Ahadith

ابو بردہ سے روایت ہے کہ حضرت عائشہؓ نے ہمارے لئے ایک ازار اور مُلَبَّدَ چادر نکالی اور فرمایا کہ اس میں رسول اللہﷺ کی وفات ہوئی تھی۔ دوسری روایات میں (اِزَارًا کی بجائے)’’اِزَارًا غَلِیْظًا‘‘کے الفاظ ہیں۔

حضرت عائشہؓ فرماتی ہیں کہ نبیﷺ ایک دن باہر تشریف لے گئے تو آپؐ کالے بالوں سے منقش چادرپہنے ہوئے تھے۔

حضرت عائشہؓ بیان فرماتی ہیں کہ رسول اللہﷺ کا وہ بستر جس پر آپؐ سوتے تھے چمڑے کا تھا۔ اس کے اندر کھجور کے درخت کے ریشے بھرے ہوئے تھے۔ایک روایت میں (فِرَاشْکی بجائے) ضِجَا ع کا لفظ ہے۔

حضرت جابرؓ سے روایت ہے کہ جب میری شادی ہوئی تو رسول اللہﷺ نے مجھ سے فرمایا: کیا تمہارے پاس قالین ہیں؟(حضرت جابرؓ کہتے ہیں ) مَیں نے عرض کیا کہ ہمارے پاس قالین کہاں ! آپؐ نے فرمایا: عنقریب ہوں گے!

حضرت جابر بن عبداللہؓ سے روایت ہے کہ جب میری شادی ہوئی۔ رسول اللہﷺ نے مجھ سے فرمایا: کیاتمہارے پاس قالین ہیں؟(حضرت جابرؓ کہتے ہیں )مَیں نے عرض کیا کہ ہمارے پاس قالین کہاں؟حضورؐ نے فرمایا: تو ہوں گے۔ حضرت جابرؓ کہتے ہیں کہ میری بیوی کے پاس ایک قالین ہے۔ مَیں اسے کہتا ہوں کہ اسے مجھ سے پرے رکھو۔ وہ کہتی ہیں کہ رسول اللہﷺ نے فرمایا تھا ہوں گے۔ اس پر میں اس کو کچھ نہیں کہتا۔