Showing 10 of 288 hadith
شقیق سے روایت ہے وہ کہتے ہیں کہ حضرت عبد اللہؓ نے کہا کہ ان مصاحف _ بعض دفعہ انہوں نے لفظ قرآن بولا _ کی خوب حفاظت کرو کیونکہ وہ آدمیوں کے سینوں سے ان اونٹوں سے زیادہ تیزی سے نکل جانے والا ہے جو اپنی رسیوں سے نکل جاتے ہیں۔ راوی کہتے ہیں رسول اللہﷺ نے فرمایا تم میں سے کوئی یہ نہ کہے کہ میں فلاں فلاں آیت بھول گیا بلکہ اسے بھلایا گیا ہے۔
حضرت ابن مسعودؓ کہتے ہیں کہ میں نے رسول اللہﷺ کو فرماتے ہوئے سنا کہ کسی شخص کی یہ کتنی بری بات ہے کہ وہ کہے کہ میں فلاں فلاں سورۃ بھول گیا یا فلاں فلاں آیت بھول گیا بلکہ اسے بھلایا گیا۔
حضرت ابو مو سیٰ ؓ نبی ﷺ سے روایت کرتے ہیں آپؐ نے فرمایا کہ اس قرآن (کےحفظ) کا اہتمام کرو۔ اس کی قسم جس کے ہاتھ میں محمد ﷺ کی جان ہے یہ (قرآن) رسیوں میں سے نکلنے والے اونٹوں سے زیادہ تیزی سے نکلنے والا ہے۔
عبداللہ بن بریدہ اپنے والد سے روایت کرتے ہیں انہوں نے کہا کہ رسول اللہﷺ نے فرمایا کہ عبداللہ بن قیس یا اشعری کو آلِ داؤد کے مزامیر میں سے ایک مزمار دیا گیا ہے۔
ابو بردہ حضرت ابو موسیٰؓ کے بارہ میں روایت کرتے ہوئے کہتے ہیں کہ رسول اللہﷺ نے حضرت ابو موسیٰؓ سے فرمایا اگر تم مجھے دیکھ لیتے جب گزشتہ رات میں تمہاری قراءت سن رہا تھا! تمہیں تو آلِ داؤد کے مزامیر میں سے ایک مزمار دیا گیا ہے۔