Ahadith

حضرت عقبہؓ بن عامر سے روایت ہے کہ رسول اللہﷺ کی خدمت میں ایک ریشمی قباء تحفۃً پیش کی گئی۔ آپؐ نے اسے پہنااور اس میں نماز پڑھائی۔ آپؐ نماز سے فارغ ہوئے تو اسے ناپسند کرنے والے کی طرح زور سے اُتار دیااور فرمایا کہ یہ (لباس) متقیوں کے شایانِ شان نہیں ہے۔

حضرت انس بن مالکؓ بیان کرتے ہیں کہ رسول اللہﷺ نے حضرت عبدالرحمان بن عوفؓ اور حضرت زبیر بن العوامؓ کو سفر میں خارش یا کسی بیماری کی وجہ سے جو ان دونوں کو تھی ریشمی قمیصیں پہننے کی اجازت دی۔ ایک اور روایت میں ’’فِی السَّفَرِ‘‘ کے الفاظ نہیں ہیں۔

حضرت انسؓ سے روایت ہے کہ رسول اللہﷺ نے حضرت زبیر بن العوامؓ اور حضرت عبدالرحمان بن عوفؓ کو خارش کے باعث جو ان دونوں کو تھی ریشم پہننے کی اجازت دی۔ یا(انہوں نے کہا) ان (دونوں ) کو اجازت دی گئی۔

حضرت عبداللہ بن عمروؓ بن العاص نے انہیں بتایا کہ رسول اللہﷺ نے مجھ پر معصفر بوٹی سے رنگے ہوئے دو کپڑے دیکھے تو آپؐ نے فرمایا کہ یقینا یہ کفّار کے کپڑے ہیں۔ پس انہیں مت پہنو۔

حضرت عبداللہ بن عمروؓ سے روایت ہے کہ نبیﷺ نے مجھ پر معصفر کپڑے دیکھے تو فرمایا: کیا تمہاری ماں نے تمہیں اس بات کا حکم دیا ہے۔ (عبداللہ کہتے ہیں )مَیں نے عرض کیا: کیا میں انہیں دھولوں؟آپؐ نے فرمایا(بلکہ) انہیں جلادو۔