Ahadith

حضرت ابو سعید ؓ اپنے والد سے اور وہ اُن کے دادا سے روایت کرتے ہیں کہ نبی ﷺ نے فرمایا اُس کا وضو نہیں جو اس پر اللہ کا نام نہ لے۔

حضرت ابو ہریرہ ؓ نے بیان کیا کہ رسول اللہ ﷺ نے فرمایا اُس کی نماز نہیں جس کا وضو نہیں اور اس کا وضو نہیں، جو وضو کرتے وقت اللہ کا نام نہ لے۔

حضرت ابو ہریرہؓ نے بیان کیا کہ رسول اللہ ﷺ نے فرمایا جب تم وضو کرو تو دائیں طرف کے اعضاء سے شروع کرو۔

حضرت ابن عباسؓ سے روایت ہے کہ رسول اللہ ﷺ نے ایک ہی چلّو سے کلّی بھی کی اور ناک میں پانی چڑھا کر صفائی کی۔

حضرت علیؓ سے روایت ہے کہ رسول اللہ ﷺ نے وضو کیا اور ایک ہی چلّو سے تین بار کلی کی اور تین بار استنشاق کیا۔

حضرت عبد اللہ بن زید انصاریؓ نے بتایا کہ ہمارے پاس رسول اللہ ﷺ آئے اور ہم سے وضو کے لئے پانی طلب فرمایا۔ میں آپؐ کے پاس پانی لایا۔ آپؐ نے کلی کی اور استنشاق فرمایا ایک ہی چلّو سے۔ اچھی طرح ناک میں پانی چڑھانا اور ناک صاف کرنا۔

حضرت سلمہ بن قیس ؓ نے بیان کیا کہ رسول اللہ ﷺ نے مجھے فرمایا جب تم وضو کرو تو ناک صاف کرو اور استنجا کرو تو طاق ڈھیلے لو۔