Ahadith

حضرت ابن عباسؓ نے بیان کیا کہ رسول اللہﷺ نے فرمایا جو ثواب کی نیت رکھتے ہوئے سات سال اذان دے، اللہ اُس کے لئے آگ سے برا ء ت لکھ دیتا ہے۔

حضرت ابن عمرؓ سے روایت ہے کہ رسول اللہ ﷺ نے فرمایا جو بارہ سال اذان دے ، اُس کے لئے جنت واجب ہو جاتی ہے ، ہر روز اُس کی اذان کے بدلے میں ساٹھ نیکیاں لکھی جائیں گی اور ہر اقامت کے لئے تیس نیکیاں۔

حضرت انس بن مالکؓ نے بیان کیا کہ لوگوں نے کسی ایسی چیز کی تلاش کی جسے وہ نماز (کے وقت) کی علامت بنا کر اطلاع دے سکیں۔ حضرت بلالؓ کو حکم دیا گیا کہ اذان (کے الفاظ کو) دو دو دفعہ کہیں اور اقامت کو ایک ایک دفعہ کہیں۔

حضرت انسؓ نے بیان کیا کہ حضرت بلالؓ کو حکم دیا گیا کہ اذان (کے الفاظ کو) دو دو دفعہ کہیں اور اقامت کو ایک ایک دفعہ کہیں۔

حضرت سعدؓ _ جو رسول اللہ ﷺ کے مؤذن تھے _ سے روایت ہے کہ حضرت بلالؓ کی اذان کے کلمات دو دو بار اور اقامت کے ایک ایک بار تھے۔

نبی ﷺ کے آزاد کردہ غلام حضرت ابو رافعؓ نے بیان کیا کہ میں نے حضرت بلالؓ کو رسول اللہ ﷺ کے سامنے اذان کے کلمات دو دو بار اور اقامت کے ایک ایک بار کہتے دیکھا۔

ابو شَعثاء نے بیان کیا ہم مسجد میں حضرت ابوہریرہؓ کے ساتھ بیٹھے ہوئے تھے کہ مؤذن نے اذان دی اور ایک شخص مسجد سے جانے کے لئے اُٹھا تو حضرت ابوہریرہؓ نے اپنی نظروں سے اس کا پیچھا کیا حتی کہ وہ مسجد سے نکل گیا۔ اس پر حضرت ابوہریرہؓ نے کہا کہ جہاں تک اس (شخص) کا تعلق ہے تو اس نے حضرت ابو القاسم ﷺ کی نافرمانی کی ہے۔

حضرت عثمان بن عفان ؓ نے بیان کیا کہ رسول اللہ ﷺ نے فرمایا جس کو اذان نے مسجد میں پایا پھر وہ بلا ضرورت (مسجد سے) نکلا اور اس کا واپس آنے کا ارادہ نہیں تو وہ منافق ہے۔