Ahadith

حضرت ابن عمرؓ سے روایت ہے کہ رسول اللہﷺ جمعہ کے دن کھڑے ہو کر خطبہ دیتے تھے پھر تشریف رکھتے پھر کھڑے ہوجاتے راوی کہتے ہیں کہ جس طرح لوگ آج کل کرتے ہیں۔

حضرت جابر بن عبداللہؓ سے روایت ہے کہ نبیﷺ جمعہ کے دن کھڑے ہو کر خطبہ دے رہے تھے۔ شام سے ایک تجارتی قافلہ آیا۔ لوگ اس کی طرف چلے گئے یہانتک کے سوائے بارہ آدمیوں کے کوئی بھی نہ رہا تب یہ آیت اتری جو سورۃ جمعہ میں ہے۔ وَاِذَارَأَوْا تِجَارَۃً اَوْ لَھْوَنِا انْفَضُّوْا اِلَیْھَا وَتَرَکُوْکَ قَائِمًا(سورۃ الجمعۃ: 12) اور جب یہ لوگ تجارت یا کھیل کی بات دیکھتے ہیں تو تجھ سے الگ ہوکر اس کی طرف چلے جاتے ہیں اور تجھ کو اکیلا چھوڑ دیتے ہیں تو ان سے کہہ دے جو کچھ اللہ کے پاس ہے وہ کھیل کی بات بلکہ تجارت سے بھی اچھا ہے اور اللہ بہتر رزق دینے والا ہے۔ ایک اور روایت میں رسول اللہﷺ کے بارہ میں یَخْطُبُ قَائِماً کی بجائے یَخْطُبُ کا لفظ ہے۔

حضرت جابر بن عبداللہؓ سے روایت ہے کہ ہم جمعہ کے دن رسول اللہﷺ کے ساتھ تھے کہ ایک تجارتی قافلہ آیا راوی کہتے ہیں کہ لوگ اس کی طرف چلے گئے اور سوائے بارہ آدمیوں کے کوئی بھی نہ رہا اور میں ان میں تھاوہ کہتے ہیں تب اللہ تعالیٰ نے یہ آیت نازل فرمائی۔ وَاِذَارَأَوْا تِجَارَۃً اَوْ لَھْوَنِا انْفَضُّوْا اِلَیْھَا وَتَرَکُوْکَ قَائِمًا (سورۃ الجمعۃ: 12) اور جب یہ لوگ تجارت یا کھیل کی بات دیکھتے ہیں تو تجھ سے الگ ہوکر اس کی طرف چلے جاتے ہیں اور تجھ کو اکیلا چھوڑ د یتے ہیں تو ان سے کہہ دے جو کچھ اللہ کے پاس ہے وہ کھیل کی بات بلکہ تجارت سے بھی اچھا ہے اور اللہ بہتر رزق دینے والا ہے۔

حضرت جابر بن عبداللہؓ سے روایت ہے کہ نبیﷺ جمعہ کے دن کھڑے تھے کہ مدینہ کی طرف ایک قافلہ آیا رسول اللہﷺ کے صحابہ جلدی سے اس کی طرف چلے گئے یہانتک کہ آپؐ کے پاس سوائے بارہ آدمیوں کے کوئی بھی نہ رہا۔ ان(بارہ) میں حضرت ابوبکرؓ اور حضرت عمرؓ تھے۔ راوی کہتے ہیں تب یہ آیت نازل ہوئی وَاِذَارَأَوْا تِجَارَۃً اَوْ لَھْوَنِا انْفَضُّوْا اِلَیْھَا(سورۃ الجمعۃ: 12)

حضرت کعب بن عُجرہؓ سے روایت ہے کہ وہ مسجد میں داخل ہوئے توعبد الرحمان بن ام الحکم بیٹھ کر خطبہ دے رہے تھے اس پہ انہوں نے کہا کہ اس لاعلم کو دیکھو بیٹھ کر خطبہ دے رہا ہے جبکہ اللہ تعالیٰ فرماتا ہے وَاِذَارَأَوْا تِجَارَۃً اَوْ لَھْوَنِا انْفَضُّوْا اِلَیْھَا وَتَرَکُوْکَ قَائِمًا(سورۃ الجمعۃ: 12) اور جب وہ کوئی تجارت یا دل بہلاوہ دیکھیں گے تو اس کی طرف دوڑ پڑیں گے اور تجھے اکیلا کھڑا ہوا چھوڑ دیں گے۔

حضرت عبد اللہ بن عمرؓ اور حضرت ابو ہریرہؓ دونو ں نے بیان کیا کہ انہوں نے رسول اللہﷺ کو لکڑی کے منبر پرفرماتے ہوئے سنا کہ لوگ جمعہ چھوڑنے سے ضرور باز آ جائیں ورنہ اللہ ان کے دلوں پر ضرور مہر کردے گا پھر وہ غافلوں میں سے ہوجائیں گے۔