Ahadith

موسیٰ بن طلحہ اپنے والدؓ سے روایت کرتے ہیں انہوں نے کہا رسول اللہﷺ نے فرمایا کہ جب تم میں سے کوئی اپنے سامنے کجاوہ کے پچھلے حصہ جیسی کوئی چیز رکھ لے تو وہ نماز پڑھے اور جو اس کے پرے سے گذرے اس کی پرواہ نہ کرے۔

موسیٰ بن طلحہ اپنے والدؓ سے روایت کرتے ہوئے بیان کرتے ہیں کہ ہم نماز پڑھا کرتے تھے توجانور ہمارے آگے گزر رہے ہوتے تھے۔ ہم نے اس بات کا ذکر رسول اللہﷺ سے کیا تو آپؐ نے فرمایاکجاوہ کے پچھلا حصہ جیسی کوئی چیز اگر تم میں سے کسی کے سامنے ہو پھر اس کے سامنے سے کوئی چیز گزر ے تو وہ اسے کوئی نقصان نہیں دے گی۔ ابن نمیر کی روایت میں مَعَ کی جگہ مَنْ کا لفظ ہے۔

حضرت ابن عمرؓ سے روایت ہے کہ رسول اللہﷺ جب عید کے روز باہر تشریف لاتے تو برچھی کا حکم فرماتے تو وہ آپؐ کے سامنے گاڑی جاتی پھر آپؐ اس کی طرف رُخ کرکے نماز پڑھاتے اور لوگ آپؐ کے پیچھے ہوتے اور آپؐ کا سفر میں یہی دستور تھا، پھر یہیں سے حکام نے اس کو اختیار کر لیا۔

حضرت ابن عمرؓ سے روایت ہے کہ نبیﷺ نیزہ گاڑتے اور پھر اس کی طرف رُخ کر کے نماز پڑھتے۔ راوی ابو بکر نے اپنی روایت میں یَرْکُزُ کی جگہ یَغْرِزُ کا لفظ استعمال کیا ہے۔ ابن ابی شیبہ کی روایت میں یہ اضافہ ہے کہ عُبَیداللہ نے کہا ’’وہ (اَلْعَنْزۃُ ہی) اَلْحَرْبَۃُ یعنی برچھی ہے۔

عون بن ابی جحیفہؓ اپنے والدؓ سے روایت کرتے ہیں کہ انہوں نے کہاکہ میں نبیﷺ کی خدمت میں مکہ میں حاضر ہوا۔ آپؐ ابطح میں اپنے ایک سرخ رنگ کے خیمہ میں تھے جو چمڑے کا تھا۔ وہ کہتے ہیں کہ حضرت بلالؓ آپؐ کے وضوء کا پانی لے کر باہر نکلے تو کوئی لینے والا تھا کوئی چھڑکنے والا تھا۔ وہ کہتے ہیں پھر نبیﷺ باہر تشریف لائے۔ آپؐ سرخ رنگ کا جوڑا پہنے ہوئے تھے گویا کہ میں آپؐ کی پنڈلیوں کی سفیدی دیکھ رہا ہوں۔ وہ کہتے ہیں کہ پھر آپؐ نے وضوء کیا اور بلالؓ نے اذان دی، وہ کہتے ہیں کہ بلالؓ جب حَیَّ عَلَی الصَّلََاۃِ اور حَیَّ عَلَی الفَلََاحِ کہتے وقت اپنے منہ کو دائیں بائیں حرکت دیتے تو میں ان کے منہ کوادھر ادھرہوتے ہوئے دیکھنے لگا۔ وہ کہتے ہیں کہ پھر آپؐ کے لئے برچھی گاڑی گئی پھر آپؐ آگے آئے اور ظہر کی دو رکعتیں ادا فرمائیں درِیں اثناء آپؐ کے سامنے گدھے اور کتے وغیرہ گذرتے لیکن انہیں روکا نہ گیا پھر آپؐ نے عصر کی دو رکعتیں پڑھیں۔ پھر آپؐ دو رکعتیں ہی پڑھتے رہے یہانتک کہ مدینہ واپس تشریف لے آئے۔