Ahadith

ابو زرعہ سے روایت ہے وہ کہتے ہیں میں حضرت ابو ہریرہؓ کے ساتھ مروان کے گھر میں گیا اور انہوں نے وہاں تصاویر دیکھیں۔ اس پر انہوں نے کہا کہ میں نے رسول اللہﷺ کو فرماتے ہوئے سنا ہے کہ اللہ عزّوجل نے فرمایا ہے کہ اس سے زیادہ کون ظالم ہو سکتا ہے کہ جو میرے تخلیق کرنے کی طرح تخلیق کرنے لگے! پس چاہیے کہ اب وہ کوئی ذرہ پیدا کریں کوئی دانہ پیدا کریں یا کوئی جو(کا دانہ) پیدا کریں۔ ایک اور روایت ابو زرعہ سے مروی ہے کہ میں اور حضرت ابو ہریرہؓ ایک ایسے گھر میں گئے جو مدینہ میں سعید یا مروان کے لئے بنایا جا رہا تھا۔ راوی کہتے ہیں کہ انہوں نے اس گھر میں ایک مصور کو تصویر بناتے دیکھا تو کہا کہ رسول اللہﷺ نے فرمایا ہے پھر اسی طرح کی (روایت) بیان کی۔ لیکن اس روایت میں أَوْ لِیَخْلُقُوْا شَعِیْرَۃً کے الفاظ نہیں ہیں۔

حضرت ابو ہریرہؓ سے روایت ہے کہ رسول اللہﷺ نے فرمایا کہ فرشتے ان (سفر کے) رفیقوں کی مصاحبت اختیار نہیں کرتے جن میں کتا یا گھنٹی ہو۔

عبّاد بن تمیم سے روایت ہے کہ ابو بشر انصاری نے ان کو بتایا کہ وہ رسول اللہﷺ کے ساتھ آپؐ کے کسی سفر میں تھے۔ رسول اللہﷺ نے ایک قاصد بھیجا۔ عبداللہ بن ابو بکر کہتے ہیں کہ میرا گمان ہے کہ اس وقت جب لوگ اپنی آرامگاہوں میں تھے آپؐ نے فرمایا کہ کسی اونٹ کی گردن میں کسی تندی کی گانی یا کوئی گانی باقی نہ رہے مگر وہ کاٹ دی جائے۔ مالک کہتے ہیں میں اسے نظرکی وجہ سے سمجھتا ہوں۔

حضرت جابرؓ سے روایت ہے کہ رسول اللہﷺ نے چہرہ پر مارنے اور چہرہ پر داغنے سے منع فرمایا ہے۔

حضرت ابن عباسؓ روایت کرتے ہیں کہ رسول اللہﷺ نے ایک گدھے کو دیکھا جس کا چہرہ داغا گیا تھا۔ حضورؐ نے اسے ناپسند فرمایا۔ پھر فرمایااللہ کی قسم ! میں صرف اس حصہ کو داغوں گا جو چہرہ سے سب سے زیادہ دور ہو پھر آپؐ نے اپنے ایک گدھے کی پشت داغنے کا حکم فرمایااور آپؐ سب سے پہلے ہیں جنہوں نے پشت پر داغا۔