رسول اللہ ﷺ نے فرمایا جب تم میں سے کوئی ایسا خواب دیکھے جسے وہ ناپسند کرتا ہے تو وہ تین دفعہ اپنے بائیں تھوکے اور تین بار شیطان (کے شر) سے اللہ کی پناہ طلب کرے اور جس پہلو پر وہ ہو اس کو بدل دے۔

حضرت ابو ہریرہؓ سے روایت ہے کہ نبیﷺ نے فرمایا جب زمانہ (اپنے اختتام کے) قریب ہوگا تو مسلمان کی رؤیا بالعموم جھوٹی نہ ہوگی اور تم میں سے سب سے سچا خواب اس کا ہوگا جو تم میں سے اپنی گفتار میں سب سے سچا ہوگا اور مسلمان کا خواب نبوت کے پنتالیس اجزاء میں سے ایک جزء ہے اور خواب تین قسم کا ہوتا ہے۔ رؤیا صالحہ اللہ تعالیٰ کی طرف سے خوشخبری ہے اور افسردہ کرنے والا خواب شیطان کی طرف سے ہے اور ایک خواب حدیث النفس ہوتا ہے۔ پس اگر کوئی شخص ایسا خواب دیکھے جسے وہ ناپسند کرتا ہے تو اُسے چاہے کہ وہ اٹھے اور نماز پڑھے اور وہ اِسے (خواب کو) لوگوں کے پاس بیان نہ کرے اور انہوں نے کہا میں بیڑی (دیکھنا) پسند کرتا ہوں اور طوق (دیکھنا) ناپسند کرتا ہوں اور بیڑیوں کی تعبیر دین میں ثابت قدمی ہے۔ راوی کہتے ہیں میں نہیں جانتا کہ یہ حدیث کے الفاظ ہیں یا ابن سیرین کا قول ہے۔ حضرت ابوہریرہؓ نے کہا میں بیڑی (دیکھنا) پسند کرتا ہوں اور طوق (دیکھنا) ناپسند کرتا ہوں۔ اور بیڑیاں (دیکھنے کی) تعبیر دین میں ثابت قدمی ہے اور نبیﷺ نے فرمایا ہے مؤمن کا خواب نبوت کا چھیالیسواں حصہ ہے۔ ایک اور روایت حضرت ابو ہریرہؓ سے اسی طرح مروی ہے لیکن اس میں عَنِ النَّبِیِّﷺ کے الفاظ نہیں ہیں۔ ایک اور روایت میں وَأَکْرَہُ الْغُلَّ۔۔۔ الخ۔ اپنی بات شامل کر دی ہے اور الرُّؤْیَا جُزْءٌ مِنْ سِتَّۃٍ وَأَرْبَعِینَ جُزْءًا مِنَ النُّبُوَّۃِ کے الفاظ نہیں ہیں۔

حضرت عبادہ بن صامتؓ سے روایت ہے وہ کہتے ہیں رسول اللہ ﷺ نے فرمایا مؤمن کا خواب نبوت کا چھیالیسواں حصہ ہے۔

حضرت ابو ہریرہؓ سے روایت ہے وہ کہتے ہیں رسول اللہﷺ نے فرمایا مؤمن کی رؤیا نبوت کے اجزاء میں سے چھیالیسواں جزء ہے۔

حضرت ابو ہریرہؓ سے روایت ہے وہ کہتے ہیں رسول اللہﷺ نے فرمایا ایک مسلمان کی رؤیا جو وہ (اپنے لئے) دیکھتا ہے یا اس کے لئے کسی اور کو دکھائی جاتی ہے نبوت کا چھیالیسواں حصہ ہے۔

حضرت ابو ہریرہؓ سے روایت ہے کہ رسول اللہ ﷺ نے فرمایا نیک شخص کا خواب نبوت کے اجزاء کا چھیالیسواں جزء ہے۔