Ahadith

یحيٰ بن بکیر نے ہم سے بیان کیا کہ لیث (بن سعد) نے ہمیں بتایا۔ انہوں نے عقیل سے، عقیل نے ابن شہاب سے روایت کی انہوں نے کہا کہ مجھے ابوسلمہ اور سعید بن مسیب نے بتایا کہ حضرت ابوہریرہ رضی اللہ عنہ نے ان دونوں کو بتایا کہ انہوں نے رسول اللہ صلی اللہ علیہ وسلم سے سنا آپؐ فرماتے تھے کہ کلونجی میں ہر بیماری کا علاج ہے سوائے سام کے۔ابن شہاب نے کہا اور سام کے معنی موت ہیں اور کالے دانے سے مراد شونیز (یعنی کلونجی) ہے۔

فروہ بن ابی المغراء نے ہم سے بیان کیا کہ علی بن مسہر نے ہمیں بتایا۔ انہوں نے ہشام (بن عروہ) سے، ہشام نے اپنے باپ سے، ان کے باپ نے حضرت عائشہؓ سے روایت کی کہ وہ تلبینہ کھلانے کا مشورہ دیتی تھیں اور فرماتی تھیں کہ وہ (بیمار کو) ناپسند ہوتا ہے اور فائدہ دیتا ہے۔

معلی بن اسد نے ہم سے بیان کیا کہ وہیب (بن خالد) نے ہمیں بتایا۔ انہوں نے (عبداللہ) بن طاؤس سے، عبداللہ نے اپنے باپ سے،ان کے باپ نے حضرت ابن عباس رضی اللہ عنہما سے روایت کی کہ نبی صلی اللہ علیہ وسلم نے پچھنے لگوائے اور حجام کو اس کی مزدوری دی اور ناک میں دوائی ڈالی۔

اور میں نبی صلی اللہ علیہ وسلم کے پاس اپنے ایک بیٹے کو لے کر گئی جو ابھی کھانا نہیں کھاتا تھا اس نے آپؐ پر پیشاب کر دیا۔ آپؐ نے پانی منگوایا اور اس کو کپڑے پر چھڑک دیا۔

ابو معمر(عبداللہ بن عمرو مقعد) نے ہمیں بتایا کہ ہم سے عبدالوارث (بن سعید) نے بیان کیا کہ ایوب نے ہمیں بتایا ۔ ایوب نے عکرمہ سے، عکرمہ نے حضرت ابن عباسؓ سے روایت کرتے ہوئے بتایا کہ نبی صلی اللہ علیہ وسلم نے پچھنے لگوائے اور آپ روزہ دار تھے۔

مسدد نے ہم سے بیان کیا کہ سفیان (بن عیینہ) نے ہمیں بتایا۔ انہوں نے عمرو (بن دینار) سے، عمرو نے طاؤس اور عطاء (بن ابی رباح) سے، ان دونوں نے حضرت ابن عباسؓ سے روایت کی۔انہوں نے کہا: نبی صلی اللہ علیہ وسلم نے پچھنے لگوائے اور آپؐ احرام باندھے ہوئے تھے۔

اسماعیل( بن ابی اویس) نے ہم سے بیان کیا کہ مجھے سلیمان (بن بلال) نے بتایا۔ انہوں نے علقمہ سے روایت کی کہ انہوں نے عبدالرحمٰن اعرج سے سنا (وہ کہتے تھے )کہ انہوں نے حضرت عبداللہ بن بحینہؓ سے سنا وہ بیان کرتے تھے کہ رسول اللہ صلی اللہ علیہ وسلم نے لحيُ جمل میں جو مکہ کے راستے پر ہے اپنے سر کے درمیان پچھنے لگوائے اور آپؐ اس وقت احرام باندھے تھے۔