Ahadith

حضرت سفینہؓ سے روایت ہے وہ کہتے ہیں حضرت ابو بکرؓ صاحبِ رسول اللہﷺ نے فرمایا کہ رسول اللہﷺ ایک صاع (پانی) سے غسل فرمالیتے اور ایک مُدْ(پانی) سے وضوء فرما لیتے۔ ابن حجر کی روایت میں (یَتَطَھَّرُ بِالْمُدِّ کے بجائے) یُطَھِّرُہُ الْمُدُّکے الفاظ ہیں اور راوی کہتے ہیں کہ وہ عمر رسیدہ ہو گئے تھے اس لئے مجھے ان کی روایت پر اعتمادنہیں۔

حضرت جبیرؓ بن مطعم بیان کرتے ہیں کہ لوگ رسول اللہﷺ کے پاس غسل کے بارہ میں باتیں کر رہے تھے۔ کسی نے کہا کہ میں اپنا سر اس اس طرح دھوتا ہوں۔ رسول اللہﷺ نے فرمایا کہ میں اپنے سر پر تین اوک پانی ڈالتاہوں۔

حضرت جابر بن عبداللہؓ سے روایت ہے کہ ثقیف کے وفدنے نبیﷺ سے پوچھااور عرض کیاکہ ہمارا علاقہ بڑا سرد علاقہ ہے تو غسل کیسے ہو؟ آپؐ نے فرمایا کہ میں تواپنے سر پر تین مرتبہ پانی ڈال لیتاہوں۔ ابو بِشر کہتے ہیں کہ انہوں نے یہ بھی بتایا کہ ثقیف کے وفدنے یا رسول اللہ! کے الفاظ کہے تھے۔

حضرت جابر بن عبداللہؓ بیان کرتے ہیں کہ رسول اللہﷺ جب غسلِ جنابت فرماتے اپنے سر پر تین اوک پانی ڈال لیتے۔ حسن بن محمدنے اُن سے عرض کیا کہ میرے بال بہت زیادہ ہیں۔ حضرت جابرؓ بیان کرتے ہیں کہ میں نے اس سے کہا کہ اے میرے بھتیجے! رسول اللہﷺ کے بال تمہارے بالوں سے زیادہ گھنے اور پاکیزہ تھے۔

حضرت ام سلمہؓ بیان کرتی ہیں مَیں نے عرض کیا یا رسول اللہ! میں ایک ایسی عورت ہوں جواپنے سر پر کس کر مینڈھی بناتی ہوں۔ کیا میں غسلِ جنابت کے وقت اسے کھولوں؟ آپؐ نے فرمایا نہیں بلکہ تمہارے لئے اتنا ہی کافی ہے کہ تم تین اُوک پانی اپنے سر پر ڈال لو۔ پھر اپنے اُوپر پانی ڈال لو تو تم پاک ہو جاؤ گی۔ عبدالرزاق کی روایت میں ہے (حضرت امّ سلمہؓ نے پوچھا کہ) کیا میں حیض اور جنابت کے(غُسل کے وقت) اس مینڈھی کو کھول دُوں؟ آپؐ نے فرمایا نہیں۔ ایوب بن موسیٰ نے اسی سند سے روایت کی ہے اور کہا(حضرت اُمِّ سلمہؓ نے پوچھا) کیا میں اُسے (مینڈھی کو) کھولوں اور غسلِ جنابت کروں۔ راوی نے حیض کا ذکر نہیں کیا۔

عبید بن عمیر بیان کرتے ہیں کہ حضرت عائشہ ؓ کو یہ بات پہنچی کہ حضرت عبداللہ بن عمروؓ عورتوں کو ان کے غسل کے وقت بال کھولنے کے لئے کہتے ہیں آپؓ نے فرمایا اس ابن عمروؓ کی اس بات پر تعجب ہے وہ عورتوں کو غسل کے وقت بال کھولنے کا کہتے ہیں ان کو سر منڈوانے کا کیوں نہیں کہہ دیتے۔ میں اور رسول اللہﷺ ایک ہی برتن سے غسل کر لیتے اور میں اپنے سر پر تین دفعہ سے زیادہ پانی نہ ڈالتی۔

حضرت عائشہؓ سے روایت ہے وہ بیان کرتی ہیں کہ ایک عورت نے نبیﷺ سے پوچھا کہ وہ غسلِ حیض کس طرح کرے؟ راوی نے کہا کہ حضرت عائشہؓ نے ذکر کیا کہ آپؐ نے اسے سکھایا کہ وہ کیسے غسل کرے پھر مشک کا ایک پھایا لے اور اس کے ذریعہ صفائی کرے۔ اس نے عرض کیا کہ اس کے ذریعہ میں کیسے صفائی کروں؟ آپؐ نے فرمایا تم اس کے ذریعہ صفائی کرو، سبحان اللہ اور پھر آپؐ نے منہ ڈھانپ لیا۔ سفیان بن عیینہ نے ہمیں اپنے ہاتھ اپنے چہرہ پر رکھ کر دکھایا اور کہا کہ حضرت عائشہؓ نے فرمایا کہ اس پر مَیں نے اسے اپنی طرف کھینچ لیا اور میں سمجھ گئی کہ نبیﷺ کا کیا منشاہے۔ پس میں نے کہا کہ جہاں جہاں خون کا نشان پاؤ وہاں وہاں اسے لگاؤ۔ حضرت عائشہؓ سے روایت ہے کہ ایک عورت نے نبیﷺ سے پوچھا کہ میں پاک ہونے پرکس طرح غُسل کروں؟ تو آپؐ نے فرمایا کہ ایک مشک لگا ہوا پھایا لو پھر اس کے ساتھ صفائی کرلو۔