Ahadith

سعید بن عُفَیر نے ہم سے بیان کیا۔ انہوں نے کہا کہ لیث نے مجھے بتایا۔ انہوں نے کہا: عبدالرحمن بن خالد نے مجھ سے بیان کیا کہ ابن شہاب سے مروی ہے۔ انہوں نے علی بن حسین (زین العابدین) سے روایت کی کہ نبی صلی اللہ علیہ وسلم کی زوجہ حضرت صفیہؓ نے انہیں خبردی کہ وہ رسول اللہ صلی اللہ علیہ وسلم کے پاس آپؐ سے ملاقات کرنے کے لئے آئیں جبکہ آپؐ رمضان کے آخری عشرہ میں مسجد میں معتکف تھے۔ پھر وہ واپس جانے کے لئے اُٹھیں تو رسول اللہ صلی اللہ علیہ وسلم بھی ان کے ساتھ اُٹھے۔ یہاں تک کہ جب آپؐ مسجد کے اس دروازے کے قریب پہنچے جو نبی صلی اللہ علیہ وسلم کی زوجہ حضرت امّ سلمہؓ کے دروازے کے پاس تھا تو انصار میں سے دو شخص (اُسَید بن حُضَیر اور عبادبن بشر) وہاں سے گزرے اور رسول اللہ صلی اللہ علیہ وسلم کو السلام علیکم کہا۔ پھر جلدی سے آگے نکل گئے۔ تو رسول اللہ صلی اللہ علیہ وسلم نے ان دونوں سے فرمایا: ٹھہرو۔ تو دونوں نے کہا: سبحان اللہ یارسول اللہ۔ اور ان دونوں پر یہ بات شاق گزری (کہ رسول اللہ ﷺ کے متعلق کوئی گمان کریں کہ وہ غیر محرم کے ساتھ ہوں) تو رسول اللہ صلی اللہ علیہ وسلم نے فرمایا: شیطان انسان کے اندر وہاں تک پہنچتا ہے جہاں تک خون پہنچتا ہے اور مجھے اندیشہ ہوا کہ مبادا تمہارے دل میں کوئی وسوسہ ڈال دے۔

ابراہیم بن منذر نے ہم سے بیان کیا کہ انس بن عیاض نے ہمیں بتایا۔ ہشام سے مروی ہے۔ انہوں نے اپنے باپ سے روایت کی کہ حضرت عائشہ رضی اللہ عنہا نے کہا کہ رسول اللہ صلی اللہ علیہ وسلم عصر کی نماز ایسے وقت میں پڑھتے تھے جبکہ سورج ابھی ان کے حجرہ سے باہر نہ نکلا ہوتا۔

موسیٰ بن اسماعیل نے ہم سے بیان کیا کہ جویریہ نے ہمیں بتایا۔ نافع سے مروی ہے۔ انہوں نے حضرت عبداللہ (بن عمر) رضی اللہ عنہ سے روایت کی کہ انہوں نے کہا: نبی صلی اللہ علیہ وسلم خطبہ کے لئے کھڑے ہوئے او رحضرت عائشہؓ کے مکان کی طرف اشارہ فرمایا اور تین بار فرمایا کہ فتنہ ادھر سے ہوگا جہاں سے شیطانی لوگوں کا خروج ہوگا۔

محمد بن عبداللہ انصاری نے ہم سے بیان کیا، کہا: میرے باپ (عبداللہ) نے مجھ سے بیان کیا کہ ثمامہ سے مروی ہے کہ حضرت انسؓ نے ہم سے بیان کیا کہ حضرت ابوبکر رضی اللہ عنہ جب خلیفہ ہوئے تو انہوں نے بحرین کی طرف انہیں زکوٰۃ وصول کرنے کے لئے بھیجا اور انہیں پروانہ لکھ کردیا اور اس پر نبی صلی اللہ علیہ وسلم کی مہرلگائی۔ مہر کا نقش تین سطروں میں تھا۔ محمد ایک سطر میں، رسول دوسری سطر میں اور اللہ تیسری سطر میں۔

عبداللہ بن محمد (مسندی) نے ہم سے بیان کیا کہ محمد بن عبداللہ اسدی نے ہمیں بتایا۔ (کہا) کہ عیسیٰ بن طہمان نے ہم سے بیان کیا، کہا: حضرت انسؓ ہمارے پاس دو پرانی جوتیاں نکال کر لائے۔ جن کے دوتسمے تھے اور پھر ثابت بنانی نے بعد میں مجھے بتایا کہ حضرت انسؓ سے روایت ہے کہ وہ جوتیاں نبی صلی اللہ علیہ وسلم کی ہیں۔

عبدان نے ہم سے بیان کیا کہ ابوحمزہ سے مروی ہے۔ انہوں نے عاصم سے روایت کی کہ ابن سیرین سے مروی ہے کہ انہوں نے حضرت انس بن مالک رضی اللہ عنہ سے روایت کی کہ نبی صلی اللہ علیہ وسلم کاپانی پینے کا پیالہ ٹوٹ گیا تو آپؐ نے جہاں سے ٹوٹا تھا وہاں چاندی کی ایک زنجیر سے اسے جوڑدیا۔ عاصم نے کہا: میں نے وہ پیالہ دیکھا ہے اور اس میں پانی پیا ہے۔ طرفہُ: ۵۶۳۸۔