Ahadith

عمر بن حفص نے ہم سے بیان کیا کہ میرے باپ نے ہمیں بتایا۔ اعمش نے ہم سے بیان کیا کہ زید بن وہب نے ہمیں بتایا۔ (انہوں نے کہا) کہ اللہ کی قسم حضرت ابوذرؓ نے ہم سے ربزہ میں یہ بیان کیا۔ وہ کہتے تھے: میں عشاء کے وقت نبی صلی اللہ علیہ وسلم کے ساتھ مدینہ کے پتھریلے میدان میں چلاجارہا تھا۔ اتنے میں اُحد کا پہاڑ ہمارے سامنے ہوا تو آپؐ نے فرمایا: ابوذرؓ! میں پسند نہیں کرتا کہ میرے پاس اُحد برابر سونا ہو، مجھ پر ایک رات یا فرمایا:تین رات ایسی گزر جائیں کہ اس میں سے میرے پاس ایک دینار باقی رہے سوائے اس کے کہ جو میں نے قرض کے چکانے کے لئے رکھ چھوڑا ہو۔ میں تو ضرور ہی اس کو اللہ کے بندوں میں اس طرح اس طرح اس طرح تقسیم کر دوں اور حضرت ابوذرؓ نے ہم کو اپنے ہاتھ کے اشارہ سے سمجھایا۔ پھر آپؐ نے فرمایا: ابوذرؓ! میں نے کہا: لَبَّيْكَ وَسَعْدَيْكَ، یا رسول اللہ۔ آپؐ نے فرمایا: جو بہت مال دار ہیں وہی نادار ہوں گے سوائے اُن کے جو یوں اور یوں تقسیم کریں۔ پھر آپؐ نے مجھے فرمایا: ابوذرؓ! تم اپنی جگہ کھڑے رہنا، یہاں سے جانا نہیں جب تک میں لوٹ نہ آؤں۔ آپؐ چلے گئے اور میری نظر سے غائب ہوگئے۔ اتنے میں میں نے ایک آواز سنی اور میں ڈرا کہ کہیں رسول اللہ صلی اللہ علیہ وسلم کو کوئی حادثہ نہ پیش آیا ہو۔میں نے ارادہ کیا کہ جاؤں۔ پھر رسول اللہ صلی اللہ علیہ وسلم کے ارشاد کا خیال کیا کہ یہاں سے جانا نہیں، اس لئے میں ٹھہرا رہا۔ میں نے کہا: یا رسول اللہ! میں نے ایک آواز سنی، میں ڈرا کہ کہیں کوئی حادثہ پیش نہ آیا ہو۔ پھر میں نے آپؐ کے ارشاد کا خیال کیا اور میں کھڑا رہا۔ نبی صلی اللہ علیہ وسلم نے فرمایا: یہ جبریل تھے جو میرے پاس آئے تھے اور انہوں نے مجھے بتایا کہ میری امت میں سے جو ایسی حالت میں فوت ہو جائے کہ وہ کسی چیز کو بھی اللہ کا شریک نہ ٹھہراتا ہوگا وہ جنت میں داخل ہوجائے گا۔ میں نے کہا: یا رسول اللہ! گو اس نے زنا اور چوری بھی کی ہو؟ آپؐ نے فرمایا: گو اس نے زنا بھی کیا ہو اور چوری بھی کی ہو۔ (اعمش کہتے تھے:) میں نے زید سے کہا: مجھے یہ خبر پہنچی ہے کہ یہ راوی حضرت ابودرداءؓ تھے تو انہوں نے کہا: میں یہ گواہی دیتا ہوں کہ حضرت ابوذرؓ نے مجھ سے یہ واقعہ ربزہ میں بیان کیا۔ اعمش نے کہا اور ابوصالح (سمان) نے مجھے حضرت ابودرداءؓ سے روایت کرتے ہوئے اسی طرح کا واقعہ بتایا اور ابوشہاب نے بھی اعمش سے اسے نقل کیا۔ انہوں نے یہ الفاظ کہے کہ میرے پاس تین دن سے زیادہ ٹھہرا رہے۔

حسن بن عمر نے ہم سے بیان کیا کہ معتمر (بن سلیمان) نے ہمیں بتایا۔ (انہوں نے کہا:) میں نے اپنے باپ سے سنا۔ وہ بیان کرتے تھے کہ انہوں نے ابومجلز (لاحق بن حمید) سے روایت کی۔ ابو مجلز نے حضرت انس بن مالک رضی اللہ عنہ سے روایت کی۔ وہ بیان کرتے ہیں: جب رسول اللہ ﷺ نے حضرت زینب بنت جحشؓ سے نکاح کیا تو آپؐ نے لوگوں کو دعوت دی۔ انہوں نے کھانا کھایا اور پھر بیٹھ گئے، لگے باتیں کرنے۔ حضرت انسؓ کہتے تھے کہ آپؐ نے یوں ظاہر کیا کہ گویا کہ اُٹھنے کی تیاری کرتے ہیں مگر وہ نہیں اُٹھے۔ جب آپؐ نے یہ دیکھا تو آپؐ کھڑے ہوگئے۔ جب آپؐ کھڑے ہوگئے تو لوگوں میں سے آپؐ کے ساتھ جو اُٹھ کر چلے گئے چلے گئے اور تین آدمی رہ گئے۔ اور نبی ﷺ اندر جانے کے لئے آئے تو کیا دیکھا کہ وہ لوگ بیٹھے ہوئے ہیں۔ پھر اس کے بعد وہ بھی اُٹھ کر چلے گئے۔ حضرت انسؓ کہتے تھے: میں آیااور میں نے نبی ﷺ کو خبر کر دی کہ وہ اب چلے گئے ہیں۔ تب آپؐ آئے اور اندر گئے۔ میں بھی اندر جانے لگا تو آپؐ نے اپنے اور میرے درمیان پردہ ڈال دیا اور اللہ تعالیٰ نے یہ آیت نازل کی: يٰۤاَيُّهَا الَّذِيْنَ اٰمَنُوْا لَا تَدْخُلُوْا… یعنی اے مومنو! نبی کے گھروں میں سوائے اس کے کہ تمہیں کھانے کے لئے بلایا جائے ہرگز داخل نہ ہوا کرو، وہ بھی اس شرط سے کہ کھانا پکنے کے انتظار میں نہ بیٹھے رہا کرو اور نہ باتیں کرنے کے شوق میں بیٹھے رہا کرو۔ ہاں! جب تم کو بلایا جائے تو پھر ضرور چلے جایا کرو، پھر جب کھانا کھا چکو تو اپنے اپنے گھروں کو چلے جایا کرو۔ یہ امر (یعنی بے فائدہ بیٹھے رہنا یا پہلے آجانا) نبی کو تکلیف دیتا تھا مگر وہ (تمہارے جذبات کا خیال کرکے) تم (کو منع کرنے ) سے حیا کرتا تھا۔ مگر اللہ سچی بات بیان کرنے سے (لوگوں کے خیالات کی وجہ سے) باز نہیں رہتا اور (چاہیئے کہ) جب تم اُن (یعنی نبی کی بیویوں) سے کوئی گھر کی چیز مانگو تو پردہ کے پیچھے سے مانگا کرو، یہ بات تمہارے دلوں اور اُن کے دلوں کے لئے بہت اچھی ہے اور اللہ کے رسول کو تکلیف دینا تمہارے لئے جائز نہیں اور نہ یہ جائز ہے کہ تم اس کے بعد اس کی بیویوں سے کبھی بھی شادی کرو۔ یہ بات اللہ کے فیصلہ کے مطابق بہت بُری ہے۔