Ahadith

حضرت مہاجربن قُنفُذبن عُمَیربن جُذعَان ؓ بیان کرتے ہیں کہ مَیں نبی ﷺ کے پاس آیا اور آپؐ وضو کر رہے تھے، میں نے آپؐ کو سلام کیا اور آپؐ نے مجھے جواب میں سلام نہیں کہا۔ جب آپؐ وضو سے فارغ ہوئے ، آپؐ نے فرمایا مجھے تمہیں سلام کا جواب دینے میں اس امر کے علاوہ کوئی امر مانع نہیں تھا کہ میں بے وضو تھا ۔

حضرت ابو ایوب انصاریؓ اور حضرت جابر بن عبد اللہؓ اور حضرت انس بن مالکؓ نے بیان کیا کہ جب یہ آیت نازل ہوئی فِیْہِ رِجَالٌ یُحِبُّوْنَ اَنْ یَتَطَھَّرُوْا وَاللَّہُ یُحِبُّ الْمُطَّھِّرِیْنَ ٭ (ترجمہ) اس میں ایسے مرد ہیں جو خواہش رکھتے ہیں کہ وہ پاک ہو جائیں اور اللہ پاک بننے والوں سے محبت کرتا ہے۔رسول اللہ ﷺنے فرمایا اے انصارؓ کے گروہ! یقینااللہ تعالیٰ نے طہارت کے معاملہ میں تمہاری تعریف کی ہے۔تمہاری طہارت کیا ہے؟ انہوں نے کہاہم نماز کے لئے وضو کرتے اور جنابت کی وجہ سے غسل کرتے اور پانی سے استنجا کرتے ہیں۔ آپؐ نے فرمایاتویہ بات ہے۔ تم اس کو لازم پکڑے رکھو۔

حضرت عائشہ ؓ سے روایت ہے کہ نبی ﷺ (قضائے حاجت کے بعد) صفائی کے لئے تین دفعہ پانی سے صفائی کرتے تھے۔حضرت ابن عمرؓ نے کہا کہ ہم نے بھی اسی طریق کو اختیار کیا اور اُسے ہم نے علاج اور موجب پاکیزگی پایا ۔