Ahadith

حضرت ابن عمرؓ سے روایت ہے کہ رسول اللہ ﷺ نے فرمایا جو غلّہ خریدے وہ اسے فروخت نہ کرے یہاں تک کہ وہ اسے پوری طرح (اپنے قبضہ میں) لے لے۔

حضرت ابن عمرؓ سے روایت ہے کہ ہم رسول اللہﷺ کے زمانہ میں غلّہ خریدتے تھے۔ آپؐ ہم پر ایسے لوگ مقرر کرتے تھے جو ہمیں حکم دیتے کہ اس (غلہ) کو جس جگہ سے خریدا ہے اس کے سوا دوسری جگہ پر منتقل کر دیں پہلے اس کے کہ ہم اسے فروخت کریں۔

حضرت ابن عمرؓ سے روایت ہے کہ رسول اللہﷺ نے فرمایا جس نے غلّہ خریدا وہ اسے نہ بیچے یہاں تک کہ وہ اسے پوری طرح (قبضہ میں ) لے لے وہ (حضرت ابن عمرؓ ) کہتے ہیں کہ ہم (تجارتی) قافلوں سے (مقدار) معیّن کئے بغیر غلّہ خرید لیتے تھے۔ رسول اللہﷺ نے ہمیں منع فرمایا کہ ہم وہ غلّہ اس جگہ سے منتقل کئے بغیر فروخت کریں۔

حضرت عبداللہ بن عمرؓ سے روایت ہے کہ رسول اللہ ﷺ نے فرمایا جس نے غلّہ خریدا۔ وہ اسے فروخت نہ کرے یہانتک کہ وہ اسے پورا پورا لے لے اور اس پر قبضہ کر لے۔

حضرت ابن عمرؓ کہتے ہیں کہ رسول اللہﷺ نے فرمایا کہ جو شخص غلّہ خریدے وہ اسے فروخت نہ کرے جب تک کہ اسے قبضہ میں نہ لے لے۔

حضرت ابن عمرؓ سے روایت ہے کہ رسول اللہﷺ کے زمانہ میں ان لوگوں کو سزا دی جاتی تھی جو غلّہ (کی مقدار) معیّن کئے بغیر خرید یں اور اسے وہاں سے منتقل کرنے سے پہلے اسی جگہ اسے فروخت کر دیں۔

سالم بن عبداللہؓ سے روایت ہے کہ ان کے والد (حضرت عبداللہ بن عمرؓ) کہتے تھے کہ میں نے لوگوں کو رسول اللہﷺ کے زمانہ میں دیکھا ہے جب وہ غلّہ (کی مقدار) معیّن کئے بغیر خریدتے تھے۔ ان کو اس بات پر سزا ہوتی تھی کہ وہ اسی جگہ پڑا ہوا اسے بیچ دیں اور ایسا ہی تھا جب تک اس (غلّہ) کو اپنے ڈیروں پر نہ لے آئیں۔ حضرت عبداللہ بن عمرؓ غلّہ (کی مقدار) اندازہ سے خریدتے تھے تو اسے اٹھوا کر اپنے گھر لے آتے تھے۔

حضرت ابو ہریرہؓ سے روایت ہے کہ رسول اللہﷺ نے فرمایا جس نے غلّہ خریدا وہ اسے فروخت نہ کرے یہان تک کہ وہ اسے ماپ لے اور راوی ابو بکر کی روایت میں اِشْتَرٰی کی بجائے اِبْتَاعَ کے الفاظ ہیں۔

حضرت ابو ہریرہؓ نے مروان سے کہا تم نے سود کی تجارت جائز کردی۔ مروان نے کہا میں نے ایسا نہیں کیا۔ حضرت ابو ہریرہؓ نے کہا تم نے صِکاک کی فروخت کی اجازت دے دی حالانکہ رسول اللہﷺ نے غلّہ کی تجارت سے منع فرمایا تھا جب تک پورا پورا نہ لے لیا جائے۔ راوی (سلیمان) کہتے ہیں پھر مروان نے لوگوں میں تقریر کی اور انہیں اس کی فروخت سے روکا۔ سلیمان کہتے ہیں میں نے سپاہیوں کو دیکھا کہ کہ وہ لوگوں کے ہاتھ سے صکوک واپس لے رہے تھے۔

حضرت جابر بن عبداللہ ؓ کہتے ہیں کہ رسول اللہ ﷺ نے فرمایا جب تم غلّہ خریدو تو اسے فروخت نہ کرو یہان تک تم پورا پورا لے لو۔