Ahadith

حضرت عبد اللہ بن عمرؓ کہتے ہیں کہ میں نے رسول اللہ ﷺ کو یہ فرماتے ہوئے سنا ہے کہ اونٹ کا گوشت (کھانے کی وجہ)سے وضو کرلیا کرو، بکری کا گوشت(کھانے) سے بے شک نہ کرو اور اونٹ کا دودھ( پینے)پر وضو کرلیا کرو بکری کا دودھ(پینے) پربے شک وضونہ کرو اور بکریوں کے باڑے میں نماز پڑھ لیا کرومگر اونٹوں کے باڑے میں نماز نہ پڑھو۔

حضرت ابن عباس ؓ سے روایت ہے کہ نبی ﷺنے فرمایا دودھ پر کلی کرو کیونکہ اس میں چکنائی ہے۔

عبدالمہیمن بن عباس بن بن سہل بن سعد ساعدی نے اپنے والد سے اوروہ ان کے دادا سے روایت کرتے ہیں کہ رسول اللہ ﷺ نے فرمایا دودھ پینے پر کلّی کرو کیونکہ اس میں چکنائی ہے۔

حضرت انس بن مالک ؓ نے بیان کیاکہ رسول اللہ ﷺ نے بکری کا دودھ دوہا اور اس کے دودھ میں سے پیا ، پھر پانی منگوایا اور کلی کی اور فرمایا اس میں چکنائی ہے ۔

حضرت عائشہؓ نے بیان فرمایا کہ رسول اللہ ﷺ وضو کیا کرتے تھے پھر بوسہ بھی لے لیتے اور نماز ادا کرتے اوروضو(تازہ) نہیں کرتے تھے اور کئی دفعہ آپؐ نے میرے ساتھ ایسا کیا۔

حضرت علیؓ نے بیان فرمایا کہ رسول اللہ ﷺ سے مذی کے بارے میں سوال کیا گیا۔آپؐ نے فرمایااس کی وجہ سے وضو ہے اور منی کی وجہ سے غسل ہے ۔