Ahadith

انس بن سیرین نے حضرت ابن عمرؓ کو کہتے ہوئے سنا میں نے اپنی بیوی کو طلاق دی جبکہ وہ حائضہ تھی۔ پھر حضرت عمرؓ نبیﷺ کے پاس حاضر ہوئے اور آپؐ کو (یہ بات) بتائی۔ آپؐ نے فرمایا اسے حکم دو وہ رجوع کرے۔ پھر جب وہ پاک ہو جائے تو اسے طلاق دے سکتا ہے۔ راوی کہتے ہیں میں نے حضرت ابن عمرؓ سے کہا کیا آپ اسے طلاق قرار دیتے ہیں انہوں نے کہا تو اور کیا!

ابن طاؤس اپنے والد سے روایت کرتے ہیں کہ انہوں نے حضرت ابن عمرؓ کو کہتے ہوئے سنا جبکہ ان سے ایسے شخص کے بارہ میں پوچھا گیا جس نے اپنی بیوی کو حائضہ ہونے کی حالت میں طلاق دی تھی۔ انہوں نے کہا کیا تم عبداللہ بن عمرؓ کو جانتے ہو؟ انہوں نے اپنی بیوی کو حائضہ ہونے کی حالت میں طلاق دی تھی۔ اس پر حضرت عمرؓ نبی ﷺ کے پاس گئے اور انہیں یہ بات بتائی تو آپؐ نے اُسے حکم دیا کہ وہ رجوع کرے۔ راوی کہتے ہیں کہ میں نے ان سے اپنے والد کی طرف اس سے زیادہ بات منسوب کرتے نہیں سنا۔

ابو زبیر کہتے ہیں کہا انہوں نے عزّہ کے آزاد کردہ غلام عبدالرحمان بن ایمن کو سنا جبکہ وہ حضرت ابن عمرؓ سے پوچھ رہے تھے کہ آپ کا اس شخص کے بارہ میں کیا خیال ہے جو اپنی بیوی کو حائضہ ہونے کی حالت میں طلاق دیتا ہے۔ انہوں نے کہا ابن عمرؓ نے اپنی بیوی کو حائضہ ہونے کی حالت میں رسول اللہﷺ کے زمانہ میں طلاق دی تو حضرت عمرؓ نے رسول اللہﷺ سے پوچھا اور کہا عبداللہ بن عمرؓ نے اپنی بیوی کو طلاق دی ہے اور وہ حائضہ ہے۔ اس پر نبیﷺ نے انہیں فرمایا اسے چاہیے کہ رجوع کرے چنانچہ انہوں نے اسے واپس لے لیا اور آپؐ نے فرمایا کہ جب وہ پاک ہو جائے تو وہ اسے طلاق دے یا اسے روک لے۔ حضرت ابن عمرؓ کہتے ہیں کہ نبیﷺ نے پڑھا کہ اے نبی! جب تم (لوگ) اپنی بیویوں کو طلاق دیا کرو تو ان کو ان کی طلاق عدت کے مطابق دو۔

حضرت ابن عباسؓ سے روایت ہے کہ رسول اللہﷺ اور حضرت ابوبکرؓ کے عہد میں اور حضرت عمرؓ کی خلافت کے پہلے دو سال تین طلاقیں ایک ہی شمار ہوتی تھیں۔ پھر حضرت عمر بن خطابؓ نے کہا لوگوں نے اس کام میں جلد بازی شروع کر دی ہے۔ ان کو اس میں ٹھہراؤ چاہئے تھا تو کیوں نہ ہم ان پر یہی نافذ کر دیں چنانچہ انہوں نے ان پر یہ بات نافذ کر دی۔

ابو الصہباء نے حضرت ابن عباسؓ سے کہا آپ کو علم ہے کہ نبیﷺ اور حضرت ابوبکرؓ اور حضرت عمرؓ کی امارت کے پہلے تین سال تین طلاقیں ایک ہی شمار ہوتی تھیں حضرت ابن عباسؓ نے کہا ہاں۔

طاؤس سے روایت ہے کہ ابو الصہباء نے حضرت ابن عباسؓ سے کہا اپنے نکات میں سے کچھ لائیے۔ کیا تین طلاقیں رسول اللہ ﷺ اور حضرت ابو بکرؓ کے عہد میں ایک ہی نہیں تھیں؟ انہوں نے کہا ایسا ہی تھا پھر جب حضرت عمرؓ کے زمانہ میں لوگوں نے بے سوچے سمجھے طلاق دینی شروع کی تو (حضرت عمرؓ نے) یہ ان پر نافذ کردیا۔

حضرت ابن عباسؓ سے روایت ہے کہ وہ حرام (ٹھہرانے کے) بارے میں کہتے تھے (یہ) قسم ہے وہ کفارہ دے گا۔ اور حضرت ابن عباسؓ کہتے ہیں کہ لَقَدْ کَانَ لَکُمْ فِی رَسُولِ اللّٰہ اُسْوَۃٌ حَسَنَۃٌ یقینًا تمہارے لئے اللہ کے رسولؐ میں نیک نمونہ ہے۔

سعید بن جبیر بیان کرتے ہیں کہ انہوں نے حضرت ابن عباسؓ کو کہتے ہوئے سنا کہ جب آدمی اپنی بیوی کو اپنے اوپر حرام ٹھہراتا ہے تو یہ قسم ہے (جس کا) وہ کفارہ دے گا اور کہا لَقَدْ کَانَ لَکُمْ فِی رَسُولِ اللّٰہ اُسْوَۃٌ حَسَنَۃٌ یقینًا تمہارے لئے اللہ کے رسولؐ میں نیک نمونہ ہے۔

عبید بن عُمیر بیان کرتے ہیں کہ انہوں نے حضرت عائشہؓ کو فرماتے ہوئے سنا کہ نبیﷺ حضرت زینب بنت جحش کے پاس (کچھ زیادہ وقت) ٹھہرتے تھے اور ان کے پاس شہد نوش فرماتے تھے۔ آپؓ فرماتی ہیں میں اور حفصہؓ اس بات پر متفق ہوگئے کہ ہم میں سے جس کے پاس بھی نبیﷺ تشریف لائیں تو وہ کہے کہ آپؐ کے پاس سے مغافیر کی بو آتی ہے۔ آپؐ نے مغافیر کھایا ہے؟ آپؐ اُن میں سے ایک کے پاس تشریف لائے تو اس نے آپؐ سے یہ کہا۔ آپؐ نے فرمایا میں نے تو زینبؓ بنت جحش کے ہاں شہد پیا ہے اور اب نہیں پیوں گا۔ تو یہ آیت نازل ہوئی لِمَ تُحَرِّمُ مَا اَحَلَّ اللّٰہُ لَکَ۔۔۔ اِنْ تَتُوبَا تَک: ترجمہ تم کس لئے حرام کر رہے ہو جسے اللہ نے تمہارے لئے حلال قرار دیا ہے۔۔۔ اگر تم دونوں (یعنی عائشہؓ اور حفصہؓ) اللہ کی طرف توبہ کرتے ہوئے جھکو اور وَاِذ اَسَرَّ النَّبِیُّ اِلَی بَعْضِ اَزْوَاجِہِ حَدِیْثًا یعنی جب نبیﷺ نے اپنی ایک بیوی سے بصیغہ راز بات کہی۔ آپؐ کے اس قول کی طرف (اشارہ ہے) بلکہ میں نے شہد پیا تھا۔