Ahadith

حضرت انس بن مالکؓ بیان کرتے ہیں کہ نبیﷺ کے پاس دو آدمیوں نے چھینک لی۔ آپؐ نے ان میں سے ایک کی چھینک پر جواب دیا اور دوسرے کی چھینک پر جواب نہ دیا۔ اس شخص نے جس کی چھینک کا آپؐ نے جواب نہیں دیا تھا کہا کہ فلاں نے چھینک لی تو آپؐ نے اس کا جواب دیا او ر میں نے چھینک لی تو آپؐ نے میری چھینک کا جواب نہیں دیا۔ آپؐ نے فرمایا کہ اس نے الحمدللہ کہا تھا اور تم نے الحمد للہ نہیں کہا۔

حضرت ابو بردہؓ بیان کرتے ہیں میں حضرت ابو موسیٰ ؓ کے پاس اندر گیا اور وہ فضل بن عباسؓ کی بیٹی کے گھر میں تھے میں نے چھینک لی تو انہوں نے مجھے اس کا جواب نہ دیا اور انہوں (فضل بن عباسؓ کی بیٹی) نے چھینک لی تو انہوں (ابو موسیٰ) نے انہیں جواب دیا پھر میں اپنی ماں کے پاس گیا اور انہیں بتایا پھر جب وہ(ابوموسیٰؓ ) ان کے پاس آئے تو انہوں نے کہا کہ میرے بیٹے نے چھینک لی تو آپ نے اسکی چھینک کاجواب نہیں دیااوراس (لڑکی)نے چھینک لی تو اس کی چھینک کا جواب دیا۔ انہوں نے کہا کہ تمہارے بیٹے نے چھینک لی تو اس نے الحمد للہ نہیں کہا اس لئے میں نے اس کی چھینک کا جواب نہیں دیا اور اس لڑکی نے چھینک لی تو الحمدللہ کہااس لئے میں نے اس کی چھینک کا جواب دیا۔ میں نے رسول اللہﷺ کو فرماتے سنا کہ جب تم میں سے کوئی چھینک لے اور الحمدللہ کہے تو اس کی چھینک کا جواب دو اور اگر الحمدللہ نہ کہے تو اس کی چھینک کا جواب نہ دو۔

ایاس بن سلمہ اپنے والد سے روایت کرتے ہیں کہ انہوں نے نبیﷺ کو فرماتے ہوئے سنا جب ایک شخص نے آپؐ کے پاس چھینک لی تو آپؐ نے اسے یَرْحَمُکَ اللّٰہُ کہا پھر اس نے دوسری دفعہ چھینک لی تو رسول اللہﷺ نے فرمایا اس شخص کو زکام ہے۔

حضرت ابو ہریرہؓ سے روایت ہے کہ رسول اللہﷺ نے فرمایا جماہی شیطان سے ہے پس جب تم میں سے کوئی جماہی لے تو اسے چاہئے کہ جس حد تک ممکن ہے اسے روکے۔

حضرت ابو سعید خدریؓ کے بیٹے اپنے والد سے روایت کرتے ہیں کہ رسول اللہﷺ نے فرمایا جب تم میں سے کوئی نماز میں جماہی لے تو اسے چاہئے کہ جتنا ممکن ہو اسے روکے کیونکہ شیطان داخل ہوجاتا ہے۔

حضرت عائشہؓ بیان فرماتی ہیں کہ رسول اللہﷺ نے فرمایا فرشتے نور سے پیدا کئے گئے اور جن آگ کے شعلے سے اور آدم اس سے پیدا کیا گیا جو تمہارے لئے بیان کردیا گیا ہے۔

حضرت ابو ہریرہؓ بیان کرتے ہیں کہ رسول اللہﷺ نے فرمایا بنی اسرائیل میں سے ایک گروہ گم ہوگیا نہیں معلوم کہ ان کا کیا بنا لیکن میرا خیال ہے وہ چوہے ہیں کیا تم دیکھتے نہیں کہ جب ان کے سامنے اونٹوں کا دودھ رکھا جاتا ہے تو وہ اسے نہیں پیتے اور جب ان کے سامنے بکریوں کا دودھ رکھا جاتا ہے تو وہ اسے پی لیتے ہیں۔ حضرت ابو ہریرہؓ کہتے ہیں کہ میں نے یہ روایت کعبؓ کو بتائی توانہوں نے کہا کہ کیا تم نے یہ بات رسول اللہﷺ سے خود سنی ہے؟ میں نے کہا ہاں انہوں نے یہ بار بار کہا میں نے کہا کیا میں تورات پڑھتا ہوں؟ ایک روایت میں (لَایُدْرٰی مَا فَعَلَتْ کی بجائے) لَانَدْرِیْ مَا فَعَلَتْ کے الفاظ ہیں۔