Ahadith

حضرت ابو جحیفہؓ کہتے ہیں کہ رسول اللہﷺ دوپہر کے وقت بطحاء کی طرف نکلے وضوء کیا پھر ظہر کی دو رکعتیں پڑھائیں اور عصر کی دو رکعتیں پڑھائیں جبکہ آپؐ کے سامنے برچھی تھی۔ شعبہ کہتے ہیں کہ عون نے اپنے والد ابو جحیفہ سے مزید بیان کیا کہ اس کے پرے سے عورتیں اور گدھے (وغیرہ) گزرتے تھے۔ حکم کی روایت میں مزید یہ بیان کیا گیا ہے کہ لوگ آپؐ کے وضوء سے بچے ہوئے پانی سے بھی لینے لگے۔

حضرت عبداللہ بن عباسؓ نے بتایا کہ وہ گدھے پر سوار ہوکر آئے تھے جبکہ رسول اللہﷺ حجۃ الوداع کے موقع پر منٰی میں کھڑے ہوئے‘ لوگوں کو نماز پڑھا رہے تھے۔ وہ کہتے ہیں کہ گدھا ایک صف کے کچھ حصہ کے سامنے سے گزرا۔ پھر وہ اس سے اترے اور لوگوں کے ساتھ صف بنائی۔ زہری اسی سند سے روایت بیان کرتے ہیں کہ نبیﷺ عرفہ کے مقام پر نماز پڑھا رہے تھے۔ معمر زہری سے اسی سند سے روایت کرتے ہیں مگر انہوں نے اس روایت میں انہوں نے نہ تو منٰی کا ذکر کیا ہے نہ ہی عرفہ کا صرف اتنا کہا ہے کہ حجۃ الوداع کے موقعہ پر یا فتح (مکّہ) کے دن۔

ابن ہلال یعنی حمید کہتے ہیں کہ میں اور میرا ایک دوست ہم آپس میں ایک حدیث کا ذکر رہے تھے۔ ابوصالح ا لسمان نے کہا کہ میں تمہیں بتاتا ہوں جو میں نے حضرت ابو سعیدؓ سے سنا اور دیکھا۔ وہ کہتے ہیں کہ میں حضرت ابوسعیدؓ کے ساتھ تھااور وہ جمعہ کے دن کسی چیز کی طرف نماز پڑھ رہے تھے جو لوگوں سے ان کے لئے سترہ تھی۔ بنی ابو معیط کا ایک نوجوان آیا اور اس نے ان کے سامنے سے گذرنا چاہا تو انہوں نے اس کو سینہ (پر ہاتھ رکھ کر)پیچھے ہٹایا اس نے دیکھا مگر اور کوئی رستہ نہ پایا سوائے حضرت ابو سعیدؓ کے سامنے سے۔ تو وہ پھر دوبارہ آیا تو انہوں (حضرت ابو سعیدؓ ) نے اسے سینہ (پر ہاتھ رکھ کر) پہلے سے زیادہ زور سے پیچھے ہٹایا تو اس پر وہ کھڑا ہو گیا اور حضرت ابو سعیدؓ کو بُرا بھلا کہنے لگا اور لوگوں سے بھی مزاحمت کرنے لگااور وہاں سے نکلا اور مروان کے پاس جاکر جو اسے پیش آیاشکایت کی۔ وہ کہتے ہیں کہ حضرت ابو سعیدؓ مروان کے پاس گئے تو مروان نے ان سے کہا تمہارے اور تمہارے بھتیجا کا کیا معاملہ ہے وہ آپ کی شکایت لے کر آیا ہے۔ حضرت ابو سعیدؓ نے جواب دیا کہ میں نے رسول اللہﷺ کو فرماتے ہوئے سُنا ہے کہ جب تم میں سے کوئی لوگوں سے کسی چیز کو سُترہ بناکر نماز پڑھے اور کوئی اس کے سامنے سے گذرنا چاہے تو اسے چاہیے کہ وہ اسے اس کے(سینہ پر ہاتھ رکھ کر)اسے روکے اور اگر وہ انکار کرے تو وہ اس سے مقابلہ کرے کیونکہ وہ شیطان ہے۔

حضرت عبداللہ بن عمرؓ سے روایت ہے کہ رسول اللہﷺ نے فرمایا کہ جب تم میں سے کوئی نماز پڑھے تو اپنے سامنے سے کسی کو گذرنے نہ دے اور اگر وہ انکار کرے تو اس کا مقابلہ کرے کیونکہ اس کے ساتھ (بِئْسَ الْقَرِیْنَ) برا ساتھی ہے۔

بُسر بن سعید سے روایت ہے کہ حضرت زید بن خالدؓ جہنی نے ان کو حضرت ابو جہیمؓ کی طرف یہ پوچھنے کے لئے بھیجا کہ انہوں نے نمازی کے سامنے سے گذرنے والے کے بارہ میں رسول اللہﷺ سے کیا سُنا ہے؟ حضرت ابو جہیمؓ کہتے ہیں رسول اللہﷺ نے فرمایا کہ اگر نماز ی کے سامنے سے گذرنے والے کو پتہ ہو کہ اس پر کیا وبال پڑے گا تو چالیس تک کھڑے رہنا اس کے لئے بہتر ہوتا بہ نسبت اس کے کہ وہ (نمازی) کے سامنے سے گذرے۔ راوی ابو النضرکہتے ہیں مجھے معلوم نہیں کہ انہوں نے چالیس دن کہا یا مہینے یاسال۔

ابن ابی عبیدحضرت سلمہؓ بن اکوع کے بارہ میں روایت کرتے ہیں کہ وہ نفل نماز کے لئے مصحف رکھنے کی جگہ کا اہتمام کرتے تھے۔ انہوں (حضرت سلمہؓ بن اکوع) نے ذکر کیا کہ رسول اللہﷺ اس جگہ کا اہتمام فرماتے تھے اور منبر اور قبلہ کے درمیان ایک بکری کے گذرنے کے برابر جگہ تھی۔