Ahadith

سعید اور عباد بن تمیم اپنے چچا سے روایت کرتے ہیں کہ نبی ﷺ کی خدمت میں ایک آدمی کی شکایت کی گئی جسے یہ خیال ہو جاتا کہ وہ نماز میں کچھ محسوس کرتا ہے۔ آپؐ نے فرمایا کہ وہ (نماز) نہ چھوڑے جب تک کہ آواز سُنے یا بو محسوس کرے۔

حضرت ابو ہریرہؓ کہتے ہیں کہ رسول اللہﷺ نے فرمایا جب تم میں سے کوئی اپنے پیٹ میں کچھ محسوس کرے اور اسے اس بارہ میں اشتباہ ہو کہ اس (پیٹ) میں سے کچھ نکلا یا نہیں تو وہ ہر گز مسجد سے نہ نکلے یہان تک کہ وہ کوئی آواز سُنے یا بو محسوس کرے۔

حضرت ابن عباسؓ سے روایت ہے۔ انہوں نے بیان کیا کہ حضرت میمونہؓ کی خادمہ کو ایک بکری صدقہ دی گئی۔ وہ (بکری) مَر گئی تو رسول اللہﷺ کا گزر اس کے پاس سے ہوا۔ آپؐ نے فرمایا کہ تم نے اس کی کھال کیوں نہ لے لی کہ تم اسے رنگ کرتے اور اس کے ذریعہ فائدہ اُٹھاتے؟ انہوں نے کہا کہ وہ تو مُردہ ہے۔ آپؐ نے فرمایا کہ اس کا صرف کھانا حرام ہے۔

حضرت ابن عباسؓ سے روایت ہے کہ رسول اللہﷺ نے ایک مردہ بکری دیکھی جو حضرت میمونہؓ کی لونڈی کو صدقہ میں دی گئی تھی تو رسول اللہﷺ نے فرمایا کہ تم نے اس کی کھال سے کیوں فائدہ نہ اُٹھایا؟ انہوں نے عرض کیا کہ وہ تو مُردار تھی۔ آپؐ نے فرمایا کہ اس کا صرف کھانا حرام ہے۔

حضرت ابن عباسؓ سے روایت ہے کہ رسول اللہﷺ ایک بکری کے پاس سے گزرے جو پھینک دی گئی تھی وہ حضرت میمونہؓ کی لونڈی کو صدقہ دی گئی تھی۔ نبیﷺ نے فرمایا انہوں نے اس کی کھال کیوں نہ لے لی کہ اس کو رنگتے اور اس سے فائدہ اُٹھاتے۔

حضرت ابن عباسؓ سے روایت ہے کہ حضرت میمونہؓ نے ان کو بتایا کہ رسول اللہﷺ کی ایک زوجہ مطہرہ کی ایک پالتو بکری تھی جو مَر گئی تو رسول اللہﷺ نے فرمایا کہ تم نے اس کی کھال کیوں نہ لے لی کہ تم اس سے فائدہ اُٹھاتے۔

حضرت ابن عباسؓ سے روایت ہے کہ نبیﷺ حضرت میمونہؓ کی آزاد کردہ لونڈی کی (مردہ) بکری کے پاس سے گزرے تو آپؐ نے فرمایا کہ تم نے اس کی کھال سے فائدہ کیوں نہ اُٹھایا؟

حضرت عبداللہ بن عباسؓ کہتے ہیں کہ میں نے رسول اللہ ﷺ کو یہ فرماتے ہوئے سنا کہ جب کھال کو رنگ لیا جائے تو وہ پاک ہو جاتی ہے۔

ابو الخیر بیان کرتے ہیں کہ میں نے ابن وَعْلَہ السَّبَاِی پر ’’پوستین‘‘ (fur) دیکھی تو میں نے اس کو چھؤا۔ انہوں نے کہا کہ آپ اس کو کیوں چھوتے ہیں؟ میں اس بارہ میں حضرت عبداللہ بن عباسؓ سے پُوچھ چکا ہوں۔ میں نے کہا کہ ہم مغرب میں ہوتے ہیں تو ہمارے ساتھ بربری اور مجوسی ہوتے ہیں ہمارے پاس مینڈھے لائے جاتے ہیں جو انہوں نے ذبح کئے ہوتے ہیں لیکن ہم ان کے ذبیحے نہیں کھاتے۔ وہ ہمارے پاس مشکیزے لاتے ہیں اُن میں وہ چربی ڈالتے ہیں۔ حضرت ابن عباسؓ کہتے ہیں کہ ہم نے اس بارہ میں رسول اللہﷺ سے پوچھا تو آپؐ نے فرمایا کہ اس کا رنگنا اس کا پاک ہونا ہے۔

ابن وَعْلَہ السَّبَاِی کہتے ہیں کہ میں نے حضرت عبداللہ بن عباسؓ سے پوچھا۔ میں نے کہا ہم مغرب میں ہوتے ہیں تو ہمارے پاس مجوسی مشکیں لاتے ہیں اُن میں پانی اور چربی ہوتی ہے۔ انہوں نے کہا کہ اسے پی لیا کرو۔ میں نے پوچھا کہ آپ یہ رائے رکھتے ہیں؟ حضرت ابن عباسؓ نے کہا کہ میں نے رسول اللہﷺ کو یہ فرماتے ہوئے سنا کہ اس کا رنگنا اس کا پاک ہونا ہے۔