Ahadith

سلیمان بن حرب نے ہم سے بیان کیا کہ حماد بن زید نے ہمیں بتایا۔ انہوں نے یحيٰ بن سعید سے، یحيٰ نے عبید بن حنین سے، عبید نے حضرت ابن عباس رضی اللہ عنہما سے روایت کی انہوں نے کہا: میں ایک برس تک انتظار کرتا رہا اور میں یہ چاہتا تھا کہ حضرت عمرؓ سے ان دو عورتوں کے متعلق پوچھوں، جنہوں نے نبی صلی اللہ علیہ وسلم کے برخلاف آپس میں ایکا کیا تھا مگر میں اُن سے ڈرتا رہا۔ ایک دن وہ ایک پڑاؤ میں اترے اور پیلو کے جھنڈ میں گئے۔ جب وہاں سے باہر آئے تو میں نے ان سے پوچھا۔ انہوں نے کہا: عائشہؓ اور حفصہؓ تھیں۔ پھر کہنے لگے:ہم زمانہ جاہلیت میں عورتوں کو کسی شمار میں بھی نہ سمجھتے تھے ۔ جب اسلام آیا اور اللہ نے ان کا ذکر کیا، تو ہم اس وجہ سے ان کا اپنے ذمے حق سمجھنے لگے بغیر اس کے کہ انہیں اپنے معاملات میں سے کسی میں دخل دینے دیں اور میرے اور میری بیوی کے درمیان جو گفتگو ہوئی تو اس نے مجھ سے سخت کلامی کی۔ میں نے اس سے کہا: اچھا تم اس حد تک پہنچ گئی ہو ۔ وہ کہنے لگی: تم مجھے یہ کہتے ہو اور تمہاری بیٹی تو نبی صلی اللہ علیہ وسلم کو تنگ کرتی رہتی ہے۔ یہ سن کر میں حفصہؓ کے پاس آیا اور میں نے اس سے کہا: میں تمہیں تنبیہ کرتا ہوں کہ اللہ اور اس کے رسول کی نافرمانی نہ کرنا پھر آپؐ کی تکلیف کے متعلق سن کر میں نے پہلے اس (حفصہؓ)کے پاس جاکر کہا۔ پھر میں اُم سلمہؓ کے پاس آیا اور ان سے کہا۔ وہ کہنے لگیں: عمر ؓ! میں تم پر حیران ہوں کہ تم اب ہمارے معاملات میں بھی دخل دینے لگ گئے ہو۔ اب یہی باقی رہ گیا تھا کہ تم رسول اللہ ﷺ اور ان کی ازواج کے درمیان بھی مداخلت کرو۔ انہوں نے بار بار یہی فقرہ دہرایا اور انصار میں سے ایک شخص تھا کہ جب وہ رسول اللہ صلی اللہ علیہ وسلم سے غیر حاضر ہوتا اور میں آپؐ کے پاس موجود ہوتا تو میں اس کے پاس وہ خبریں لاتا جو ہوتیں اور جب میں رسول اللہ صلی اللہ علیہ وسلم سے غیر حاضر ہوتا اور وہ موجود ہوتا تو میرے پاس وہ خبریں لاتا جو رسول اللہ صلی اللہ علیہ وسلم کے متعلق ہوتیں اور رسول اللہ صلی اللہ علیہ وسلم سے ارد گر د جتنے قبائل تھے وہ سب آپؐ کے لئے سیدھے ہوگئے اور کوئی باقی نہ رہا مگر غسان کا بادشاہ جو شام میں تھا۔ ہم ڈرتے تھے کہیں وہ ہم پر حملہ نہ کردے۔ یکایک مجھے معلوم ہوا کہ وہ انصاری ہے اور وہ کہہ رہا ہے کہ ایک بہت بڑا واقعہ ہوا ہے ۔ میں نے اس سے پوچھا: وہ کیا ہے غسانی آن پہنچے؟ کہنے لگا: اس سے بھی بڑھ کر۔ رسول اللہ صلی اللہ علیہ وسلم نے اپنی ازواج کو طلاق دے دی۔ میں آیا تو کیا ہے کہ ان کے حجروں سے رونے کی آواز آرہی ہے اور کیا دیکھتا ہوں کہ نبی صلی اللہ علیہ وسلم اپنے ایک بالا خانے میں اوپر تشریف لے گئے ہیں اور اس بالا خانے کے دروازے پر ایک غلام ہے ۔ میں اس کے پاس آیا۔ میں نے کہا: میرے لئے اجازت مانگو۔ اس نے میرے لیے اجازت مانگی تو میں اندر گیا۔ میں نے دیکھا نبی صلی اللہ علیہ وسلم ایک بوریئے پر (لیٹے) ہیں اس نے آپؐ کے نشان ڈال دئیے ہیں اور آپؐ کے سر کے نیچے ایک چمڑے کا تکیہ ہے جس میں کھجور کی چھال بھری ہوئی ہے اور کیا دیکھتا ہوں کہ چند کچی کھالیں لٹک رہی ہیں اور کیکر کے کچھ پتے ہیں ۔ میں نے جو حفصہؓ اور امّ سلمہؓ سے کہا تھا اور جو امّ سلمہؓ نے مجھے جواب دیا اس کا ذکر کیا۔ رسول اللہ صلی اللہ علیہ وسلم سن کر ہنس پڑے ۔ آپؐ انتیس راتیں وہاں رہے پھر اس کے بعد اترے۔

