Ahadith

حضرت انسؓ سے روایت ہے کہ ایک یہودی عورت رسول اللہﷺ کے پاس زہر ملا بکری کا گوشت لائی۔ آپؐ نے اس میں سے کچھ کھالیا۔ پھر عورت کوآپؐ کے پاس لایا گیا۔ آپؐ نے اس عورت سے اس کے بارہ میں پوچھا۔ اس (عورت) نے کہا میرا ارادہ آپؐ کو قتل کرنے کا تھا۔ آپؐ نے فرمایا یہ ہو نہیں سکتا تھاکہ اللہ تمہیں اس کی طاقت دے یا فرمایامجھ پر۔ راوی کہتے ہیں لوگوں نے کہا کیا ہم اسے قتل نہ کردیں؟ آپؐ نے فرمایا نہیں۔ راوی کہتے ہیں میں اس کا اثر رسول اللہﷺ کے گلے میں محسوس کرتا تھا۔ ایک اور روایت میں (أَنَّ امْرَأَۃً یَہُودِیَّۃً أَتَتْ رَسُولَ اللَّہِﷺ بِشَاۃٍ مَسْمُومَۃٍ کی بجائے) أَنَّ یَہُودِیَّۃً جَعَلَتْ سَمًّا فِی لَحْمٍ ثُمَّ أَتَتْ بِہِ رَسُولَ اللَّہِﷺ کے الفاظ ہیں کہ ایک یہودیہ نے گوشت میں زہر ڈال دیا پھر رسول اللہﷺ کے پاس لائی۔

حضرت عائشہؓ فرماتی ہیں کہ جب ہم میں سے کوئی شخص بیمار ہو تا تو رسول اللہﷺ اس پر اپنا دایاں ہاتھ پھیرتے اور دعا کرتے۔ اے لوگوں کے رب! بیماری کو دور فرما اور شفاء بخش کہ تو ہی شفاء دینے والا ہے۔ تیری شفاء کے علاوہ کوئی شفاء نہیں ہے۔ ایسی شفا ء جو کوئی بیماری نہ چھوڑے۔ جب رسول اللہﷺ بیمار ہوئے اور بیماری شدت اختیار کر گئی۔ میں نے آپؐ کا ہاتھ پکڑا تاکہ میں آپؐ کو ویسے ہی دم کروں جیسے آپؐ کیا کرتے تھے۔ آپؐ نے اپنا ہاتھ میرے ہاتھ سے چھڑایا اور پھر دعا کی۔ اے اللہ !مجھے بخش دے اور مجھے رفیق اعلیٰ کی مصاحبت عطا کر۔ حضرت عائشہؓ فرماتی ہیں میں نے آپؐ کو دیکھنے لگی تودیکھاکہ آپؐ وفات پا چکے تھے۔ایک اور روایت میں (مَسَحَہُ بِیَمِینِہِ کی بجائے) مَسَحَہُ بِیَدِہِ کے الفاظ ہیں کہ آپؐ اس پر اپنا ہاتھ پھیرتے تھے۔)

حضرت عائشہؓ فرماتی ہیں رسول اللہﷺ جب کسی مریض کے پاس تشریف لاتے تو اس کے لئے دعا کرتے ہوئے کہتے اے لوگوں کے رب!تو اس بیماری کو دور کردے اور تو شفاء دے کہ تو ہی شفاء دینے والا ہے۔ تیری شفاء کے علاوہ کوئی شفاء نہیں ہے۔ ایسی شفاء عطا فرما جو کوئی بیماری نہ چھوڑے۔

حضرت عائشہؓ سے روایت ہے کہ رسول اللہﷺ یہ دم کیا کرتے تھے اے لوگوں کے رب!تو بیماری کو دور کر دے کہ تیرے ہاتھ میں شفاء ہے تیرے سوا اسے کوئی دور کرنے والا نہیں ہے۔

حضرت عائشہؓ فرماتی ہیں جب رسول اللہﷺ کے گھر والوں میں سے کوئی بیمار ہوتا تو آپؐ اس پر مُعَوِّذات پڑھ کر پھونک مارتے۔ جب آپؐ بیمار ہوئے اس بیماری سے جس میں آپؐ کی وفات ہوئی۔ میں آپؐ پر پھونکتی تھی اور آپؐ پر آپؐ کا ہی ہاتھ پھیرتی تھی کیونکہ وہ میرے ہاتھ کی نسبت زیادہ برکت والا تھا۔ایک اور روایت میں (بِالْمُعَوِّذَاتِ کی بجائے) بِمُعَوِّذَاتٍ کے الفاظ ہیں ۔

حضرت عائشہؓ سے روایت ہے کہ نبیﷺ جب بیمار ہوئے تو معوذات پڑھ کر اپنے اوپر پھونکتے۔ جب آپؐ کیبیماری زیادہ ہوئی تو میں آپؐ پر پڑھتی تھی اور آپؐ پرآپؐ کا ہی ہاتھ برکت کی امید سے پھیرتی تھی۔ ایک اور روایت میں (یَقْرَأُ عَلَی نَفْسِہِکی بجائے) نَفَثَ عَلَی نَفْسِہِ کے الفاظ ہیں اور (أَمْسَحُ عَنْہُ بِیَدِہِکی بجائے) مَسَحَ عَنْہُ بِیَدِہِ کے الفاظ ہیں۔