Ahadith

عبداللہ بن یوسف (تنیسی) نے ہم سے بیان کیا کہ مالک نے ہمیں خبر دی۔ انہوں نے ابن شہاب سے، ابن شہاب نے عبداللہ بن عامر سے روایت کی کہ حضرت عمرؓ شام کی طرف روانہ ہوئے۔ جب سرغ میں پہنچے تو ان کو یہ معلوم ہوا کہ وبا شام میں پڑی ہوئی ہے اور حضرت عبدالرحمٰن بن عوفؓ نے ان کو بتایا کہ رسول اللہ ﷺ نے فرمایا: جب تم سنو کہ یہ کسی ملک میں ہے تو پھر وہاں نہ جاؤ اور اگر یہ کسی ایسے ملک میں پڑے اور تم وہاں ہو تو پھر اس سے بھاگ کر وہاں سے نہ نکلو۔

اسحاق (بن راہویہ) نے ہم سے بیان کیا کہ حبان (بن ہلال) نے ہمیں خبر دی۔ داؤد بن ابی فرات نے ہم سے بیان کیا۔ عبداللہ بن بریدہ نے ہمیں بتایا، اُنہوں نے یحيٰ بن یعمر سے، یحيٰ نے حضرت عائشہ نبی صلی اللہ علیہ وسلم کی زوجہ سے روایت کی انہوں نے انہیں خبر دی کہ انہوں نے رسول اللہ صلی اللہ علیہ وسلم سے طاعون کے متعلق پوچھا تو نبی اللہ صلی اللہ علیہ وسلم نے ان کو بتایا کہ یہ ایک عذاب ہے جو اللہ جس پر چاہتا ہے بھیجتا ہے لیکن اللہ نے اس کو مؤمنوں کے لئے رحمت کا موجب بنایا ہے۔ کوئی بھی ایسا بندہ نہیں جس کو طاعون ہو اور وہ اپنے شہر میں ہی صبر سے ٹھہرا رہے۔ اسے یہ یقین ہو کہ اسے کوئی تکلیف نہیں پہنچے گی مگر وہی جو اللہ نے اس کے لئے مقدرکر دی تو ضرور اس کو اتنا ثواب ملے گا جتنا کہ ایک شہید کو ثواب ملتا ہے۔ (حبان بن ہلال کی طرح) نضر (بن شمیل) نے بھی داؤد سے اس حدیث کو روایت کیا۔

ابراہیم بن موسیٰ نے مجھ سے بیان کیا کہ ہشام (بن یوسف)نے ہمیں خبر دی۔ انہوں نے معمر سے، معمر نے زہری سے، زہری نے عروہ سے، عروہ نے حضرت عائشہ رضی اللہ عنہا سے روایت کی کہ نبی صلی اللہ علیہ وسلم اس بیماری میں جس میں آپ فوت ہوگئے تھے اپنے اوپر معوذات پڑھ کر پھونکتے تھے۔ جب آپؐ کی صحت کمزور ہو گئی تو میں آپؐ پر ان سورتوں کو پڑھ کر پھونکتی تھی اور آپؐ کا ہی ہاتھ آپؐ کے جسم پر پھیرتی تاکہ اس کی برکت ہو۔ (معمر کہتے تھے۔) میں نے زہری سے پوچھا۔ آپ کیوں کر پھونکتے تھے انہوں نے کہا آپ اپنے ہاتھوں پر پھونکتے تھے پھر اپنے دونوں ہاتھ چہرے پر پھیرتے تھے۔

محمد بن بشار نے مجھے بتایا کہ غندر نے ہم سے بیا ن کیا کہ شعبہ نے ہمیں بتایا، شعبہ نے ابوبشر سے، ابوبشر نے ابوالمتوکل سے، ابوالمتوکل نے حضرت ابوسعید خدری رضی اللہ عنہ سے روایت کی کہ نبی صلی اللہ علیہ وسلم کے صحابہؓ میں سے کچھ لوگ عرب کے قبائل میں سے ایک قبیلے کے پاس پہنچے تو انہوں نے ان کو مہمان نہیں ٹھہرایا۔ ابھی وہ اس حالت میں تھے کہ اتنے میں ان کے سردار کو بچھونے ڈسا۔اُن لوگوں نے پوچھا کیا تمہارے ساتھ کوئی دَم دوا کرنے والا ہے؟ صحابہؓ نے کہا تم نے ہمیں مہمان نہیں ٹھہرایا اور ہم بھی اس وقت تک کوئی دَم دعا نہیں کریں گے جب تک ہمارے لیے اجرت طے نہ کر لو ۔ انہوں نے ان کے لئے کچھ بکریاں مقرر کیں اور ایک صحابی سورة فاتحہ پڑھنے لگا اور اپنا تھوک اکٹھا کرتا اور اس پر لعاب لگاتا وہ اچھا ہو گیا اور وہ بکریاں لائے۔ صحابہؓ کہنے لگے: ہم یہ بکریاں نہیں لیں گے جب تک کہ نبی صلی اللہ علیہ وسلم سے پوچھ نہ لیں۔ انہوں نے آپؐ سے پوچھا۔ آپؐ ہنس پڑے اور فرمایا: تمہیں کیا پتہ کہ سورة فاتحہ بھی ایک دَم ہے ؟ انہیں لے لو اور میرا بھی ایک حصہ نکالو۔

سیدان بن مضارب ابومحمد باہلی نے ہم سے بیان کیا کہ ابومعشر بصری نے جو کہ بڑے سچے تھے، ان کا نام یوسف بن یزید البراء تھا ہمیں بتایا۔ انہوں نےکہا عبیداللہ بن ا خنس ابومالک نے مجھ سے بیان کیا۔ عبیداللہ نے ابن ابی ملیکہ سے، انہوں نے حضرت ابن عباسؓ سے روایت کی کہ نبی صلی اللہ علیہ وسلم کے صحابہ میں سے چند لوگ ایک چشمہ پر سے گزرے۔ (وہاں جو قبیلہ تھا) ان میں ایک کو بچھونے کا ٹ کھایا تھا۔ (لدیغ کا لفظ کہا یا سلیم) تو ان چشمے والوں میں سے ایک شخص ان کے سامنے آیا اور کہنے لگا: کیا تم میں کوئی دَم کرنے والا ہے؟ اس چشمے پر ایک شخص ہے جسے بچھو نے ڈسا ہے۔(لدیغ کا لفظ کہا یا سلیم) یہ سن کر صحابہ میں سے ایک شخص چلا گیا۔ اس نے چند بکریاں دینے کی شرط پر سورة فاتحہ کو پڑھا اور وہ اچھا ہو گیا اور وہ بکریاں اپنے ساتھیوں کے پاس لے آیا۔ انہوں نے اسے ناپسند کیا اور کہنے لگے: تم نے اللہ کی کتاب پر اجرت لی ہے۔ جب وہ مدینہ میں پہنچے تو کہنے لگے: یا رسول اللہ ! اس نے اللہ کی کتاب پر اجرت لی ہے۔ رسول اللہ صلی اللہ علیہ وسلم نے فرمایا: جن چیزوں کا تم معاوضہ لیتے ہو ان سب سے بڑا حق تو اللہ کی کتاب کا ہے۔