Ahadith

حضرت نواس بن سمعانؓ انصاری بیان کرتے ہیں کہ میں نے رسول اللہﷺ سے نیکی اور گناہ کے بارہ میں سوال کیا۔ آپؐ نے فرمایا نیکی حسنِ خلق ہے اور گناہ وہ ہے جو تیرے سینہ میں کھٹکے اور تو ناپسند کرے کہ لوگوں کو اس کا پتہ لگے۔

حضرت نواس بن سمعانؓ بیان کرتے ہیں کہ میں رسول اللہﷺ کے پاس مدینہ میں ایک سال تک رہا۔ مجھے ہجرت (کرنے) سے صرف سوال کرنے (کی خواہش) نے روکے رکھا۔ اس بات نے روکے رکھا کہ جب ہم میں سے کوئی ہجرت کر لیتا تو رسول اللہﷺ سے کسی چیز کے بارہ میں سوال نہ کرتا۔ وہ (نواس) کہتے ہیں میں نے حضورؐ سے نیکی اور بدی کے بارہ میں سوال کیا اس پررسول اللہﷺ نے فرمایا نیکی حسنِ خلق ہے اور گناہ وہ ہے جو تیرے دل میں کھٹکے اور تو ناپسند کرے کہ لوگوں کو اس کا پتہ چلے۔

حضرت ابو ہریرہؓ بیان کرتے ہیں رسول اللہﷺ نے فرمایا کہ اللہ نے مخلوق کو پیدا کیا یہانتک کہ جب وہ اُن سے فارغ ہوا تو رِحم کھڑا ہوا اور کہنے لگا یہ مقام اس کا ہے جو قطع رحمی کرنے والے سے تیری پناہ چاہتا ہے۔ فرمایا ہاں ! کیا تم خوش نہیں ہو کہ میں اس سے تعلق جوڑوں جو تجھ سے تعلق جوڑے اور اس سے قطع تعلق کروں جو تجھ سے قطع تعلق کرے اس (رِحم) نے کہا کیوں نہیں (اللہ نے) فرمایا یہ مقام تیرے لئے ہے۔ پھر رسول اللہﷺ نے فرمایا اگر چاہو تو (یہ آیت) پڑھ لو فَہَلْ عَسَیتُمْ اِنْ تَوَلَّیتُمْ اَنْ تُفْسِدُوا فِی اْلارْضِ وَ تُقَطِّعُوا اَرْحَامَکُمْ اُولٓئِکَ الَّذینَ لَعَنَھُمُ اللّٰہُ فَاَصَمَّھُمْ وَاَعْمٰی اَبْصَارَھُمْ اَفَلَا یَتَدَبَّرُونَ الْقُرْاٰنَ اَمْ عَلیٰ قُلُوبٍ اَقْفَالُھا٭کیا تمہارے لئے ممکن ہے کہ اگر تم متولّی ہوجاؤ تو تم ز مین میں فساد کرتے پھرو اور اپنے رحمی رشتوں کو کاٹ دو؟ (ہرگز نہیں ) یہی وہ لوگ ہیں جن پر اللہ نے لعنت کی اور انہیں بہرہ کردیا اور ان کی آنکھوں کو اندھا کردیا۔ پس کیا وہ قرآن پر تدبر نہیں کرتے یا دلوں پر ان کے تالے پڑے ہوئے ہیں۔

حضرت عائشہؓ بیان فرماتی ہیں کہ رسول اللہﷺ نے فرمایا کہ رِحم عرش سے تعلق رکھتا ہے وہ کہتا ہے کہ جو مجھ سے تعلق جو ڑے گا اللہ اس سے تعلق جوڑے گا اور جو مجھ سے قطع تعلق کرے گا اللہ اس سے قطع تعلق کرے گا۔

محمد بن جبیر بن مطعمؓ بیان کرتے ہیں کہ ان کے والدنے انہیں بتایا کہ رسول اللہﷺ نے فرمایا کہ قطع رحمی کرنے والا جنت میں داخل نہیں ہوگا۔

حضرت ابو ہریرہؓ بیان کرتے ہیں کہ ایک آدمی نے عرض کیا یا رسولؐ اللہ! میرے ایسے قرابت دار ہیں کہ میں ان سے تعلق جوڑتا ہوں اور وہ مجھ سے قطع تعلقی کرتے ہیں میں ان سے اچھا سلوک کرتا ہوں اور وہ مجھ سے برا سلوک کرتے ہیں۔ میں ان سے حلم سے پیش آتا ہوں وہ مجھ سے جہالت سے پیش آتے ہیں۔ اس پرآپؐ نے فرمایا اگر تم ویسے ہی ہو جیسا کہ تم کہتے ہو۔ تو تم گویا ان پر گرم راکھ ڈالتے ہو۔ جب تک تم اس حال پر رہے اللہ کی طرف سے تمہارے ساتھ ان کے مقابل پر ایک مددگار رہے گا۔