Ahadith

محمد بن محبوب نے ہم سے بیان کیا کہ ابوعوانہ نے ہمیں بتایا۔ انہوں نے قتادہ سے، قتادہ نے حضرت انسؓ سے روایت کی۔ اور خلیفہ (بن خیاط) نے مجھ سے بیان کیا کہ یزید بن زُرَیع نے ہمیں بتایا۔ سعید نے ہم سے بیان کیا۔ انہوں نے قتادہ سے، قتادہ نے حضرت انس رضی اللہ عنہ سے روایت کی کہ ایک شخص جمعہ کے دن مدینہ میں نبی صلی اللہ علیہ وسلم کے پاس آیا اور آپؐ خطبہ دے رہے تھے۔ اس نے کہا: بارش نہیں ہوتی جس سے قحط پڑ گیا ہے اس لئے اپنے ربّ سے بارش کے لئے دعا مانگیں۔ آپؐ نے آسمان کی طرف دیکھا اور ہم اس وقت کوئی بادل نہیں دیکھتے تھے۔ آپؐ نے بارش کے لئے دعا کی۔ تو ایک کے بعد ایک بادل اٹھنے لگے۔ پھر اُن پر اتنی بارش برسی کہ مدینہ کے نالے بہنے لگے اور آئندہ جمعہ تک بارش ہوتی رہی، ہٹتی نہ تھی۔ پھر وہی شخص یا اس کے علاوہ کوئی اور اُٹھا اور نبی صلی اللہ علیہ وسلم لوگوں سے مخاطب تھے۔ اس نے کہا: ہم تو ڈوب گئے اس لئے اپنے ربّ سے دعا مانگیں کہ وہ ہم سے اس بارش کو روک دے۔ (یہ سن کر) آپؐ ہنس پڑے۔ پھر دعا کی: اے اللہ! (بارش)ہمارے ارد گرد برسے اور ہم پر نہ برسے، دو دفعہ یا تین دفعہ کہا۔ اتنے میں وہ بادل پھٹ کر مدینہ سے دائیں بائیں ہمارے آس پاس برسنے لگے اور مدینہ میں مطلق نہ برستے۔ اللہ ان کو اپنے نبی صلی اللہ علیہ وسلم کی عزت اور آپؐ کی دعا کی قبولیت دکھلا رہا تھا۔

عثمان بن ابی شیبہ نے ہم سے بیان کیا کہ جریر نے ہمیں بتایا۔ انہوں نے منصور سے، منصور نے ابووائل سے، ابووائل نے حضرت عبداللہ (بن مسعود) رضی اللہ عنہ سے، حضرت عبداللہؓ نے نبی صلی اللہ علیہ وسلم سے روایت کی۔ آپؐ نے فرمایا: سچائی نیکی کی طرف رہنمائی کرتی ہے اور نیکی جنت کی رہنمائی کرتی ہے اور آدمی سچ بولتے بولتے صدیق ہوجاتا ہےاور جھوٹ بدکاری کی راہ دکھاتا ہے اور بدکاری دوزخ کی طرف لے جاتی ہے اور آدمی جھوٹ بولتے بولتے آخر اللہ کے نزدیک بڑا جھوٹا لکھ دیا جاتا ہے۔

مسدد نے ہم سے بیان کیا کہ یحيٰ بن سعید نے ہمیں بتایا۔ انہوں نے سفیان (ثوری) سے روایت کی، کہا: اعمش نے مجھ سے بیان کیا۔ انہوں نے سعید بن جبیر سے، سعید نے ابوعبدالرحمٰن سلمی سے، ابوعبدالرحمٰن نے حضرت ابوموسیٰ رضی اللہ عنہ سے، انہوں نے نبی صلی اللہ علیہ وسلم سے روایت کی۔ آپؐ نے فرمایا: اللہ سے بڑھ کر کوئی بُری بات پر جسے اس نے سنا ہو صبر کرنے والا نہیں۔ یہ (بُری بات) کہ وہ کہتے ہیں کہ اس کا ایک بیٹا ہے پھر بھی اس کے باوجود وہ ان کو تندرستی دیتا ہے اور ان کو رزق بھی دیتا ہے۔