Ahadith

مسد دنے ہم سے بیان کیا کہ یحيٰ (بن سعید قطان) نے ہمیں بتایا۔ انہوں نے شعبہ سے، شعبہ نے قتادہ سے، قتادہ نے حضرت انس بن مالکؓ سے، حضرت انسؓ نے حضرت ابوموسیٰ (اشعریؓ) سے،حضرت ابوموسیٰؓ نے نبی صلی اللہ علیہ وسلم سے روایت کی۔ آپؐ نے فرمایا:وہ مومن جو قرآن پڑھتا ہے اور اس پر عمل کرتا ہے وہ ترنج (نارنگی) کی طرح ہے جس کا مزہ بھی اچھا ہے اور بو بھی اچھی ہے۔ اور وہ مومن جو قرآن نہیں پڑھتا اور اس پر عمل کرتا ہے کھجور کی طرح ہے جس کا مزہ اچھا ہے اس کی مطلق بو نہیں۔ اور منافق کی مثال جو قرآن پڑھتا ہے نیاز بو کی طرح ہے جس کی خوشبو اچھی ہے اور اس کا مزہ کڑوا ہوتا ہے۔ اور منافق کی مثال جو قرآن نہیں پڑھتا حنظل کی طرح ہے جس کا مزہ بھی کڑوا، یا (فرمایا) بُرا اور بو بھی کڑوی۔

عمرو بن علی (فلاس) نے ہم سے بیان کیا کہ عبدالرحمٰن بن مہدی نے ہمیں بتایا۔ سلام بن ابی مطیع نے ہم سے بیان کیا۔ سلام نے ابوعمران جونی سے، ابوعمران نے حضرت جندب (بن عبداللہؓ) سے روایت کی۔ (انہوں نے کہا:) نبی صلی اللہ علیہ وسلم نے فرمایا: قرآن پڑھتے رہو جب تک کہ تمہارے دل لگے رہیں۔ جب تم اُچاٹ ہونے لگو تو پھر اٹھ کھڑے ہو۔ (سلام کی طرح) حارث بن عبید اور سعید بن زیدنے بھی ابوعمران (جونی) سے اس حدیث کو روایت کیا۔ اور حماد بن سلمہ اور ابان نے اس کو مرفوعاً بیان نہیں کیا۔ اور غندر (محمد بن جعفر) نے بھی اسے بیان کیا۔ انہوں نے شعبہ سے، شعبہ نے ابوعمران سے روایت کی۔ (انہوں نے کہا:) میں نے حضرت جندبؓ سے ان کا یہی قول سنا۔ اور (عبداللہ) بن عون نے ابوعمران سے، ابوعمران نے عبداللہ بن صامت سے، عبداللہ نے حضرت عمرؓ سے ان کا یہی قول بیان کیا۔ اور حضرت جندبؓ کی روایت زیادہ صحیح اور زیادہ مشہور ہے۔

سلیمان بن حرب نے ہم سے بیان کیا کہ شعبہ نے ہمیں بتایا۔ انہوں نے عبدالملک بن میسرہ سے، عبدالملک نے نزال بن سبرہ سے، نزال نے حضرت عبداللہ (بن مسعودؓ) سے روایت کی۔ انہوں نے ایک شخص کو ایک آیت اس طرح پڑھتے ہوئے سنا کہ جس کے خلاف انہوں نے نبی صلی اللہ علیہ وسلم کو پڑھتے ہوئے سنا تھا۔ (انہوں نے کہا:)میں نے ان کا ہاتھ پکڑا اور ان کو نبی صلی اللہ علیہ وسلم کے پاس لے گیا۔ آپؐ نے فرمایا: تم دونوں اچھی طرح پڑھتے ہو۔ (شعبہ نے کہا:) میرا غالب علم یہ ہے کہ آپؐ نے فرمایا: کیونکہ تم سے پہلے جو تھے انہوں نے آپس میں اختلاف کیااور اس نے ان کو ہلاک کردیا۔