Ahadith

احمد بن مقدام نے مجھ سے بیان کیا کہ فضیل بن سلیمان نے ہم سے بیان کیا۔ موسیٰ بن عقبہ نے ہمیں بتایا۔ انہوں نے کہا: نافع نے مجھے بتایا۔ حضرت ابن عمر رضی اللہ عنہما سے روایت ہے کہ حضرت عمر بن خطابؓ نے یہودیوں اور عیسائیوں کو حجاز کے ملک سے جلاوطن کردیا تھا اور رسول اللہ صلی اللہ علیہ وسلم نے بھی جب آپؐ اہل خیبر پر غالب آئے، ارادہ فرمایا تھا کہ یہودیوں کو وہاں سے نکال دیں اور جب آپؐ غالب آئے تو ان اراضی میں سے کچھ یہودیوں کیلئے رہیں اور کچھ رسول اللہ صلی اللہ علیہ وسلم کیلئے اور کچھ مسلمانوں کے لئے۔ اور یہودیوں نے رسول اللہ صلی اللہ علیہ وسلم سے درخواست کی کہ زمین انہی کے قبضہ میں رہنے دیں، اس شرط پر کہ محنت وہ کریں گے اور آدھی پیداوار ان کی ہوگی (اور آدھی مسلمانوں کی۔) رسول اللہ ﷺ نے فرمایا: جب تک ہم چاہیں گے اس شرط پر رہنے ٭دیں گے۔ چنانچہ وہ اس شرط پر ٹھہرے رہے یہاں تک کہ حضرت عمرؓ نے اپنی خلافت کے زمانے میں انہیں تیماء یا اَریحاء کی طرف نکال دیا۔

موسیٰ بن اسماعیل نے ہم سے بیان کیا، کہا: عبدالواحد نے ہمیں بتایا کہ شیبانی نے ہم سے بیان کیا۔ انہوں نے کہا: میں نے حضرت ابن ابی اوفی ٰ رضی اللہ عنہما سے سنا۔ وہ کہتے تھے: غزوئہ خیبر کی راتوں میں ہم بھوکے رہتے تھے۔ جب خیبر کی لڑائی ہوئی تو ہم پالتو گدھوں پر لپکے اور انہیں ذبح کیا۔ جب ہانڈیاں اُبل رہی تھیں تو رسول اللہ صلی اللہ علیہ وسلم کے منادی نے آوازدی: ہانڈیاں اُلٹ دو اور گدھوں کے گوشت میں سے کچھ نہ کھائو۔ حضرت عبداللہ (بن ابی اوفیؓ) کہتے تھے: ہم کہنے لگے کہ نبی صلی اللہ علیہ وسلم نے صرف اس لئے منع فرمایا ہے کہ ان کا پانچواں حصہ نہیں نکالا گیا تھا۔ (شیبانی نے) کہا: اور بعض نے کہا: آپؐ نے اس کو قطعاً حرام قرار دیا ہے۔ سعید بن جبیر سے میں نے پوچھا تو انہوں نے کہا: آپؐ نے ان کو قطعی حرام قرار دیا تھا۔