مسدد نے ہم سے بیان کیا کہ عبدالوارث (بن سعید) نے ہمیں بتایا۔ انہوں نے عبدالعزیز سے، عبدالعزیز نے حضرت انسؓ سے روایت کی۔ انہوں نے کہا: نبی صلی اللہ علیہ وسلم نے منع فرمایا ہے کہ مرد زعفرانی رنگ استعمال کرے۔

ابونعیم نے ہم سے بیان کیا کہ سفیان (بن عیینہ) نے ہمیں بتایا۔ انہوں نے عبداللہ بن دینار سے، عبداللہ نے حضرت ابن عمر رضی اللہ عنہما سے روایت کی۔ انہوں نے کہا کہ نبی صلی اللہ علیہ وسلم نے منع فرمایا کہ محرم ایسا کپڑا پہنے جو ورس یا زعفران سے رنگا ہوا ہو۔

ابوالولید نے ہم سے بیان کیا کہ شعبہ نے ہمیں بتایا۔ انہوں نے ابواسحاق سے روایت کی۔ ابواسحاق نے حضرت براء (بن عازب) رضی اللہ عنہ سے سنا وہ کہتے تھے: نبی صلی اللہ علیہ وسلم میانہ قامت تھے اور میں نے آپؐ کو سرخ جوڑا پہنے ہوئے دیکھا میں نے آپؐ سے زیادہ حسین کسی کو نہیں دیکھا۔

قبیصہ (بن عقبہ) نے ہم سے بیان کیا کہ سفیان (بن عیینہ) نے ہمیں بتایا۔ انہوں نے اشعس (بن ابی شعثاء) سے، اشعس نے معاویہ بن سوید بن مقرن سے ،معاویہ نےحضرت براء رضی اللہ عنہ سے روایت کی۔ انہوں نے کہا: نبی صلی اللہ علیہ وسلم نے ہمیں سات باتوں کا حکم دیا۔ بیمار کی عیادت کرنا اور جنازوں کے ساتھ جانااور چھینکنے والے کو دعا سے جواب دینا، اور ہمیں ریشمی کپڑا اور دیباج اور قسی اور استبرق اور سرخ زین پوشوں کے استعمال سے منع فرمایا۔

سلیمان بن حرب نے ہم سے بیان کیا کہ حماد بن زید نے ہمیں بتایا۔ انہوں نے سعید ابومسلمہ سے روایت کی۔ انہوں نے کہا: میں نے حضرت انسؓ سے پوچھا: کیا نبی صلی اللہ علیہ وسلم اپنی جوتیوں سمیت نماز پڑھ لیا کرتے تھے؟ انہوں نے کہا: ہاں۔

عبداللہ بن یوسف نے ہم سے بیان کیا کہ مالک نے ہمیں بتایا۔ انہوں نے عبداللہ بن دینار سے، عبداللہ نے حضرت عبد اللہ بن عمر رضی اللہ عنہما سے روایت کی۔ انہوں نے کہا: رسول اللہ صلی اللہ علیہ وسلم نے منع فرمایا ہے کہ مُحرم ایسا کپڑا پہنے جو زعفران یا ورس سے رنگا ہوا ہو اور آپؐ نے فرمایا: جس کو جوتیاں میسر نہ ہوں وہ موزے ہی پہن لے اور وہ انہیں ٹخنوں کے نیچے تک کاٹ لے۔