Ahadith

حسن بن عبدالعزیز نے ہم سے بیان کیا کہ عبداللہ بن یحيٰ نے ہمیں بتایا کہ حیوہ (بن شریح) نے ہمیں خبر دی۔ حیوہ نے ابوالاسود (محمد بن عبدالرحمٰن) سے روایت کی۔ انہوں نے عروہ سے سنا۔ عروہ نے حضرت عائشہ رضی اللہ عنہا سے روایت کی کہ نبی ﷺ رات کو (نماز میں) اتنا کھڑا رہتے تھے کہ آپؐ کے پاؤں پھٹ جاتے۔ یہ دیکھ کر حضرت عائشہؓ نے کہا: یا رسول اللہ! آپؐ ایسا کیوں کرتے ہیں۔ حالانکہ اللہ نے آپؐ کو پہلے بھی گناہوں سے محفوظ؂ رکھا ہے اور بعد میں بھی۔ آپؐ نے فرمایا: کیا مجھے پسند نہیں کہ شکر گزار بندہ ہو جاؤں۔ جب آپؐ کا جسم فربہ ہوا تو آپؐ بیٹھ کر نماز پڑھتے۔ جب رکوع کرنا چاہتے اٹھ کھڑے ہوتے اور کچھ (قرآن مجید) پڑھ کر رکوع کرتے۔

عبداللہ بن مسلمہ نے ہم سے بیان کیا کہ عبدالعزیز بن ابی سلمہ نے ہمیں بتایا۔ انہوں نے ہلال بن ابی ہلال سے، ہلال نے عطاء بن یسار سے، عطاء نے حضرت عبداللہ بن عمرو بن عاص رضی اللہ عنہما سے روایت کی کہ یہ آیت جو قرآن مجید میں ہے، یعنی اے نبی! ہم نے تجھے (اپنی صفات کے لیے) گواہ اور (مومنوں کے لیے) بشارت دینے والا اور (کافروں کے لیے) ہوشیار کرنے والا بنا کر بھیجا ہے۔ انہوں نے کہا: (یہ) تورات میں یوں ہے: اے وہ نبی! ہم نے تمہیں اَن پڑھ لوگوں کے لئے بطور ایک شاہد اور خوشخبری دینے والا اور (کافروں کے لیے) ہوشیار کرنے والا اور پشت پناہ بنا کر بھیجا ہے۔ تو میرا بندہ ہے اور میرا رسول ہے۔ میں نے تیرا نام متوکل رکھا۔ نہ تو بدخُو ہے اور نہ سخت دل۔ نہ بازاروں میں شوروشر کرنے والا۔ اور نہ ایسا ہے کہ جو بدی کا بدلہ بدی سے دے۔ بلکہ معاف کرتا ہے اور درگزر کرتا ہے اور اللہ اسے دنیا سے اس وقت تک نہیں اٹھائے گا جب تک اس کے ذریعہ ٹیڑھی اُمت کو درست نہ کرلے۔ یعنی وہ یہ اقرار نہ کرلیں کہ اللہ کے سوا کوئی معبود نہیں۔ اور وہ اس کلمہ کے ذریعہ اندھی آنکھوں، بہرے کانوں اور غفلت میں لپٹے ہوئے دلوں کو کھول دے گا۔

عبیداللہ بن موسیٰ نے ہم سے بیان کیا۔ انہوں نے اسرائیل سے، اسرائیل نے ابو اسحاق سے، ابواسحاق نے حضرت براء (بن عازب) رضی اللہ عنہ سے روایت کی۔ انہوں نے کہا: ایک بار نبی ﷺ کے صحابہ میں سے ایک شخص (قرآن) پڑھ رہا تھا اور اس کا ایک گھوڑا گھر میں بندھا ہوا تھا، وہ بدکنے لگا۔ یہ دیکھ کر وہ شخص باہر نکلا اور دیکھا بھالا مگر کچھ نہ دیکھا اور وہ گھوڑا بدکتا رہا۔ جب صبح ہوئی تو اس نے نبی صلی اللہ علیہ وسلم سے یہ ذکر کیا۔ آپؐ نے فرمایا: یہی وہ سکینت کی حالت ہے جو قرآن پڑھنے کی وجہ سے (آہستہ آہستہ) نازل ہوتی ہے۔