Ahadith

حضرت جابرؓ سے روایت ہے وہ کہتے ہیں رسول اللہ ﷺ نے فرمایا عَدْوَی کی کوئی حقیقت نہیں ہے اور نہ شگون اور نہ ہی بھوت پریت کی کوئی حقیقت ہے۔

حضرت جابرؓ سے روایت ہے وہ کہتے ہیں کہ رسول اللہ ﷺ نے فرمایا عَدْوَی، غول اور صَفر کی کوئی حقیقت نہیں ہے۔

حضرت جابر بن عبداللہؓ کہتے ہیں میں نے رسول اللہﷺ کو فرماتے سنا عَدْوَی اور غول اور صَفر کی کوئی حقیقت نہیں ہے۔ ابو زبیر بیان کرتے ہیں کہ حضرت جابرؓ نے ان کے لئے وَلَا صَفَرَ کی وضاحت کی کہ صَفَرَ سے مراد پیٹ ہے۔ حضرت جابرؓ سے کہا گیا کیسے؟ انہوں نے کہا، کہا جاتا ہے پیٹ کے کیڑے اور انہوں نے غول کے معنے بیان نہیں کئے۔ ابو زبیر نے کہا ہے کہ یہ چڑیل وہی تو ہے جو ہلاک کرتی ہے۔

حضرت ابو ہریرہؓ بیان کرتے ہیں میں نے نبیﷺ کو فرماتے سنا شگون کچھ نہیں اور اس کا اچھا پہلو فال ہے۔ عرض کیا گیا یا رسولؐ اللہ! فال کیا ہے؟ فرمایا وہ اچھی بات جو تم میں سے کوئی سنتا ہے۔

حضرت انسؓ سے روایت ہے کہ نبی ﷺ نے فرمایا عَدْوَی کچھ نہیں اور نہ ہی شگون کچھ ہے اور فال مجھے پسند ہے یعنی اچھی بات، پاکیزہ بات۔

حضرت انس بن مالکؓ سے مروی ہے نبی ﷺ نے فرمایا عَدْوَی کچھ نہیں اور نہ ہی شگون اور مجھے فال پسند ہے۔ راوی کہتے ہیں کہا گیا اور فال کیا ہے؟ آپؐ نے فرمایا اچھی بات۔

حضرت ابو ہریرہؓ سے روایت ہے وہ کہتے ہیں رسول اللہ ﷺ نے فرمایا: عَدْوَی اور شگون کچھ نہیں اور میں نیک فال پسند کرتا ہوں۔

حضرت ابو ہریرہؓ سے روایت ہے وہ کہتے ہیں رسول اللہ ﷺ نے فرمایا عَدْوَی ھامہ اور شگون کچھ چیز نہیں اور میں نیک فال پسند کرتا ہوں۔

حضرت عبداللہ بن عمرؓ سے روایت ہے کہ رسول اللہ ﷺ نے فرمایا گھر اور عورت اور گھوڑے میں (بھی) نحوست ہوسکتی ہے۔

حضرت عبداللہ بن عمرؓ سے روایت ہے کہ رسول اللہ ﷺ نے فرمایا عَدْوَی اور شگون کچھ نہیں اور نحوست صرف تین چیزوں میں ہے عورت، گھوڑے اور گھر میں۔ دوسرے متعدد راوی مالک کی روایت کے مطابق نحوست کا ذکر کرتے ہیں مگر ان میں سے کوئی حضرت ابن عمرؓ کی روایت میں عَدْوَی اور شگون کا ذکر نہیں کرتا۔ ایک اور روایت میں (إِنَّمَا الشُّؤْمُ کی بجائے) فِی الشُّؤْمِ کے الفاظ ہیں اور اس روایت میں الْعَدْوَی وَالطِّیَرَۃَ کے الفاظ نہیں۔