Ahadith

ابو نُعیم وہب بن کیسان روایت کرتے ہیں کہ انہیں حضرت جابرؓ بن عبد اللہ نے بتایا کہ رسول اللہﷺ نے تین سو آدمیوں پر مشتمل ایک لشکر بھجوایا اور ان پر حضرت ابو عبیدہؓ بن الجراح کو امیر مقرر فرمایا ان کا زادِ راہ ختم ہوگیا تو حضرت ابو عبیدہؓ نے ان سب کا زاد راہ ایک توشہ دان میں اکٹھا کیا۔ وہ ہمیں کھانے کے لئے دیتے تھے یہانتک کہ ہمیں ہر روز ایک کھجور ملتی تھی۔ ایک اور روایت میں ہے کہ حضرت جابر بن عبد اللہؓ نے بیان کیا کہ رسول اللہﷺ نے ایک لشکر ساحل سمندر کی طرف بھیجا اور میں بھی ان میں تھا اور اس روایت میں یہ بھی ہے کہ لشکر نے اس (بحری جانور) میں سے 18 راتیں کھایا۔ ایک اور روایت میں ہے کہ رسول اللہﷺ نے جہینہ کی سر زمین کی طرف ایک لشکر بھیجا اور ان پر ایک شخص کو امیر مقرر فرمایا۔

حضرت علیؓ بن ابی طالب سے روایت ہے کہ رسول اللہﷺ نے خیبر کے دن عورتوں سے متعہ کرنے اور گھریلو گدھوں کا گوشت کھانے سے منع فرمایا۔ ایک اور روایت میں (عَنْ لُحُوْمِ الْحُمُرِ الْاِنْسِیَّۃِ کی بجائے) عَنْ أَ کْلِ لُحُوْمِ الْحُمُرِ الْاِنْسِیَّۃِ کے الفاظ ہیں۔

حضرت ابو ثعلبہؓ کہتے ہیں کہ رسول اللہﷺ نے گھریلو گدھوں کا گوشت حرام قرار دیا ہے۔

حضرت ابن عمرؓ سے روایت ہے کہ رسول اللہ ﷺ نے گھریلو گدھوں کا گوشت کھانے سے منع فرمایا ہے۔

حضرت ابن عمرؓ سے روایت ہے وہ کہتے ہیں کہ رسول اللہﷺ نے خیبر کے دن گھریلو گدھے کا (گوشت) کھانے سے منع فرمایا حالانکہ لوگوں کو اس کی ضرورت تھی۔

شیبانی سے روایت ہے وہ کہتے ہیں میں نے حضرت عبداللہؓ بن ابی اوفٰی سے گھریلو گدھوں کے گوشت کے بارہ میں پوچھا۔ انہوں نے جواب دیا خیبر کے دن ہمیں شدید بھوک لگی اور ہم رسول اللہ ﷺ کے ساتھ تھے۔ ہم نے لوگوں کے گدھے جو شہر سے باہر تھے لے لئے۔ ہم نے انہیں ذبح کیا ہماری ہانڈیاں ابل رہی تھیں کہ رسول اللہ ﷺ کی طرف سے ایک پکارنے والے نے پکارا کہ ہانڈیاں الٹ دو اور گدھوں کے گوشت سے کچھ بھی نہ کھاؤ۔ میں نے کہا آپؐ نے ان کو حرام ٹھہرایا ہے! کس قسم کی حرمت؟ راوی کہتے ہیں یہ باتیں ہم نے آپس میں کیں، پس ہم نے کہا آپؐ نے ان کو قطعی طور پر حرام قرار دیا یا اس لئے حرام قرار دیا کہ ان کا خمس نہیں نکالا گیا تھا۔

سلیمان شیبانی بیان کرتے ہیں میں نے حضرت عبد اللہؓ بن ابی اوفیٰ کو کہتے ہوئے سنا خیبر کی راتوں میں ہمیں بھوک لگی جب خیبر (کی فتح) کا دن تھا، ہم نے گھریلو گدھے پکڑے اور انہیں ذبح کیا جب ہانڈیاں ان سے ابل رہی تھیں۔ رسول اللہ ﷺ کے منادی نے پکارا کہ ہانڈیاں الٹ دو اور گدھوں کے گوشت میں سے کچھ بھی نہ کھاؤ۔ راوی کہتے ہیں لوگوں نے کہا رسول اللہ ﷺ نے ان سے اس لئے منع کیا ہے کیونکہ ان کا خمس نہیں نکالا گیا اور بعض لوگوں نے کہا آپؐ نے ان سے قطعی طور پر منع کر دیا ہے۔

عدی سے جو ثابت کے بیٹے ہیں روایت ہے وہ کہتے ہیں میں نے حضرت براءؓ اور حضرت عبد اللہؓ بن ابی اوفیٰ کو کہتے ہوئے سنا ہم نے گدھے پائے اور انہیں پکایا تو رسول اللہﷺ کے منادی نے پکارا ہانڈیاں الٹ دو۔

ابو اسحاق سے روایت ہے کہ حضرت براءؓ نے کہا ہم نے خیبر کے دن گدھے پائے رسول اللہﷺ کے منادی نے پکارا ہانڈیاں الٹ دو۔

ثابت بن عبید سے روایت ہے وہ کہتے ہیں میں نے حضرت براءؓ کو کہتے ہوئے سنا ہمیں گھریلو گدھوں کے گوشت سے منع کیا گیا تھا۔