Ahadith

ابوالیمان نے ہم سے بیان کیا کہ شعیب بن ابی حمزہ نے ہمیں بتایا۔ ابو زناد نے ہم سے بیان کیا۔انہوں نے اعرج سے، اعرج نے حضرت ابو ہریرہؓ سے روایت کی کہ رسول اللہ صلی اللہ علیہ وسلم نے فرمایا: حضرت ابراہیمؑ نے اسّی سال کے بعد ختنہ کروایا تھا اور تیشے سے ختنہ کروایا تھا۔ (یہ لفظ قَدُوْم ہے دال کی) تخفیف سے۔ ابو عبداللہ (امام بخاریؒ) نے کہا: قتیبہ نے ہم سے بیان کیا کہ مغیرہ (بن عبدالرحمٰن) نے ہمیں بتایا۔ انہوں نے ابوزناد سے روایت کی اور انہوں نے کہا: یہ لفظ قَدُّوْم ہے تشدید کے ساتھ اور یہ ایک جگہ ہے۔

محمد بن عبدالرحیم نے ہم سے بیان کیا کہ عباد بن موسیٰ نے ہمیں بتایا۔ اسماعیل بن جعفر نے ہم سے بیان کیا۔ انہوں نے اسرائیل سے، اسرائیل نے ابواسحاق (سبیعی) سے، ابواسحاق نے سعید بن جبیر سے روایت کی۔ انہوں نے کہا: حضرت ابن عباسؓ سے پوچھا گیا: آپؓ کس عمر کے تھے جب نبی صلی اللہ علیہ وسلم کی وفات ہوئی؟ تو انہوں نے کہا: میں ان دنوں ختنہ شدہ تھا۔ (ابواسحاق نے) کہا: اور وہ آدمی کا ختنہ نہیں کیا کرتے تھے جب تک کہ وہ بالغ نہ ہوجاتا۔

یحيٰ بن بکیر نے ہم سے بیان کیا کہ لیث (بن سعد) نے ہمیں بتایا۔ انہوں نے عقیل سے، عقیل نے ابن شہاب سے روایت کی۔ انہوں نے کہا: حمید بن عبدالرحمٰن نے مجھے خبر دی کہ حضرت ابوہریرہؓ نے کہا: رسول اللہ صلی اللہ علیہ وسلم نے فرمایا: تم میں سے جو کوئی قسم کھائے اور اپنی قسم میں لات اور عزیٰ کا نام لے تو وہ لَا إِلَهَ إِلَّا اللهُ کا اقرار کرے اور جس نے اپنے ساتھی سے کہا: آؤ میں تم سے جوا کھیلوں تو وہ صدقہ دے۔

علی بن عبداللہ نے ہم سے بیان کیا کہ سفیان (بن عیینہ) نے ہمیں بتایا کہ عمرو (بن دینار) نے کہا: حضرت ابن عمرؓ کہتے تھے: اللہ کی قسم جب سے نبی صلی اللہ علیہ وسلم کی وفات ہوئی میں نے اینٹ پر اینٹ نہیں رکھی اور نہ ہی کھجور کا کوئی درخت لگایا۔ سفیان نے کہا: میں نے ان کے گھر والوں میں سے کسی سے اس کا ذکر کیا تو اس نے کہا: اللہ کی قسم انہوں نے گھر بنایا تھا۔ سفیان کہتے تھے: میں نے کہا: شاید انہوں نے گھر بنوانے سے پہلے کہا ہو۔