Ahadith

حضرت سعد بن ابی وقاص ؓ کے بارے میں روایت ہے کہ ایک حج کے موقع پرامیر معاویہ ؓ آئے اور ان کے پاس حضرت سعد ؓگئے اور لوگوں نے حضرت علی ؓ کا ذکر کیا اورانہوں(معاویہؓ) نے ان (حضرت علیؓ) کے بارہ میں کچھ کہا۔حضرت سعدؓ ناراض ہوگئے اور کہنے لگے کہ تم یہ اس شخص کے بارے میں کہہ رہے ہو؟ جس کے بارہ میں مَیں نے رسول اللہ ﷺکو فرماتے ہوئے سنا ہے جس کا میں مولیٰ ہوں اس کا علی ؓ مولیٰ ہے اور میں نے آپ ؐ کو فرماتے ہوئے سنا کہ اے علی ؓ! تم مجھ سے ایسے ہو جیسے ہارون ؑ موسیٰ ؑ سے مگر یہ کہ میرے بعد نبی نہیں۔ میں نے آپؐ کو یہ بھی فرماتے ہوئے سنا کہ مَیں آج جھنڈا اس شخص کو دوں گا جواللہ اور اس کے رسول ﷺسے محبت رکھتا ہے۔

حضرت عبداللہ بن زبیرؓ سے روایت ہے کہ حضرت زبیرؓ نے بیان کیا کہ احد کے دن رسول اللہ ﷺ نے میرے لئے اپنے ماں باپ کو جمع کر دیا ۔

حضرت جابرؓسے روایت ہے کہ حضرت طلحہ ؓ نبی ﷺ کے پاس سے گزرے تو حضور ؐ نے فرمایا کہ یہ شہید ہے جو زمین پر چل رہا ہے۔

موسیٰ بن طلحہ ؓ نے بیان کیا کہ ہم امیر معاویہؓ کے پاس تھے۔ انہوں نے کہا میں گواہی دیتا ہوں کہ میں نے رسول اللہ ﷺ کو یہ کہتے ہوئے سنا کہ طلحہ ؓ ان میں سے ہے جنہوں نے اپنے عہد کو پورا کردیا ۔

قیس نے بیان کیا کہ میں نے حضرت طلحہ ؓ کا ہاتھ دیکھا، جو شل تھا۔ جس کو انہوں نے اُحد کے دن رسول اللہ ﷺ کے لئے ڈھال بنایا۔