Ahadith

حضرت ام سلمہ ؓ نے بیان فرمایا کہ رسول اللہ ﷺ کے زمانے میں نفاس والی عورت چالیس دن بیٹھا کرتی اور ہم اپنے چہروں پر ’’ورس‘‘ (بوٹی) چھائیوں کے لئے مَلتی تھیں۔

حضرت انسؓ نے بیان کیا کہ رسول اللہ ﷺ نے نفاس والی عورت کے لئے چالیس دن کی مدت مقرر کی سوائے اس کے کہ وہ طُہر کو اس سے پہلے پالے۔

حضرت ابن عباسؓ نے بیان کیا کہ اگر کوئی مرد اپنی عورت سے ازدواجی تعلقات قائم کر لے اور وہ حائضہ ہو تو نبی ﷺ نے اسے حکم دیا ہے کہ نصف دینار صدقہ کرے۔

حضرت عبد اللہ بن سعدؓ نے بیان کیا کہ میں نے رسول اللہ ﷺ سے حائضہ عورت کے ساتھ کھانا کھانے کے بارے میں سوال کیا۔ آپؐ نے فرمایا اُس کے ساتھ کھاؤ۔

حضرت عائشہؓ نے بیان فرمایا رسول اللہﷺ نماز پڑھ رہے ہوتے تھے، میں آپؐ کے ایک طرف ہوتی اور میں حائضہ ہوتی اور میرے اوپر میری چادر ہوتی اور اُس کا کچھ حصہ آپؐ پر ہوتا۔

حضرت میمونہ ؓ سے روایت ہے کہ رسول اللہ ﷺ نے نماز پڑھی اور آپؐ پر چادر تھی۔ اس کا کچھ حصہ آپؐ پر اور کچھ حصہ اُن (حضرت میمونہؓ) پر تھا جبکہ وہ حائضہ تھیں۔

حضرت عائشہ ؓ سے روایت ہے کہ نبی ﷺ اُن کے پاس تشریف لائے۔ اُن (حضرت عائشہؓ) کی خادمہ چھپ گئی۔ نبی ﷺ نے فرمایا (یہ) بالغ ہو گئی ہے؟ اُنہوں نے عرض کیا جی ہاں۔ حضور ﷺ نے اس کے لئے اپنے عمامہ سے ایک ٹکڑا پھاڑا اور فرمایا اس سے سر کو ڈھانپو۔

حضرت عائشہؓ سے روایت ہے کہ نبی ﷺ نے فرمایا اللہ بالغ (لڑکی) کی نماز بغیر اوڑھنی کے قبول نہیں کرتا۔

مُعَاذَۃ سے روایت ہے کہ ایک عورت نے حضرت عائشہؓ سے سوال کیا حائضہ (بالوں کو) رنگ سکتی ہے؟ انہوں (حضرت عائشہؓ) نے فرمایا ہم نبی ﷺ کے پاس تھیں اور ہم (بال) رنگ لیا کرتی تھیں اور حضور ﷺ ہمیں اس سے منع نہیں فرماتے تھے۔